MINYÔN 4 - Kalate Zambe Nnomo a Mfefe Mfefé Nkôñelan

Minyôn ajô Yérusalém

¹ Jia! or a ntoo teke fe faé! Nya or a maneya tyendé! Meko'o me n'étyi me ntoo mmialan e mebôta ya minjoñe mise!

² Bidima bi bone be Siôn mbie bi mbe tañe nya or, jia! Be ntoo éyoñe ji ane mevie'e me tyia, mboone ya mo me mmé meviek!

³ Ja'ane minkemva'a fe mi be'e minleme benyia a mia nyia bone mebé; ve ngone y'ayoñe dam é ntoo njet ane b'éngutu ya fé.

⁴ Ôyeme nyañebéé wo kabetane nd'anyu jé amu évé. Bon ba sili belet ve teke môt a tyi'i b'ôfufus,

⁵ ba be mbe be ja'a bidi bi ne zam be nga wu zaé minjoñ; ba be nga yaé e bitôto'o mengômesan été be nga bune mekun éyoñe ji.

⁶ Mbia be mam me ngone ya bôte bam me n'anen a dañ *abé ya Sodom nye a kpwééban étun éyoñ te na môt éziñ a nambe nye.

⁷ Benazirieñ bé be mbe mfuban a dañe sut, nalé fe éfumulu a dañe menyañ; menyôle mab me mbe évele a dañe meko'o me n'édima; minsise miab blum ane Safir.

⁸ Ba yené évindi éyoñe ji a dañe mvila'a, teke môt a beta yeme be minjoñ ékôbe jab ja kabetan e bives, é maneya kôt ane nja'a.

⁹ Bôte nkpwaté mekôn ô nga wôé be nga bi ma'a a dañe ba ba wu a zaé. Mbe ba bok a nte'an amu teke bidi ya mefup.

¹⁰ Binga bete, mbe be nga bili nye'an e mo map, bebien be maneya yame bone bap be bo be bidi e beta nju'u ngone y'ayoñe dam été.

¹¹ Nti a keya kui aku'u y'ayaa dé, a sôéya ayaa dé e n'ayôñ. E Siôn, a bo'éya nduan ja di'i nje é maneya mine mimbôka'a mié.

¹² To'o bejô bôte ya si nyô to'o bôt be too émo ji be nji bo nguleya buni na: Môt a wosane ma, nsiñ a ne nyiin e mimbé ya Yérusalém,

¹³ nalé a boban amu *abé bekulu mejô bé, a minkobane betuni bé mbe be nga kuli metyi bezôsôô be bôt ézezañe jé.

¹⁴ Be nga ke ba ndeñe minjoñ ane mindindim, nseme metyi ô too be nyô. môt a too te nguleya nambe mengômesane map.

¹⁵ Be mbe be jô'ô be na: Kôla'an, mia mimvimvin! Kôla'an! Kôla'an! Te nambane bia! Eyoñe ba ke ba tub te yeme vôm ba ke, bikuu bi nga jô na: Be se nguleya tabe be bia ayap.

¹⁶ Nti Emien a maneya tyamelane be a nji fe beta fombô be; be nji semé betuni nge mvamane minnôm.

¹⁷ Mise mangan me nga k'ôsu a bili ate'e zesé mfa'a ya yange mvolan ô nji ke so. Bi too vôme bia mombô, bia fombô nsoon ayoñe bôt e se nguleya nyii bia.

¹⁸ Ba yemelane medaa mebo mangan avale bi se fe nguleya ke mevôme mangan, asu'ulane dangan e ntoo bebé; melu mangan me kpwaneya; yaa, asu'ulane dangan e soya.

¹⁹ Bôte ba kpwe'ele bia be n'avôle mebo a dañe bendôé ya yôp; ba ndeñele bia e minkôle yôp, e vôm ôzôm ô né, ba yabe bia.

²⁰ Nyô a mbe ényiñe jangan, nyôô Nti a ne ñwo'one mbon a biliya e bibé biap. Bi mbe bi jô'ôk ajô dé na: Bia ye nyiñe *meyoñ été bi too éjijine jé si.

²¹ Fônôk a vak, a ngon Edom. Wo ô too si ya Ut! Elaé ja ye fe lôte be wo, wo ye bili bilam a telé womien sôsoé!

²² A ngone Siôn, ékobe jôé é maneya; Nti aa ye fe beta kee wo minkôm. A ngon Edom, ékobe jôé nje a ye ve *melep. A ye kulan *abé dôé.