Mm 21 - Kalate Zambe Nnomo a Mfefe Mfefé Nkôñelan

Mbulan e Yérusalém

¹ Eyoñe bia be be bi nga kandan ane bi nga bete sitima a ke fo'o ve Kôs. Tyé kpwaa, bi nga ke Rôdes. A kôlôya valé, ane bi nga tôlane Patara.

² E Patara, bi nga kooé sitima a kele Fénésie. Ane bi nga bet, a ke mañe yôp.

³ Bi nga kui bebé Sipre. Ane bi nga sa'ale a ke mbo ngale ya ékôte mañ, a kee dulu dangane ôsu mfa'a ya Siri a ke Tir, vôme sitima a nga yiane ka'a mimbe'e.

⁴ Ane bi nga bômbô valé melu zamgbwa. Nalé a too, amu bi nga yene *bebuni. Mfufube Nsisim a nga tindi be be kobô Paul na, a bo te ke e Yérusalém.

⁵ Eyoñe ntabane ya valé ô nga kpwaan, bi nga kôlô:binga, a bongô, be nga ke litane bia; éyoñe be maneya lôte tison ése, bi nga kute meboñe si éwome mañ a bo meye'elan.

⁶ Eyoñe bi maneya ya'ane be, bi nga bete sitima, be ke be nga bulan.

⁷ Bi nga ke ôsu a sondô dulu dangan nkôlane ya Tir, a kui Ptôlémayis. Wôna, éyoñe bi maneya batane bobejañ, bia be be bi nga tabe ngume *môs.

⁸ Tyé kpwaa, bi nga kôlô a ke Sézaré. Vôm ate bi nga bi éyoñe ya ke *nda Filipe, nkatefoé wua ya bôte zamgbwa. Ane bi nga tabe *nda jé.

⁹ A nga bili bindune bengon binyin bi nga bo bi kulu'u mejô.

¹⁰ Wôna, bi too *nda jé melu abui, ane *nkulu mejô ya Yudé a nga suan a too jôé na Agabus.

¹¹ A nga zu yene bia. A nga nyoñe kandé Paul, a tiñeti mo a mebo mé a jô na. Mfufube Nsisim a jô na, môt a nee kandé nyô, e ne Beyude ba ye ka'a nye ana, a kee nye mo meyoñe bikuu.

¹² Eyoñe bi maneya wô'ô mejô mete, ane bia be bobejañ bi nga ye'elane Paul na, a bo te ke Yérusalém.

¹³ Ane a nga yalane bia na: Z'ajôô nde mia yii de, a ve me *nlem atek? Me ne nkôman, saa ve nka'ane ngata'a étam, ve ja'ane awu e Yérusalém amu jôé Nti Yésus.

¹⁴ Amu a nji kômbô wô'ô bia, nde bi nga jô'é a jô na, nkômbane Zambe ô boba'an.

¹⁵ Eyoñe bone melu mete me nga man, bi mane fe kômesan, ane bi nga bet a ke Yérusalém.

¹⁶ Beyé'é ya Sézaré be nga zu e nsamba wongan, be nga ke tooé bia e *nda be Mnason ya Sipre, ñye'é aso ayap.

¹⁷ Eyoñe bi nga kui Yérusalém, bobejañ be nga nyoñe bia abui mevak été.

¹⁸ Tyé kpwaa, Paul a nga ke e *nda be Yakob bia be nye. Vôm ate fe bemvendé bese be nga too.

¹⁹ Eyoñ a maneya batane be, ane a nga kañete be mame mese Zambe a nga bo ézezañe bikul.

²⁰ Bôte be nga wô'ô nkobô Paul be nga ve Zambe duma, a jô nye na: A mojañ, ô ne yen abui betoyini be bôt ba buni be ne Beyude. Bese ba ve ngule ya ba'ale metiñ.

²¹ Ve da, be wô'ôtaneya menyiñ abui ajô dôé. Nye'elane wôé ô ne tindi Beyude bese baa be bikul be too na, be li'i Môze. E too ve ane wo kômbô jô be na, be bo te tyi'i bone babe metye, a bo te beta ba'ale metiñ.

²² Bi bo aya, amu teke selan, ba ye fo'o wô'ôtane na ô ne va.

²³ Bo'o ñhe avale bia ye jô wo. Bi bili bôte benyine va, be nga bo ngaka'a.

²⁴ Nyoñe be, ô bo ntunan, mia be be fufulu. Be ne fe tyeñebane minlô. Bôte bese ba ye yeme na menyiñe ba wôk a ajô dôé me nji bo été. Ve na, wo fe wo jalé metiñ.

²⁵ Ve mfa'a bikul bi buniya, bi nga sili be mintyi'ane miangan, e ne na be tyi betit be nga vebane be bezambe ya bikuu, metyi ya betit ba wu abuk, a mboone mbia be mam.

²⁶ Tyé kpwaa, Paul a nga nyoñe bôte bete benyin a taté ntunane baa be be éyoñe jia. Ane a nga ke *nda Zambe a kate be éyoñe melu ya ntunane ma ye man. A na, mveane wo ye veban asu môt ase ya be be.

Ba bi Paul e * nda Zambe

²⁷ Melu zamgbwale me nto bebé ya man, ane Beyude ya Azi be nga yemelane nye e *nda Zambe, be nga tindi ékôane bôt ése é bi nye.

²⁸ Be nga yôtane be jô'ô na: A mvô'ô Israél, za'a vô'ôlan, e nye le, e môt a wosan ayoñe dangan a metiñe me Môze, a e vôme nyô, a ñye'elan a ye'ele bôte vôm ase, a e be bôte bese. A keya fe kee Begrék e *nda Zambe, a ndamane étyi ya mfufube vôme wu.

²⁹ Valé be yeneya Trôfime môte ya Eféze, baa nye e tison, be buni'i na Paul a nyiñeliya nye e *nda Zambe.

³⁰ Ane tison ése é nga ngômelan, a bôte bese be nga zu ndulu. Ane be nga bi Paul a kuli nye atane ya *nda Zambe, a mane fete mimbé mise.

³¹ Eyoñe be nga zu kate évete bezimbi na, Yérusalém ase a nga ngômelan, be nga jeñe zeneya wôé Paul. Be nga kate nye na: Mvo'é é nji bo tison. Lubulubu a ntoo vôm ase.

³² Ane a nga sulane bezimbi a bivete biap été été, a ke vôme ntañete ô mbe. Eyoñe bôt be nga yene bivete bezimbi a nsamba wop, ane be nga jô'é Paul ébôm.

³³ Ane évete bezimbi é nga ke Paul bebé a bi nye, a ve tyiñe na, be ka'a nye a ngôkop ébaé. A nga kômbô yem, Paul a ne za, a a nga bo jé.

³⁴ Ve ékôane bôt é nga bo zô'é. Môt ase ve kobô avale dé, teke ngume *tyiñ a nyô mbok. Teke ngum éfufub éziñ évete bezimbi é mbe ngule ya bi ajô te. Ane a nga ve tyiñe na, be kee Paul *nda mimbôk.

³⁵ Eyoñe Paul a nga ye bete ôbet wo ke *nda, ane bezimbi be nga jibi be'e nye yôp, amu mbia évô a njete bôt.

³⁶ Amu be nga tôñe be mvus ba zu ba yôtane na: A yian awu.

Paul a kobô bôte ya Yérusalém

³⁷ Eyoñe be nga kômbô ke nyiñeli nye *nda mimbôk été, Paul a nga sili évete bezimbi na: Ye me ne ngule ya jô wo éfia éziñ? A nga yalan a sili nye na: Ye wo yeme kobô Grék'

³⁸ Ye sa wo ô ne môte y'Ejipte a nga sômôlô a kee bôte mintete minyin be be'e atyeñ e *nkôte si?

³⁹ Paul nye na: Ye ma nga? Me ne mone Beyude ya Tarse, afôla ya Silisi, bialébialé ya tison é ne te duma tyôtyoé. Ma ye'elane wo na, va'a me ngule ya kobô bôt.

⁴⁰ Eyoñ a veya nye ngul, ane a nga sili, Paul a nga tebe tetele a febe bôte wo. Ane be nga ku ne kubuk. Ane Paul a nga kobô be nkobô Beyude a jô na: