NKÔLAN 31 - Kalate Zambe Nnomo a Mfefe Mfefé Nkôñelan

Ntelan bebo bisaé

¹ Ane Nti a nga kobô Môze a jô nye na:

² Ô lôô, me nga loone Besalél mona Uri, mona Ur ya *nda bôte Yuda a jôé dé.

³ Me nga jalé nye a nsisime Zambe, wu ya fek, wu ya atyeñ a ñyemane mam ya yeme bo bisaé bi atyeñ mevale mese,

⁴ mfa'a ya bôndé mefek ya bo bisaé bia sili atyeñ, mfa'a ya saé mvot, silba a bidima *mekok,

⁵ mfa'a ya kpwelé *mekok a bilé a bo mevale bisaé mese.

⁶ Me nga ve nye Ohôliab, mona Ahisamak ya *nda bôte Dan, a bo mvolô wé. Me maneya futi fek e minlem mi bôt be ne atyeñ na, be bo ésaé ése me maneya liti wo.

⁷ Nda éndelé bisulan, éwolo élat, ébuta'a ya éwolo a biôm bise bi ne je yôb a biôme mebelan bise ya *nda éndelé:

⁸ Tebele a biôm mebelane bié, ébi bifufup é ne mboon a mvot é ne *mfuban a biôm mebelan bié bise, ata'a metuna'a beôlobinda,

⁹ ata'a mimvean mi ne ngumba, fandé a jôm a bete yôp;

¹⁰ minjaé mi ne ngumba aval, minjaé mi ne étyi asu Aron, minjaé asu *bon ba bo ésaé vôm a ne étyi;

¹¹ mbon ba wo'o bôt ba telé, a ôlobinda a ne menyum mfa'a ya kôme vôm a ne étyi.

Sabat

¹² Ane Nti a nga kobô Môze a jô nye na:

¹³ Wo, kobô'ô bôte ya Israél a jô be na: E ne fo'o na, mia ye ba'ale besabat bam amu da ye bo ndem e zañe jenan a ma, e miaé mienan mise, nalé bôt ba ye yeme na me ne Nti, nyô a telé mia étyi.

¹⁴ Mia ye ba'ale *sabat, amu a ye bo étyi mfa'a wônan. Môt ase a ye ndaman étyi jé nye a ye wôéban; môt ase a ye bo ésaé éziñ *môs ôte, a ye tyi'iban e zañe bôte bé.

¹⁵ Esaé ja ye boban tañe môse misaman; ve môse zamgbwale ô ne *sabat, *môs abôk, ntelan étyi mfa'a Nti. Môt ase a ye bo ésaé éziñ môse *sabat a ye wôéban.

¹⁶ Bôte ya Israél ba ye ba'ale sabat; miaé mise mia ye jeme abô'ô *sabat ane élat ya nnôm éto.

¹⁷ Jam di da ye bo ndem ja ye tabe nnôm éto e zañe jam a bôte ya Israél; amu Nti a nga té yôb a si môse misaman, ve môse zamgbwale ñwô a nga telé ésaé jé a wo'on.

Meko'o metiñ

¹⁸ Eyoñe Nti a nga mane kobô Môze e nkôle Sinayi ane a nga kalane nye bifase meko'o bibaé, bifase *mekok ntilan a ônyu Zambe ôbien.