NKÔLAN 28 - Kalate Zambe Nnomo a Mfefe Mfefé Nkôñelan

Mimfufube minjaé

¹ Bo'o na monyoñ Aron a subu ma bebé, bone bé be bo ma ésaé betuni; Aron a bone bé: Nadab, Abihu, Eléazar a Itamar.

² Wo ye loé monyoñ Aron mimbot mi ne étyi mfa'a ya liti nkôñe wé a éjijine jé.

³ Wo ye kobô ba bese be ne atyeñ mboone mam mbe me nga jalé a *nsisim ya fek, ba ye loé Aron biôm ya jaé, nalé a ye telébane étyi a bo ésaé *ntuni mfa'a wom.

⁴ Biôm ba ye loé mbie bi: Ebuta'a tôé, éfôd, éziñgi, anen alô'ô e too ntiñan, ôzomezome ntôm a ases. Ba ye loé biôm bi ne étyi bite asu monyoñ Aron a bone bé, nalé ba ye bo ésaé betuni asu dam.

⁵ Ba ye nyoñe mvot, nalé fe biyé bi ne nyôle blum, mfô a évele a nya ndombo ntiñan: Mboon ésaé ntyetyeñ;

⁶ Ba ye loé a éfumulu nsinga é ne te téé tyi'ibi, mbunda'an a blum, mfô a évele, minkoñ ya été mi too ntiñan a minsinga mi mvot.

⁷ Ba ye jaé éfôd a biwo'o bibaé, nloone minkoñ.

⁸ Bekandé ya éfôd, nloon a minsinga mi ne avale da, ba ye fulane bo jôme jia a éfôd ébien.

⁹ Eyoñe te ba ye nyoñe meko'o me ôniks mebaé a kpwele môé me bone be Yakob été;

¹⁰ môé mesaman ako'o ôsu, môé mevo'o mesaman ako'o baa aval ane mebialé mab me né.

¹¹ Mba *mekok nye a ye kpwele môé e meko'o mebaé aval ane môt a kpwele sitame wé émien; nye fe a ye yemete bie a biyemete bi mvot bibaé bi ne été.

¹² Ba ye tyelé meko'o mebaé e biwo'o bi éfôd, mfa'a ya simesane *meyoñ awôm a mebaé ya Israél; nalé Aron a ye jaé biyôlé biab e bitule bié éyoñ a ne asu éwolo élat, a ma, Nti, ma ye bo te vuane mia.

¹³ Biyemete bibaé bia ye bo mboon a mvot

¹⁴ a bone bengôkobe bebaé mboon a mvot a dañe *mfuban, mbe wo ye tiñ ane *mfuban, a wo ye tiñeti bone bengôkop be ne ntiñan a biyemete.

¹⁵ Wo ye bo ébuta'a tôé asu ntyi'ane mejô a bifumulu minsinga bi ne ntip, mbunda'ane a mi mi ne blum, mfô a évele, minkoñ mi too ntiñan a minsinga mi mvot avale fe e ne éfôd.

¹⁶ Mfe'e te wo ye bo meku'u mese avale da a mba'atan, nté ô too fandane anyu abaé, ndame fe avale te.

¹⁷ Mfe'e te wo ye bi abeñ minnoñ meko'o me ne édima minyin: Nnoñ ôsu ô bili me avale di: Sardôan, tôpaz, émerôd, ako'o ese ya été e too da;

¹⁸ Nnoñe baa ke avale di: Eskabukel, safir, diamañ, ako'o ese ya été fe e too da;

¹⁹ nnoñ lale: Ôpal, agat, amétist, ako'o ese e too da.

²⁰ Nnoñ nyini: Krizôlit, ôniks, yaspe, ako'o ese e too da; ba ye tiñeti meko'o mete a biyemete bi mvot biap.

²¹ Ba ye kpwelé jôé éziñ ya bone be Yakob awôm a bebaé ako'o ese ya été avale ba kpwelé *sitam môt émien; meko'o mete ma ye bobane nalé mfa'a ya simesane *meyoñ awôm a mebaé ya Israél.

²² Wo ye bo bone bengôkop be mvot a ne *mfuban ébuta'a tôé yôp, be too ntiñan ane nko.

²³ Wo ye fe bo bilondo bi mvot bibaé ébuta'a tôé, a wo ye futi bilondo bite bibaé e meku'u mebaé ya ébuta'a tôé.

²⁴ Wo ye solé minkole mi mvot mite mibaé e bilondo bibaé bi ne meku'u ya ébuta'a tôé;

²⁵ a wo ye solé meku'u mebaé ya minkole mibaé e biyemete bibaé bi ne e meba'a bitule ya éfôd mfa'a ya ôsu.

²⁶ Wo ye beta bo bilondo bi mvot bibaé mbie wo ye futi e meku'u mebaé ya ébuta'a tôé, nkoñ ya été ô too nlatan a éfôd.

²⁷ Wo ye kôme bilondo bi mvot bife mbie wo ye futi e meba'a bitule ya éfôd si mfa'a ya ôsu, bebé a élata'a, e kandé ya éfôde yôp.

²⁸ Ba ye yemete ébuta'a tôé, a bilondo bi éfôde yôb, a nkol ô too blum: alé ébuta'a tôé ja ye bo e kandé éfôde yôb a nalé ja ye bo te kandéban a éfôd.

²⁹ Eyoñ Aron a ye nyiin vôm a ne étyi, a ye be'e biyôlé bi bôte ya Israél e nleme wé yôp, nkpwelan ébuta'a tôé ya ntyi'ane mejô yôp: E ne jam ya simesan éyoñ ése asu Nti.

³⁰ Wo ye late urim a tumin ébuta'a tôé ya ntyi'ane mejô yôp, a bia ye bo nleme Arone yôb éyoñ a ye nyiin asu Nti. Nalé Aron a ye jaé ntyi'ane mejô bôte ya Israél éyoñ ése asu Nti.

³¹ Aron a ye jaé éfôd éziñgi yôp; éziñgi te ja ye bo ése évele.

³² Tyiñ ya été ja ye tuban ézezañ, a ba ye tiñ *tyiñ mbôma'an a mimba'a minsiñga, ane ba ye tu'a yemete ézingi te a ane ja ye bo te ngul ya nyabé.

³³ Ba ye tiñe bibuma bi grenade mbôma'an ézingi si; bibuma bite bi too blum, mfô a évele. Ezezañ ya bibuma bi, ja ye bi bone mebenge me mvot mbôma'an;

³⁴ Akôlô ya ébuma ô kui mone abeñge, akôlô ya mone abeñge ô beta kui ébuma, nalé a ye bômane éfas ézingi ya si.

³⁵ Aron a ye jaé je éyoñ a bo ésaé jé; éduñ bone mebenge ja ye wô'é éyoñ a nyiin vôm a ne étyi asu Nti, a éyoñ a kui atan, nalé a ye bo te wu.

³⁶ Wo ye bo éba'a a mvot ja dañe mfuban; wo ye kpwelé été yôb ane ba kpwelé sitame na: Etyi e be Nti.

³⁷ Wo ye tyelé éba'a te ôzomezome ntôme yôb éfas ya asu.

³⁸ Aron a yiane jaé éba'a te e mvom asu jé nalé ate a ye jaé bikobe bi nga boban asu biôme bi ne étyi, e bi bone Israél be nga ve a telé étyi; a yiane jaé je asu dé éyoñ ése nalé ate mimveane mite mia ye nyoñebane *mvo'é e be Nti.

³⁹ Wo ye loé alô'ô a éfumulu nsinga é ne abeñ, avale te fe wo ye bo ôzomezome ntôm, a ases da ye bo ntiñan.

⁴⁰ Wo ye loé bone be Aron melô'ô, a bo fe be meses, nalé fe mintôm mfa'a ya liti nkôñ wob a éjijine jap.

⁴¹ Avale te nde wo ye jalé monyoñ Aron a bone bé, wo ye wo'o be mbon, a ve be ngu, a telé be étyi, a ba ye bo ma ésaé betuni.

⁴² Wo ye loé be mekuba me ndombo mfa'a ya solé soé ya menyôle map; mekuba mete ma ye taté angeteñ a kui mebé.

⁴³ Aron a bone bé ba ye jaé me éyoñ ba nyiin *nda éndelé ba bo bisulan nge na éyoñ ba subu bebé ata'a metuna'a a bo ésaé e vôm a ne étyi: Nde ba ye bo te wu amu nlitane soé wop. Atiñe di e ne di ya biyoñ bise mfa'a Aron a mvoñ bôte jé.