MARKUS 14 - Kalate Zambe Nnomo a Mfefe Mfefé Nkôñelan

Ba bu émo'o ya bi Yésus

¹ Eyoñe te Pak baa abô'ô fembé é ne teke mvusan bi li'iya melu mebaé, ane Betuni a Beyeme-Bekalate be nga ke ba jeñ aval ane be ne bi Yésus a mefek a wôé nye.

² E nde be mbe be jô'ô na: Sake e *môs abôk, bôte be nlam be za bo éngôngôm.

Ba wo'o Yésus mbon e Bétani

³ Valé Yésus a to e Bétani, e *nda be Simon nzezam, a to e si a ja'ak, e nde minga a nga ke soo nde'e albata, njalan a étua abeñ mbon ôlobinda, nkôman a élo'o naléda, ô to dia abui. Ane a nga bôé nde'e albata, a nga sôé Yésus mbon e nlô.

⁴ Bôte bevo'o b'éziñ be nga wô'ô ôlun a jô na: Abim éndaman ôlobinda di da boban amu jé'

⁵ Amu na ba to ve kuan ôlobinda nyuna tañ mintete mi moné mila, be nga kab nye bingôngole bi bôt! Be nga wô'ô ñhe minga te ôlun.

⁶ Ve Yésus a nga jô na: Jôka'ane nye! Mia tya'a nye *nlem amu jé? A te bo mbamba jam asu dam.

⁷ Amu na mia minzôzoé mi bôt mi too kom ése, a éyoñ ése mia kômbô, mi ne toñe mie; ve mfa'a wom, mi nji tabe a ma kom ése.

⁸ A boya jam a te yiane bo. A maneya sôé ma ôlobinda e nyôl asu ngômesan éjamembime jam, te yene jame te e za bo'ok.

⁹ Ma bele fo'o ane ma jô mia na, e vôm ase ba ye kañete Mbamba Foé e si ése nyuna, e jam minga nyô a te bo di, ba ye fe kañete de, be simesa'ane nye.

Yudas a koñe Yésus

¹⁰ Ane Yudas Iskariôt, wua ya beyé'é awôm a bebaé, a nga ke yene Betuni Benen na a kuane nye e be be.

¹¹ Eyoñ be nga wô'ô nalé, be nga va'a fo'o, a ka'a nye na ba ye ve nye moné. Yudas a nga jeñe ñhe ve mbamba éyoñ a ne kee be nye.

Ngômesan ndiane Pak

¹² E *môs ôsu ya abô'ô fembé é ne teke mvusan, éyoñe ba tyi'i biyeme bi Pak, e nde beyé'é be Yésus ba sili nye na: Za vômô wo kômbô na bi ke kômesane ndiane Pak'

¹³ Ane a nga lôme beyé'é bé bebaé a jô'ô be na: Kelane e tison, mia ye tôbane môt a be'e kobe mendim. Tôñane nye.

¹⁴ E vôm a ye ke nyiin, mi kate miendaa na: Ñye'ele a lôme wo mbañete na: E *nda ma zu di Pak bia beyé'é bam é ne vé'

¹⁵ Môt ate a ye liti mia beta étune *nda mfa'a ya yôp, é bili mam mese nkôman. Vôm ate e nye mi bo bia ngômesan.

¹⁶ Ane beyé'é be nga téé dulu, ve ke kui e tison, be yene fe v'aval ane a nga mane kate be, be mane ñhe kômesane Pak.

Wua ya be mia a ye koñe ma

¹⁷ Eyoñe ngô'é é nga bo, ane Yésus a nga ke, baa beyé'é awôm a bebaé.

¹⁸ Valé be nto e si be ja'ak, e nde Yésus a zu jô na: Bebela fo'o, ma kate mia na: Môte wua ya be mia a ye koñe ma, e nyô a di fufulu a ma.

¹⁹ Be tate ñhe na ba wô'ô ôlun, be nga ke fe ba sili nye wua wua na: Za, ye ma'

²⁰ Ane a nga jô be na: Wua ya beyé'é awôm a bebaé, e nyô a ye futi wo éso bia nye éyoñe jia.

²¹ Mfa'a Mone Môt, nye a ke aval e ne ntilan ajô dé, ve ngo'é môte ate, e nyô a kuane Mone Môt. E nga ye bo mvaé mfa'a wé, nge môte ate a nga ye bo te bialé.

Nyoñan, mi di a nyu

²² Be ngenan be ja'a nalé, e nde a nga nyoñe fembé a botane je, a nga bek a ve be je, a jô'ô na: Nyoñan, nyôle jam nyô.

²³ Ane fe a nga nyoñe *élaé a mane ve akéva a ve be, ane be nga nyu je bese.

²⁴ E nde a nga jô be na: Metyi mame ya élat e me ma, metyi ma sôé e si asu jama bôt.

²⁵ Ma bele fo'o ane ma jô mia na, teke fe na ma ye beta nyu ébuma ya ndi'i woon ji, akekui e môse ma ye nyu je mfefé nyuan Ejôé Zambe été.

²⁶ Eyoñ be nga mane yia jia, ane be nga kôlô valé a ke e nkôle beôlivié.

Yésus a liti na Pierre a ye kate nye

²⁷ Ane Yésus a nga jô be na: Mia bese, mia ye kolé ôbak, amu e ne ntilane na: Ma ye bibi mba'ale mintômba, a mintômba mia ye mane tyamelan, a bo ne miala-mialan.

²⁸ Ve da éyoñ me wômôya, ma ye taté ke mia ôsu e Galilé.

²⁹ Ane Pierre a nga jô na: Ja'a na ôba'a té wo mane kolé bôte bese, ve mfa'a wom, teke fo'o.

³⁰ E nde Yésus a nga jô nye na: Ma bele fo'o ane ma jô wo na, e wo nyô, alu ebien ya den di, nnôm kub a ngenane teke loñ biyoñ bibaé, wo ye kate ma biyoñ bilaa.

³¹ Ane Pierre a nga beta dañe kobô na: Ja'a na bia wo bia ke wu awu da, teke fo'o na ma ye kate wo! Beyé'é bevo'o bese be nga jô fe v'avale da.

Yésus a ye'elan e Getsémané

³² E nde ba zu ke afôla e ne jôé na Getsémané. Nyee beyé'é bé na: Lika'ane mi too vana, nté ma ke ye'elan.

³³ Ane a nga nyoñ Pierre, Yakob a Yôanes a kelee be. E nde metyi me nga ke nye fé, woñ ô mbili nye.

³⁴ Ane a nga jô be na: Olun ô bili ma, awu bebé. Lika'ane vana, mi mombô'ô.

³⁵ Ane a nga subu ôsu mone nté, a su'ulane si, a ye'ela'ane na, nge nalé a ne boban, awolo te e lôte nye ôyap.

³⁶ E nde a nga jô na: Abba, a Tat, ô ne ngule ya bo mam mese, bo'o na e kob nyuna é sa'ale ma ôyap. Ve da sake ane ma kômbô, ve ane womiene wo kômbô.

³⁷ Ane a nga zu, a koone be ôyo. E nde a jô Pierre na: A Simon, wo bele ke ôyo? Ye ô nji bi abime ngule ya bo évé ja'ane ve awolo dada'

³⁸ Momba'an, mi ye'elan, mi za ku *meve'ele été. Nsisim ô ne ôsesa; ve minsôn mi ne atek.

³⁹ Ane a nga beta ke ye'elan a kobô'ô ve avale nkobô dada.

⁴⁰ E nde a nga so, a zu koone be be to ôyo, amu mis me mbe be étua adit, be teke yem e jôm be yalane nye.

⁴¹ Ane a nga zu éyoñe lale a jô be na: Eyoñe ji e nje kelane ôyo, mi wo'on! Abime te da yian. Awolo e kpwaaneya, ba zu ve Mone Môt e mo bebo *abé.

⁴² Kôla'ane si, bi ke, mi lôô e môt a zu koñe ma a ntoo bebé.

Ba bi Yésus

⁴³ A ngenan a kobô'ô nalé, a teme na, Yudas, wua ya beyé'é awôm a bebaé, a vamé a nsamba bôt, be bili minkpwaté mekôn a mimbeñ. Betuni Benen, Beyeme-Bekalate, a Bemvendé e mbe be nga lôme be.

⁴⁴ Môt a nga koñe nye a nga mane ve be e ndeme nyuna na: E môte ma ye wubane nye a latane nye anyu, e nye ate le! Biane nye, mi kee nye, mi tuka'a ba'ale nye!

⁴⁵ Akui a nga zu kui, e nde fe a nga subu Yésus bebé été été, a jô na: A Rabbi! Ve wubane nye a latane nye anyu.

⁴⁶ Ane be nga futi nye mo nyôl, a bi nye.

⁴⁷ E nde môte wua ya ba be nga to valé a nga té nkpwaté mekôn a ba'é mbo ésaé Ntuni Nnen, ane a nga tyi'i nye alo.

⁴⁸ Ane Yésus a nga kobô a jô be na: Ye mia zu bi fanga, ane mia ke soo minkpwaté mekôn a mimbeñ na mia zu bi ma'

⁴⁹ E *môs ôse ya yôp, me mbe e Nda Zambe été va, bia be mia, me ye'ele'e bôt, ve mi nji bi ma. Ve da mintilan mia yiane tôéban.

⁵⁰ E nde beyé'é bese be nga li'i nye, be mane tup.

⁵¹ Mone ndôman éziñ a nga zu a tôñe nye valé, a be'e fo'o sandé éyé koma'ane. E nde be nga bi nye.

⁵² Ane a nga wua sandé éyé a tub nsoé nalé ne keñelé.

Yésus a ne aba mejô

⁵³ Ane be nga kee Yésus e be Ntuni Nnen. E nde Betuni Benen, a Bemvendé a Beyeme-Bekalate, be bese be nga mane sulan.

⁵⁴ Pierre a nga zu a tôñe nye ôyab mvus akekui nseñe be Ntuni Nnen, a nto si valé baa bebo bisaé, be woba'ane nduan.

⁵⁵ Betuni Benen a nsamba bekobô mejô ôse be nga ke ba jeñe mam ya bo'olô Yésus na be wôé nye, ve be teke yene jam éziñ.

⁵⁶ Abui bôt e nga zu fo'o bo'olô nye a bibôta mejô, ve viane ke kui na be nto metyiñe metyiñ.

⁵⁷ E nde bôte b'éziñ be nga tebe, a bo bengaa ba ke ba laane minsos, be jô'ô na:

⁵⁸ Ke bi nga wô'ô nye a jô'ô na: E ma nyô, ma ye tyame Nda Zambe é ne nlôñan a mo me bôte nyô, a mvuse melu mela, ma ye beta mane lôñe Nda fe, teke é to ésaé ya mo me bôt.

⁵⁹ Ve bebo'olô bebiene fe teke kui tyiñe jia.

⁶⁰ E nde Ntuni Nnen a kôlô si a tebe e zañe bôt, a sili Yésus na: Ye wô teke yalane jam éziñ e mame bôte bana ba bo'olô wo'

⁶¹ Nye va, a to v'évô, teke yalan to'o jam éziñ. Eyoñe baa, Ntuni Nnen a sili nye na: Ye wo ô ne Mesie, Mone Zambe'

⁶² Ane Yésus a nga jô na: Ma fo'o me ne nye: A mia ye yene Mone Môt a too si e mbo nnôme be Nyô a dañ ngu, a za'ak a minkute ya yôp.

⁶³ Ane Ntuni Nnen a nga mane nyab mengômesane mé a jô'ô na: Jé éfe fo'o bia beta jeñe bebo'olô'

⁶⁴ Ke mi wô'ôya ane a ta Zambe. Mi lôô aya? E nde bese be nga yalane na: A yiane wu.

⁶⁵ Bôte bevok be taté ñhe na ba tuii nye menden, a ba ba buti nye mis, be bibi'i nye minkasa a jô na: Kobô'ô ñhe, a *nkulu mejô! Bebo bisaé be nga bibi fe nye mebaé.

Pierre a kate Yésus

⁶⁶ Mbôle Pierre a nga to e si mfa'a ya nseñ, e nde mbo ésaé minga wua ya be Ntuni Nnen a nga suan.

⁶⁷ Eyoñ a yeneya Pierre a woba'ane nduan, ane a nga fombô nye ne tooññ a jô na: Ke wo fe ô mbe a môte ya Nazarét a ne Yésus!

⁶⁸ E nde Pierre a nga kat, nye na: Me ne teke yem nge wô'ô ki e jôm ébien wo jô! Ane a nga kôlô valé a ke nseñ mfa'a y'atan. E nde nnôme kub a nga loñ.

⁶⁹ Ane mbo ésaé minga a nga yene nye, a nga beta fe kat e bôte be nga too valé na: E môte nyô a ne wua ya été.

⁷⁰ E nde Pierre a nga ba'alane kat. Mon étun a lôté, ane bôte be nga tele valé be fe ba zu jô Pierre na: Bebela émien, ô ne môte wua ya été, amu ô ne fe môt ya Galilé.

⁷¹ Ane a nga taté na a kane ngana a kalane minkale na: Me nji yeme môte mia jôô nye le!

⁷² Eté été, ane nnôme kub a nga loñ, éyoñe baa. E nde Pierre a zu simesan ajô Yésus a nga jô nye na: Valé nnôme kub a ngenan teke loñ biyoñe bibaé, wo ye kate ma biyoñe bilaa. Ane a nga taté na a yi du.