NLITAN 18 - Kalate Zambe Nnomo a Mfefe Mfefé Nkôñelan

¹ Wôna me nga yen éngele mfe a sise si a so'o e yôp. A nga bili beta ngu. A si é nga faé a étôto'o jé.

² A nga yôtan a tyiñe ngu a jô na: A kuya, a kuya, beta Babilôn. A ntoo étaba'a mimbia minsisim, étaba'a mimvimvine minsisim mise, étaba'a anon ese e ne mvin a *abé.

³ Amu a nga nyuu meyoñe mese woone ayo'o ya ébamba. Bejô bôte ya *si nyô, be nga bo ébamba fufulu a nye. A bebo makit ya *si nyô be nga bik a ngule ya nyanga jé.

⁴ A me nga wô'ô tyiñe fe é so'o yôp é jô'ô na: Kôla'ane nlame wu a bôte bam, mi za nyoñe ngabe ya mbia be mame bé, a kabane bibubua bi ne asu dé.

⁵ Amu e mam *abé mé me ntoo abui a kui e yôp. A Zambe a simesaneya bikotekote bié.

⁶ Yaka'ane nye a e moné wé émien. Bula'ane nye mimboone mié tañe mebime mebaé. Elaé a nga bo a bunda'ane bewoone béé, tunda'ane be asu déé biyoñe bibaé.

⁷ Abim a nga nye'e étôtok a nyanga, abime te va'ane nye éndeñela'a a awu. Amu a jô e nleme wé été na: Ma ma dañ, a me nji bo nkus, a teke me ye'e ve'ele yen awu.

⁸ Amu ajô te bibubua bi ne ntiñetan mfa'a wé, bia ye zu e be nye môse wua, e ne na: Awu, mbia ôlun zaé, a a ye di'ibane nduan. Amu Nti, Zambe nyô a tyi'iya nye ajô a ne ngu.

⁹ Ajô te bejô bôte ya *si nyô be nga nyoñe ngap a ébamba jé, a nyanga jé ba ye yôn a tat, éyoñe ba ye yen ôtita ya ndi'ane wé.

¹⁰ Ba ye tebe ôyap amu woñe ya mintaé mié a jô na: Bidim! Bidim! Ngo'o beta tison, Babilôn, e ngungule tison, e nga sili ve awolo da na, ô tyi'iban ajô!

¹¹ A bebo makit ya *si nyô ba yôn a nyoñe ngabe ya ôlune vié, amu teke môt a beta kus akume dap,

¹² akume or a silba, meko'o me ne édima, a metabe, nya ndomboo a ngômesan é ne ébubut, veleves a angôô, bilé bia nyume mvaé, biôme bi ne mbañ a bilé bi ne édima, mvot, étyé nge ako'o Marbre.

¹³ Elé kanél a amône beôlobinda, mir a ôtu, woon a mbon, ékekeb avut a fôn, benyak a mintômba, bikabela a bevagoñ, alo a minkôm.

¹⁴ Ebuma ya e nleme wôé ô nga kômbô é keya wo ôyap. Jôm ése é ne abeñ a étôtok é ntoo momo be wo. Teke na be ne beta yeme je.

¹⁵ Bekuane biôm a nga bo kum amu makite mete, ba ye tebe ôyap amu woñe ya éndeñela'a jé. E du été a ôlun été,

¹⁶ ba ye jô na: Bidim! Bidim! Beta tison, nyô a nga be'e ndombo, ngômesan é ne ébubut a nyô é ne angôô, é ngemba'ane or, meko'o me ne édima a metabe,

¹⁷ akume te ese e maneya saaban v'awolo da étam! A bewulu beavion bese, ba bese ba wulu besitima e mefôla ma bôman, bewulu mañ a ba bese ényiñe jap é tii mañ be nga tele ôyap,

¹⁸ be yôta'an a ñyenan ôtita ya ndi'ane wé na: Tisone fé é mbe ve'ane beta tison'

¹⁹ Be mbe be kute mbuluk e minlô, be yônôk, mili'i mis a ôlune na: Bidim! Bidim! Beta tison nyô afo'o dé e nga bo ba bese be bili besitima mañe kum, ase a maneya saaban v'awolo da étam!

²⁰ Va'ak, a yôp amu nkuane wé! Mia mimfufup, minlôman a bekulu mejô fe va'an, amu Zambe a kobôya ajô denan éyoñ a maneya tyi'i ajô Babilôn.

²¹ Eyoñe te ngungul éngele éziñ ô nga nyoñ akok e ne anen, ako'o ba ko'o de bidi a wua de mañ été a jô'ô na: Avale ngule di nde ba ye wua Babilôn, beta tison, ba ye bo te beta yene nye.

²² Ba ye bo te beta wô'ô jia bebôme mvet a beyeme mezik, bebôme mfañ a toñ e be wo.

²³ Efufube lambe ja ye bo te beta faé be wo. Ba ye bo te beta wô'ô tyiñe ndôman é ndôme luk ba ngale be wo, amu bebo makite bôé be mbe biwôlô bi bôte ya *si nyô, amu mam me ngbwee me nga wone *meyoñ mese,

²⁴ a amu be nga koone metyi bekulu mejô, ma mimfufup a ma me ba bese be nga wôéban e *si nyô be wo.