NKÔLAN 20 - Kalate Zambe Nnomo a Mfefe Mfefé Nkôñelan

Metiñ awôm

¹ Ane Nti a nga kobô mam mana mese a jô na:

² Me ne Nti e Zambe wôé, nyô a nga bo wo ô kôlô Ejipte *nda belo:

³ Te bi bezambe befe ôsu viam.

⁴ Wo ye bo te bi jôm é ne nkpwelan nge bi éve'ela'a ya jôm ése é ne yôp été nge *si nyô si, nge mendim me ne e si nyôna si;

⁵ Te kute bie meboñe si nge kañe bie, amu me ne Nti e Zambe wôé, nyô a ne *aban, nyô a ve *bon melep amu *abé b'ésaa bap, akekui miaé lale nge miaé nyini ya ba ba vini ma,

⁶ ma mvamane fe betoyini ya ba ba nye'e ma a ba'ale metiñe mam.

⁷ Wo ye bo te tote jôé Nti étotetoté, amu Nti a nji yene môt te bijô, nye a tote jôé dé étotetoté.

⁸ Simesa'ane môse *sabat a telé wô étyi.

⁹ Wo ye saé tañe môse minsaman a bo bisaé biôé bise.

¹⁰ Ve wu zamgbwale ô ne môse awo'on mfa'a Nti e Zambe wôé. Te bo avale ésaé éziñ *môs ôte, to'o womien to'o monafame wôé, to'o mona minga wôé, to'o mbo ésaé wôé a ne minga, to'o nyô a ne fam, to'o biyeme biôé, to'o beyeñe bôé be too nlame wôé.

¹¹ Amu Nti a nga té yôb a si a mañ a biôm bise bi ne été môse misaman; e môse zamgbwale a nga wo'on. Ajô te Nti, a nga botane môse *sabat a telé wô étyi.

¹² Semé'é ésoo ba nyua, nalé ate wo ye tabe melu abui e si Nti Zambe wôé a ve wo.

¹³ Te wôé môt.

¹⁴ Te bo *mejian.

¹⁵ Te wup.

¹⁶ Te bôte môt ajô.

¹⁷ Te nyamete *nda môt mia nye mi too, nge nyamete minga wé, nge mbo ésaé wé a ne fam, nge nyô a ne minga, nge éjakase jé nge jôme éziñ jé éfe ése.

¹⁸ Bôte bese be nga yene mindum mi mveñ, zo'oyañ, tyiñe toñ a nkô ô nga kui ôtita. Eyoñ bôt be nga yene mam mete, ane be nga fô'ôban a tebe ôyap.

¹⁹ Ane be nga jô Môze na: Womien kobô'ô bia, ve te kañese na Zambe a kobô bia, bi za mane wu.

²⁰ Ane Môze a nga jô bôte na: Te koone woñ, amu Zambe a nga zu na a ve'ele mia, nalé mia ye ko nye woñ a sa'ale *abé.

²¹ Bôt be mbe be tele ôyap, ve Môze a nga subu nkute bebé, e vôme Zambe a nga too.

Atiñ asu ata'a metuna'a

²² Ane Nti a nga jô Môze na: Wo ye kobô bôte ya Israél na, mi nga yen ane me nga kobô mia me too e yôb été.

²³ Mia ye bo te bi bezambe be ne mboon a silba nge mvot e fefele jam, mia ye bo teke ve'ele bi be.

²⁴ Wo ye lôñe ma ata'a metuna'a a tyia e vôm wo ye ve ma mimvean mi ne ngumba, nalé fe mimvean ya ve Zambe akéva a late nye ngbwa: Beta mbam a mone mbame biyeme wôé; e vôm wo simesane jôé dam, ma ye zu e be wo a botane wo.

²⁵ Nge wo lôñe ata'a metuna'a a *mekok, wo ye bo te lôñe a *mekok me ne mbaan, amu éyoñ wo ba meko'o mete a bivôle biôé, wo ndaman étyi jap (nge na wo ve me mvin).

²⁶ Wo ye bo te bet ata'a metuna'a dam a étune *zen, be za yene soé jôé.