NKÔLAN 37 - Kalate Zambe Nnomo a Mfefe Mfefé Nkôñelan

Nkôman éwolo, tebele a ébi bifufup

¹ Ane Betsalél a nga kôme éwolo a asé, nté ô too menyi'i me mo mebaé a étun, ndam ke anyi'i wo da a étun.

² Ane a nga yañe je atan a été a mvot a ne mfuban; nde fe a nga bo nkôngô mvot mbôma'ane meku'u mese.

³ Nde a nga nyemé bilondo binyin ya futi meku'u menyin ya été, éfase ése bilondo bibaé.

⁴ Ane a nga bo mimbôñ mi asé a yañ mie mvot.

⁵ Ane a nga some mimbôñ mite e bilondo e meku'u ya éwolo mfa'a ya be'e je.

⁶ Ane a nga bo ébuta'a éwolo a mvot a dañe mfuban; ébuta'a te é too nté menyi'i me mo mebaé a étun a ndam anyi'i wo da a étun.

⁷ Ane a nga bo besérafeñ bebaé a mvot e meku'u mebaé ya ébuta'a; a nga bo be a mvot ane mbiban;

⁸ Sérafeñ wua éfase ji a nyô mbok, éfase évok; a nga bo besérafeñ nlatan a meku'u mebaé ya ébuta'a.

⁹ Besérafeñ be same mefabe mabe yôp, be buti'i ébuta'a a mefabe mete be lôane fe mesu. Mesu Besérafeñ me mbe me lôô ébuta'a.

¹⁰ A nga kôme tebele a asé; nté ô too menyi'i me mo mebaé, ndam anyi'i wo da a nkôñe yôp anyi'i wo da a étun.

¹¹ A nga yañe je a mvot a dañe *mfuban a bo fe nkôngô mvot mbôma'ane.

¹² A nga bo filim mbôma'ane été a bo fe nkôngô été a mvot mbôma'ane filim.

¹³ Ane a nga nyemé bilondo bi mvot binyin asu tebele a futi bie meku'u menyin ma tôban a mebo menyin.

¹⁴ Bilondo bi mbe bebé filim, mimbôñ mi tula'an été mfa'a mbe'an tebele.

¹⁵ A nga kôme mimbôñ mite a asé a mane fe yañe mie mvot; mi nga volô mbe'an tebele.

¹⁶ Ane a nga kôme biôm ya belan bie tebele: Bisua, bilaé mevale mebaé a mekob minlak asu nsôban mo a mebo: Biôm bite bi nga boban a mvot.

¹⁷ A nga bo ébi bifufub a mvot ane *mfuban a too mbiban; abo, nkuk, bilaé, bibuma a mesam mé bi too mboon jôme jia.

¹⁸ Ebi bifufub te é bili mintyaé misaman, milal éfase ji milale mivok éfase ji.

¹⁹ Ntyaé ôse ô bili bilaé bilaa éyeka'a ane ébuma mvin, bibuma a mesam me too été; mintyaé misaman mise mi nga tii ébi bifufup mi mbe avale te.

²⁰ Nku'u ébi bifufub ô nga bili bilaé binyin éyeka'a ane ébuma mvin, bibuma a mesam me too été.

²¹ Mintyaé misaman mi nga beme nkuk ébi bifufub mi mbe mba'atan mibaé mibaé, ébuma é too mba'atan ôse si.

²² Bibuma a mintyaé mi ébi bifufub bi too jôme jia; ase mboon a mvot a ne mbiban a *mfuban.

²³ Belambe bé zamgbwa, menjo mé a bikutan asup bié bi too mboon a mvot a ne *mfuban.

²⁴ Be nga belan bekiligram be mvot a ne *mfuban mewôm mela mfa'a ya kôme ébi bifufub a biôm mebelan bié bise.

Nlôñan ata'a metuna'a b'ôlobinda

²⁵ Ane a nga lôñe ata'a metuna'a b'ôlobinda a asé; nté ô too anyi'i wo da, ndam fe anyi'i wo da; ata'a metuna'a ate a mbe abime da nté a ndam, ve ôyabe yôp ô mbe menyi'i me mo mela. A nga futi minlak meku'u menyin; minlak a ata'a metuna'a bi too jôm jia.

²⁶ A nga yañe nye a mvot a ne *mfuban mfa'a ya yôp, e mefefel, mbôma'ane a minlak, ane fe a nga bo nkôngô mvot mbôma'an.

²⁷ A nga bo bilondo bibaé e nkôngô mvot si éfase ya li a li, a futi fe bilondo mevôme mevok mfa'a ya some mimbôñ ya be'e ata'a metuna'a.

²⁸ Nde a nga kôme mimbôñ mite a asé a dube mie a mvot.

²⁹ Ane a nga kôme fe mbon ô ne étyi ba wo'o bôt éyoñ ba telé be bito, nalé fe ôlobinda a nyume mvaé, a too *mfuban, nkôman avale ntyetyeñ nkôm be ôlobinda a ne kôm.