NKÔLAN 24 - Kalate Zambe Nnomo a Mfefe Mfefé Nkôñelan

Mboone élat

¹ Zambe a nga jô Môze na: Betek e be Nti, womien a Aron, Nadab a Abihu a bôte mewôme zamgbwa ya bemvendé ya Israél a mia ye kute meboñe si ôyap.

² Môze nye étam a ye subu bebé e be Nti, bôte bevok ba ye bo te subu a ékôan bôt ja ye bo te bete be nye.

³ Ane Môze a nga zu kate bôt mejô mese Nti a nga jô. A mintyi'ane mise. Ane bôte bese be nga yalane tyiñe jia na: Mejô mese Nti a kobôya, bia ye bo me.

⁴ Ane Môze a nga tili nkobô Nti ôse; a nga kôlô si ndibe tyé, a lôñe ata'a metuna'a e nkôle si, a telé mekôn awôm a mebaé asu meyoñe awôm a mebaé ya Israél.

⁵ Ane a nga lôme bisoé biziñ ya bôte ya Israél be ve mimvean mi ne ngumba, a tyi'i fe beyôm benyak asu njeñan ya jeñe *mvo'é a nlatane ngbwa a Zambe.

⁶ Ane Môze a nga nyoñe éfase metyi jia a futi me befandé été; ngabe fok nje a nga miame ata'a metuna'a yôp.

⁷ Ane a nga nyoñe kalate élat a lañe nye bôt, ane be nga jô na: Bia ye bo mam mese Nti a jôya a bia ye bo mewôk.

⁸ Ane Môze a nga nyoñe metyi a miame me bôte nyô a jô na: Yenane a metyi ya élate Nti a boya a mia e mbôka'a ya mejô mana mese yôp.

⁹ Ane Môze ba Aron be nga bet a Nadab a Abihu a mewôme zamgbwale ya bemvendé ya Israél.

¹⁰ Ane be nga yene e Zambe Israél: E mebo mé si éfunan ane jôm é ne mboon a ako'o da ngemban abui ba loone safir, éfunane fe ane yôp éyoñ é ne mfubane wé été.

¹¹ A nji ke same wo wé mfa'a benyabôtô ya Israél. Ane be nga bi ôsmesan éziñ ya Zambe: nde be nga di a nyu.

¹² Ane Nti a nga jô Môze na: Bete be ma, nkôle yôp, a tabe valé: Ma ye ve wo bifase *mekok, *atiñ a abendé me nga tili na ô ye'ele be.

¹³ Ane Môze a nga kôlô si ba Yasua, nyô a nga volô bo nye ésaé; ane Môze a nga bete nkôle Zambe.

¹⁴ Nde a nga jô bemvendé na: Yanga'ane bia va, akekui bia ye beta zu koone mia. Mia be Aron a Ur mi ne vôme wua, nge môt éziñ a bili jam da sili nkôman, éyoñe te mia yene be.

¹⁵ Ane Môze a nga bete nkôle yôp, ane *nkut ô nga yandane nkô.

¹⁶ Ane étôto'o Nti é nga tabe e nkôle Sinayi yôp, a *nkut ô nga yandane wô tañe melu mesaman; e môse zamgbwale, Nti a nga loone Môze nsum *nkut été.

¹⁷ Etôto'o Nti é nga yené e mise bôte ya Israél abôbône nkôl ane nduan ja yôñ.

¹⁸ Nde Môze a nyiine nsum *nkut été a bete nkôle yôp. Môze a nga tabe nkôle yôb tañe môse mewôm menyin a melu mewôm menyin.