NKÔLAN 39 - Kalate Zambe Nnomo a Mfefe Mfefé Nkôñelan

Nloon biyé betuni

¹ Be nga loé mingum biyé asu mboon ésaé ya vôm a ne étyi, a bindélé bi too nyôle blum, mfô, a évele, be nga loé biôm bi ne étyi asu Aron, aval ane Nti a nga bendé Môze.

² Be nga bo éfôd a mvot, minsinga mi too blum, mfô, évele a éfumulu.

³ Ane be nga ndamé biba'a bi mvot a tyi'i bie minsinga, éyoñ te be nga ke ba kotan mie e bindélé bi ne blum, mfô, évele a éfumulu été; a mbe mboon jôm atyeñ.

⁴ Ane be nga bo je meba'a ya bitu a tiñeti me meku'u mebaé mfa'a ya yemete je.

⁵ Kandé é mbe ébôma'ane je é mbe mboon avale da: Mvot, minsinga mi ne blum, mfô, évele a éfumulu, nlatan jôme jia a éfôd ébien, avale Nti a nga bendé Môze.

⁶ Be nga ba meko'o me ôniks a futi me biôm bi mvot be nga kôm. Ane be nga kpwelé biyôlé bi bôt ya Israél été yôp, ane ba futi *sitam.

⁷ E nde be nga futi me biwo'o ya éfôd aval ane meko'o ya bo te vuan bôt ya Israél, avale Nti a nga bendé Môze.

⁸ Be nga kôm ébuta'a tôé, mboon jôm atyeñ fe, bebé ane éfôd, be bela'an mvot, minsinga mi too blum, mfô, évele a éfumulu.

⁹ Nté a ndam abime da; be nga bo je mimba'a mibaé, nté ô too centiméta mewôm mebaé a étan. Ebuta'a tôé te é too mimba'a mibaé.

¹⁰ Ane be nga bé meko'o minnoñ minyin été; nôfét wua, sardôan wua, tôpaze wua, émerôd wua:

¹¹ nnoñ baa ô too, nôfét wua, safir wua, diamañ wua.

¹² Nnoñ lale, ôpale wua, agat wua a amétiste wua;

¹³ Nnoñ nyini, krizôlit wua, yaspe wua. Meko'o mete me mbe nsoman biôm bi mvot été.

¹⁴ Meko'o me nga lu'an a môé me bone be Israél; me mbe awôm a mebaé, avale ane môé mab me né; me mbe nkpwelan ane besitam, ako'o ese e be'e jôé da ya *meyoñ awôm a mebaé ya Israél.

¹⁵ Be nga kôme bone bengôkop be mvot ébuta'a tôé yôp, be too ntiñan ane minko.

¹⁶ Be nga bo fe mimbeka'a mi mvot mibaé a bilondo bi mvot bibaé; ane be nga futi bilondo bibaé e meku'u mebaé ya ébuta'a tôé.

¹⁷ Nde be nga some minkole mi mvot mibaé e bilondo bibaé bi mbe meku'u mebaé ya ébuta'a tôé;

¹⁸ Ane be nga some mesu mevo'o mebaé ya minkole mibaé e mimbeka'a mibaé mi mbe e meba'a bitul ya éfôd mfa'a ya ôsu.

¹⁹ Ane be nga beta bo bilondo bife bibaé e meku'u mebaé ya ébuta'a tôé, éfase ya été é nga latane éfôd.

²⁰ Be nga beta bo bilondo bi mvot bife bibaé a futi bie meba'a bitul ya éfôd si, éfase ya ôsu bebé éboña'a, e kandé éfôd yôp.

²¹ Bilondo ya ébuta'a tôé bi nga volô na be yemete je e bilondo ya éfôd a nkol ô too blum, nalé ébuta'a tôé é bo e kandé éfôd yôp, a na é bo te kandan a éfôd. E nga boban avale Nti a nga bendé Môze.

²² Ane be loé ézingi éfôd a éyé é too blum ése.

²³ Tyiñ ézingi é mbe ézezañ, é funa'an ane nyô mbot ékôb é ne ntiñan; be nga bo fe nloko'o mbôma'ane ane ézingi ja ye bo te nyabé.

²⁴ Be nga bo bibuma bi too blum, mfô a évele, ntiñan a mvosan minsinga, mfa'a ézingi ja ke ja jombô.

²⁵ Be nga kôm fe bone mebenge me nya mvotô a futi me zañe bibuma mbôma'ane a ézingi ése e zañe bibuma.

²⁶ Abeñge da ébuma jia, abeñge da a ébuma jia, mbôma'an a ézingi ése, avale Nti a nga bendé Môze.

²⁷ Be nga loé melô'ô me nya ndomboo, mbamba ntiñan, asu Aron a bone bé;

²⁸ A ôzomezome ntôm ô too fe nya ndomboo, a mintôm mife mia liti éjijine jap, mie fe mi too nya ndomboo; bikuba bi ndombo é ne ntiñan.

²⁹ Be nga bo fe ases a nya ndomboo a ne mvosan, ntiñan blum, mfô a évele avale Nti a nga bendé Môze.

³⁰ Be nga bo ékat kuron é ne étyi a éba'a mvot, e nde be nga kpwelé été yôb ane ba kpwele *sitam na: Etyi be Nti!

³¹ Ane be nga futi nkole été yôb ô too blum mfa'a ya tiñeti ékate te ôzomezome ntôm yôp, avale Nti a nga bendé Môze.

Tabernakel a teléban

³² Ane ésaé ése ya *tabernakel é nga man; *nda éndélé bisulan, bôte ya Israél be nga bo ane Nti a nga bendé Môze.

³³ E nde be nga zuu *tabernakel be Môze; *nda éndélé a biôm bié bise: Akobe dé, mebame mé, betyengane bé, mekône mé a metine mé.

³⁴ Ebuta'a bikôb beyôm mintômba nduban évele, ébuta'a bikôb bi tit bia dañe ngu a éyé ja kandé (vôme a ne étyi a vôme a dañe dañe étyi).

³⁵ Ewolo élat a mimbone mié, nalé fe ébuta'a ya éwolo.

³⁶ Tebele a biôm mebelan bié bise, nalé fe belet awôm a ébaé é mbe é bômbô'ô vôm a ne étyi éyoñ ése.

³⁷ Ebi bifufub mboon a mvot, belambe bé, belambe be ne nkôman a biôm bise y'été a mbon asu ébi bifufup.

³⁸ Otéla mvot, mbon ba wo'o bôt éyoñ ba telé be bito, a ôlobinda asu étyita'a, nalé fe éyé ja tyebe *mbé ya anyiine *nda éndéle;

³⁹ ata'a mvot, étañe mvote jé, mimbôñ a biôm bié bise; fandé a tine jé a tebe été;

⁴⁰ bindélé ya nseñ, mekône mé, metine mé a éyé ya *mbé ya nseñ, minkole mié, mekône mé a biôm mebelan bise ya *tabernakel, biôm bi ésaé bise *nda mfa'a éndélé ya bisulan.

⁴¹ Mimbot mi ne nloon asu ésaé ya vôm a ne étyi, mimbot mi ne étyi asu Aron, a mimbot mi bone bé asu ésaé betuni.

⁴² Ane bôt ya Israél be nga bo ésaé te ése, avale ebien Nti a nga bendé Môze.

⁴³ E nde Môze a nga fombô ésaé a yene na be nga bo je avale ebien Nti a nga bendé. Ane Môze a nga botane be.