NKÔLAN 26 - Kalate Zambe Nnomo a Mfefe Mfefé Nkôñelan

Avale Tabernakel a yiane boban

¹ Wo ye kôme *tabernakel a ndam bindelé awôm; bindelé bite bi too nya ndombo a too ntiñan a mvosane nsinga, bindelé bite bi too menyôl mevale mela: blum, mfô a évele. Wo ye tiñ Bekerubim e bindelé bite yôp, ntiñane te ô too wu ntyetyeñ mbo ésaé.

² Nté éndelé ôse wo ye bo menyi'i me mo mewôm mebaé a mesaman a ndam menyi'i me mo menyin. Bindelé bite bise bia ye bo abime da.

³ Wo ye tiñeti bindelé bitan jôme jia a bi bivo'o bitan jôme jia.

⁴ Wo ye loé nkoñ ya éndelé ja su'ulan ntiñetane bindelé bitan ya ôsu a éyé é too nyôle blum;

⁵ avale te fe wo ye bo éndelé ja su'ulan ntiñetan bindelé bitan bi baa. Metiñ mete ma ye bo zôsôôô, mana a ma mevok.

⁶ Wo ye bo bibandan bi mvot mewôm metan a late bindelé jia a ji évok a bibandane bite, nalé *tabernakel a ye bo nlatane jôme jia.

⁷ Wo ye bo andile ya *tabernakel a bifuse biyé awôm a jia bi too mboon a mimvot bikela.

⁸ Nté éyé ôse wo ye bo menyi'i me mo mewôm mela a ndam menyi'i me mo menyin. Bifuse biyé awôm a jia fe bia ye bo nté a ndam avale da.

⁹ Wo ye late bifuse biyé bitan mfa'a wua a bisaman mfa'a mbok; éfuse éyé saman ja ye bo mimba'a éfas ja jombô mfine *tabernakel ya nseñ.

¹⁰ Wo ye bo metiñ me nloko'o mewôm metan nkoñ ya éfus éyé ja su'ulan nlatan bifus biyé wua, a metiñ me nloko'o mewôm metan nkoñ éfus éyé ya nlatan bifuse biyé bi baa.

¹¹ Wo ye bo bibandan bi mvot a futi bie metiñ me nloko'o été: nalé wo ye bo *tabernakel a bo jôme jia (mfa'a ya andil).

¹² Bindelé ya *nda éndelé bia ye bi éfas éndelé é jombô'ô e mvuse *tabernakel.

¹³ Bitun biyé bia ye bebe e bindelé ya *nda éndelé tañe ényi'a wo e li a li mfa'a ya nté; bia ye jombô e meku'u mebaé ya *tabernakel mfa'a ya buti nye.

¹⁴ Wo ye buti *nda éndelé a bikôbe beyôm mintômba nduban évele: Bikôbe mebañ bia ye bebe bikôbe beyôm mintômba yôp.

¹⁵ Wo ye bo mebam asu tabernakel; wo ye bo me a asé a telé me tetele.

¹⁶ Nté ya abam ese wo ye bo menyi'i me mo awôm.

¹⁷ Abam ese da ye bi ayema'a abaé wua nlatan a wu ôvok; wo ye bo avale da mfa'a mebam mese ya *tabernakel.

¹⁸ E mebam mete, asu *tabernakel, mewôm mebaé ma ye fombô mfa'a ya Négéb, e nké.

¹⁹ Wo ye bo mekôn me silba mewôm menyin, me tele mebam mewôm mebaé si; mekôn mebaé me tele abam da si mfa'a ya ayema'a abaé ya été; a mekôn mebaé mevok me tele abam avo'o si mfa'a ya ayema'a ya été.

²⁰ Mfa'a éfase baa ya *tabernakel, nalé a ne na akôé, mebam mewôm mebaé fe,

²¹ a mekôn me silba mewôm menyine map, mekôn mebaé abam ese si.

²² Wo ye bo mebam mesaman éfase *tabernakel ya mfa'a jôb da dim.

²³ Wo ye bo mebam mebaé meku'u me *tabernakel mfa'a ya mvus;

²⁴ Ma ye bo nlatan ataté si a nlatane vôme wua a élondo mfa'a ya yôp: Nalé ate a ye boban mfa'a mebam mebaé me tele meku'u mebaé.

²⁵ Mebam ma ye bo muam a mekôn me silba map: nalé a ne na mekôn awôm a mesaman, mebaé abam ese si.

²⁶ Wo ye bo betyengane biba'a a élé asé, betan asu mebam me tele aku'u da ya *tabernakel,

²⁷ betyengane betan asu mebam me tele aku'u avok ya *tabernakel, a betyengane betan asu mebam me ne éfase *tabernakel é ne mvus mfa'a jôb da dim.

²⁸ Tyengane ya zañe mebam a ye téé aku'u di a kui di avok.

²⁹ Wo ye yañe mebam a mvot; a bilondo ba ye somesane betyengane été, wo ye bo bie a mvot a yañe fe betyeñgane bebien a mvot.

³⁰ Eyoñ wo ye telé *tabernakel, wo ye tôñe éve'ela be nga liti wo nkôle yôp.

³¹ Endelé é tyele e zañe *nda ja ye bo menyôle mela: Blum. Mfô a évele; éndelé te ja yiane fe bo ndomboo, ntiñan a mvosane minsinga, Bekerubim ba ye kômban a atyeñ, bese be too été.

³² Wo ye futi je e mekoñ me asé menyine yôb me too ñyañan a mvot; mekôn mete ma ye bi akob mvot a ma ye bebe mekôn me silba yôp.

³³ Wo ye futi éndelé ya zañe *nda akobe si a mvuse éndelé te, nne ba ye bôôé éwolo é bili biôm ya élat valé. Endelé te nje ja ye kandé vôm a ne étyi a vôm a dañe étyi.

³⁴ Ba ye buti éwolo é ne étyi e vôm a dañe dañ étyi.

³⁵ Ba ye telé tebele vôm a ne étyi e *nda akôé a ébe'e bifufub ja ye tebe é ve'ane tebele, mfa'a ya nké, a kooé na ô teléya tebele mfa'a y'akôé.

³⁶ Mfa'a anyiin *nda éndelé é ne étyi, betiñe bindelé ba ye loé éndelé éfe a éfumulu kilisi é ne ngu, mbundan a nsinga ô ne blum, mfô a évele.

³⁷ Ba ye bo mekôn metan a asé, be mane yañe me a mvot; nne ba ye yemete éndelé été a mesen me mvot; wo ye lui metiñ me mvot metan asu mekôn mete.