NKÔLAN 25 - Kalate Zambe Nnomo a Mfefe Mfefé Nkôñelan

Nlôñane Tabernakel a mebendé ya été

¹ Ane Nti a nga kobô Môze na:

² Kobô'ô bôte ya Israél na: Be vaa mvean ya ékaña'a wom. Mia ye vaa wô e be môt ase *nlem ô ne ésôs.

³ Mvean mia ye vaa e be môt ase ñwô wu: Silba a mvot;

⁴ biyé bi ne blum, mfô a évele, abeñe biyé bi léñ a mimvot bikela;

⁵ bikôb beyôm mintômba nduban évele, a bikôbe bi beta betit ya mañ bi ne afip, mebam m'asé.

⁶ Mbon asu belambe, alobinda da nyume mvaé asu mbon ba wo'o bôt éyoñ ba telé be bito a asu bityita'a bia nyume mvaé;

⁷ meko'o me ôniks a mefe asu ya futi me e mimbot betuni ba jaé be lo'one mie na éfôd péktôral.

⁸ Ba ye kôme ma vôm a ne étyi a ma ye tabe ézezañe jap.

⁹ Mia ye wulu mam mese aval ane éve'ela *tabernakel é né a aval ane éve'ela ya biôm mebelan bise ya été ma ye liti wo é né.

Ewolo, Tebele, ébi bifufup

¹⁰ Ba ye bo éwolo a asé; nté ya été wo ye bo menyi'i me mo mebaé a étun, ndam anyi'i wo da a étun, nkôñ anyi'i wo da a étun.

¹¹ Ba ye yañe nya mvotô mfa'a ya été a atan, a futi fe nkôngô mvot mbôma'an meku'u mese.

¹² Wo ye kôme bilondo bi mvot binyin asu éwolo éte a futi fe bie meku'u menyin ya été: Bibaé li a bibaé li.

¹³ Wo ye kôme mimbôñ mibaé a asé a yañe mie mvot.

¹⁴ Wo ye some mimbôñ mite e bilondo ya mefefele m'éwolo, mmie ba ye bo be beke'e mie éwolo.

¹⁵ Mimbôñ mia ye tabe e bilondo ya éwolo été; a ba ye bo te vaa mie été.

¹⁶ Wo ye futi bifase meko'o metiñ bibaé ma ye ve wo éwolo été.

¹⁷ Wo ye kôme abam a nya mvotô nté ô too menyi'i me mo mebaé a étun, ndam anyi'i wo da a étun.

¹⁸ Wo ye bo bive'ela bibaé ya beéngele ba loone Bekerubim a mvot e meku'u mebaé ya abame di; wo ye bo bie a mvot é ne mbiban,

¹⁹ kérubim wua aku'u di a nyô mbok aku'u avok; mia ye bo Bekerubim ba jôme jia, nlatan a meku'u mebaé ya abam.

²⁰ Bekerubim ba ye same mefabe mab e yôp, mefabe mete me buti'i abam a Bekerubim bebiene ke be lôane mesu; mesu mab ma ye fombô abam.

²¹ Wo ye nyoñe abam a telé de éwolo yôb a futi meko'o metiñ ma ye kee wo éwolo été.

²² Ma ye tôbane wo abame yôp, e zañe Bekerubim bebaé be tele éwolo metiñe yôp; ma ye kobô wo, nalé ma ye ve wo mebendé mam mese asu bôte ya Israél.

²³ Wo ye fe kôme tebele a asé: nté wé binyi'a bi mo bibaé, ndame jé ényi'a wo jia a étun.

²⁴ Wo ye yañe tebele ate a nya mvotô mbôma'ane.

²⁵ Wo ye bômane nye a ntem alen a yañe fe mvot e nkôngô ntemba alene te mbôma'ane.

²⁶ Wo ye lui bilondo bi mvot binyin a futi bie e meku'u menyin ma tôbane a mekône menyin ma tôban a tebele.

²⁷ Bilondo bia ye bo bebé a ntemb alen ô ne mbôma'ane tebele, a ba ye some mimbôñ été mfa'a ya volô mbe'ane tebele.

²⁸ Wo ye bo mimbôñ a asé a yañe mie a mvot, mia ye volô mfa'a ya be'e tebele;

²⁹ Wo ye kôme bone bisua bié a bilaé bié a mekobe minla'a mé, a bido'o bisua bié; biôm bite bia ye volô mfa'a mimvean mi woon a wo ye bo bie a nya mvotô.

³⁰ Wo ye bôôé mimmaman mi fembé mi ne ndem ya *mvo'é e zañe Zambe a bôte bé e tebele yôp, a mia ye bômbô éyoñ ése ôsu viam.

³¹ Wo ye bo ébi bifufup a nyaa mvotô: Ja ye boban a mvot é ne mbiban. Biôm bise ya été bia ye bo nlatane jôme jia: tin, nkuk, bikpwas, bibuma a mesam.

³² Mintyaé misaman mia ye bembe je nkuk: mila éfase ji a milale mivok éfase évok.

³³ Ntyaé ôse ô be'e bikpwase bilaa bi too éve'ela ane amande, ékpwas ése é bili bibuma a mesam. Ntyaé ôvok ô bili bikpwas bilaa éve'ela ane amande bibuma a mesam bi too été. Avale te da ye bo mfa'a mintyaé misaman mia ye bembe ébi bifufup.

³⁴ E tine ya ébi bifufup, bilaé bia ye bo binyin, éve'ela ane amande, *élaé é bili bibuma bié a mesame mé.

³⁵ Ebuma ja ye tyebe e mibaé ya mintyaé mi ne bifufube si; a ébuma évok e mintyaé mibaé mivo'o si. Nalé a ne na e mintyaé misaman mia so mfa'a ébi bifufube si.

³⁶ Meton a mintyaé bia ye bo nlatane jôme jia, jia te é too mboon a mvot é ne mbiban, nya mvotô.

³⁷ Wo ye bo belambe zamgbwale ya été; wo ye futi belambe bete na be faé mfa'a ya asu.

³⁸ Menjo ma tyi'i nsañ lambe vôm ô maneya dik a e bone bisua asub da kutane été bia ye boban a nya mvotô.

³⁹ Ba ye belane kili gram mewôm mela a ényin (talañ), mfa'a ya kôme ébi bifufup a biôm mebelane bié bise.

⁴⁰ Fombô'ô a tôñ éve'ela é litebaneya be wo e nkôle yôp.