NKÔLAN 11 - Kalate Zambe Nnomo a Mfefe Mfefé Nkôñelan

Awu mintô mi biôm

¹ Ane Nti a nga jô Môze na: Ma zu lôme ébubua ja su'ulan e be Faraoñ a Ejipte, éyoñe te a ye su'ulane suu mia. Eyoñ a ye suu mia mi ke, a ye titan titane mia mi kôlô va.

² Kobô'ô bôte na, fam ése é sili nyô ba je be too biôm bi ne mboon a silba a bi bi ne mboon a mvot; avale te fe minga ase a sili nyô ba nye be too.

³ Nti a nga bo na bôte ya Israél be yene *mvam e be bôte ya Ejipte. Bebo bisaé be Faraoñ a bôte bese ya Ejipte be nga bo na, Môze a bi ésemé abui Ejipte.

⁴ Ane Môze a nga jô na: Avale di nde a jôya: Bebé e zañe alu, ma ye nyiin Ejipte été;

⁵ A mintôle mise e mebialé, mia ye wu e si ya Ejipte, ataté wu Faraoñ a too éto njôô, a kui wu mbo ésaé minga a saé mevôm ba ko'o bidi, a mi mise ya mimbam betit.

⁶ Beta miñyôn mia ye bo e si ya Ejipte ése: Nalé a ngenan te tame boban, a nalé aa ye ke beta boban.

⁷ Ve e be bôte ya Israél, teke to'o ve mvu jia ja ye bôm nge môt, nge tit, ndemben mi yem nkandan Zambe a ve e zañe Ejipte a Israél.

⁸ Eyoñe te bebo bisaé bôé bese ba ye zu kute meboñ asu dam a jô na: Kelek, wo a bôte bôé ba tôñe wo. Mvuse ya valé nje ma ye kôlô. Ane Môze a nga kôlô e *nda Faraoñ a beta ayoñ ase e *nlem.

⁹ Ane Nti a nga jô Môze na: Faraoñ aa ye ke vô'ôlô mia, ndemben bibubua bi mam biam bia ye bo abui e si Ejipte.

¹⁰ Ane Môze ba Aron be nga bo bitua bi mam bite asu be Faraoñ. Nti a nga ve nleme Faraoñ ntip, a nji suu bôte ya Israél be kôlô e si jé.