LUKAS 22 - Kalate Zambe Nnomo a Mfefe Mfefé Nkôñelan

Eso'o ya wôé Yésus. Yuda a koñe Yésus

¹ Abô'ô belet e nji bi mvusu ba loone Pak valé é ntoo bebé.

² Minlô betuni a *beyeme bekalate be mbe be jeñek avale be ne bo na Yésus a wu; amu be mbe be koo bôte woñ.

³ Ve e too na Satan a nga nyiine be Yudas, be lo'one nye jôé afe na Iskariôt, e nye a mbe wua ya beyé'é awôm a bebaé.

⁴ A Yudas a nga ke kui *tyiñ a minlô betuni a bivete bezimbi, avale *zen a mbe kuane nye e be be.

⁵ Be nga vak a kui tyiñe na ba ye ve nye moné.

⁶ A nga kañese a taté na a jeñe mbamba éyoñ a ne kalane be Yésus jama bôt teke yem.

Ntelane tawôlô Nti

⁷ E môse belet é nji bi mvusu ô nga kpwaan, e ñwô be nga yiane tyi'i éyeme Pak,

⁸ a Yésus a nga lôme Pierre a Yôanes a jô'ô na: Kela kômane bia Pak, nalé ate bia ye di nye.

⁹ Be nga jô nye na: Wo kômbô na bi kôme nye vé'

¹⁰ A nga yalane be na: Mi lôô éyoñ mi nyiineya e tison, môt éziñ a be'e nde'e mendim a ye tôbane mia; tôñane nye e *nda mia ye yen a nyi'in,

¹¹ a mia ye jô mie ndaa na: Masa a jô wo na: Aba *nda bia be beyé'é bam bia ye di Pak e ne vé'

¹² A a ye liti mia beta étune *nda yôp, é too nkôman, e nne mia ye kôme Pak valé.

¹³ Be nga ke a koone mam avale a nga jô be a be nga kôme Pak.

¹⁴ Eyoñ awolo e nga kpwaan, a nga tabe tawôlô baa be minlôman.

¹⁵ A nga jô be na: Me nga dañe kômbô di Pak nyô bia be mia, te na me tôbane njuk,

¹⁶ amu ma jô mia de na: Ma ye bo te beta di je v'akekui é jalébaneya éjôé Zambe.

¹⁷ A nga nyoñ *élaé, a ve akéva a jô na: Nyoñan *élaé ji a kabane je e zañe jenan;

¹⁸ amu ma jô mia de na, ma ye bo te beta nyu jôme ja so ébuma ndi'i woon, v'akekui éjôé Zambe é soya.

¹⁹ Wôna, a nga nyoñe fembé; a éyoñ a maneya ve akéva, a nga be'e je a ve be je a jô'ô na: Jôme ji é ne nyôle jam, e nje é ne mveban asu denan; bo'one jame di mi simesa'ane ma.

²⁰ Nalé fe a nga nyoñ *élaé, mvuse ndian, a ve be je, a jô'ô na: *élaé ji é ne mfefé élat e metyi mam, e mme me nga mialan asu denan.

²¹ Ve da mi lôô: Nyô a kuane ma bia nye bi ne tawôlô nyô.

²² Mona môt a ke avale ntyi'an ô né; ve ngo'é môt ate nyô a ne *zen a kuabane je.

²³ A be nga taté na ba silane minsili bana ba bevok na za a mbe nyô ya be be a nga ye bo jame te.

Za a dañ'

²⁴ Bisô bi nga bobane fe ézezañe jap ajô: Za ya be be a nga yiane yenébane Nyô a dañ'

²⁵ Yésus a nga jô be na: Bejô bôte ya *meyoñ be koo me minlô yôp a ba ba jôô me ba lobane na bezambe.

²⁶ E nji bo nalé e be mia. Ve nyô a ne beta môt a bo'o nyô a dañe tyôtyoé, a nyô a jôô a nyoñ éto nyô a ne mbo ésaé.

²⁷ Amu za a dañ, ye nyô a too tawôlô, ye nyô a ne mbo ésaé? Ye sa nyô a too tawôlô? Ve ma, me ne ézezañe jenan ane mbo ésaé.

²⁸ Mia mi ne ba be nga jibi a ma e *meve'ele mam été;

²⁹ ajô te ma telé éjôé asu denan aval Esaa wom a nga telé éjôé asu dam.

³⁰ Nalé ate mia ye di a nyu e tawôlô wom éjôé jam été, a na mi tabe bito bi njôan, a tyi'i *meyoñ awôm a mebaé y'Israél mejô.

³¹ A Simon! A Simon! Satan a nga kômbô mia asu ya se'ese mia ane avute fôn.

³² Ve me nga ye'ele ajô dôé na mbunane wôé ô bo te tek, a wo éyoñ ô bulaneya be ma, yemete'e bobenyoñ.

³³ Pierre a nga jô nye na: A Nti, me ne nkômesane na bia wo bi ke *nda mimbôk a awu.

³⁴ A Yésus a nga jô na: A Pierre, ma jô wo de na: E nnôme kup a ye bo te loñe den te na ô bene biyoñ bilale na ô nji yeme ma.

³⁵ A nga beta jô be na: Eyoñe me nga lôme mia teke mfek, teke ékpwaé, nge besilefas, ye mi nga jeñembane jôm éziñ? Be nga yalane na: Teke jôm.

³⁶ A a nga jô be na: V'éyoñe jina ñhe nyô a bili mfek a nyoñe wô, avale da nyô a bili ékpwaé, a nyô a nji bi nkpwaté mekôn, a ku'ane ngômesane jé a kuse wua.

³⁷ Amu ma jô mia de na: E jam e ne ntilan da yiane tôébane be ma na: A nga lañeban e bebo mbia be mam été. A e jam da fombô ma e nga ke asu'u dé.

³⁸ Ane be nga jô na: A Nti, tame yen minkpwaté mekôn mibaé. A a nga jô be na: Abime te da yian.

Gétsémané

³⁹ Eyoñ a kuiya atan, a nga ke nkôle beôlivié avale a mbe a bo'ok. Beyé'é bé be nga tôñe nye.

⁴⁰ A kuiya vôm ate, a nga jô be na: Ye'ela'an, nalé ate mia ye bo te nyiin e *mebôbela'a été.

⁴¹ Wôna a nga kandane be, bebé ane môt a wua akok, a kute meboñe si a ye'elan,

⁴² a jô'ô na: A Esaa wom nge wo kômbô nalé, kele ma *élaé jina ôyap. Ve jame da na e nkômbane wôé e ñwô ôte ô boba'an saa ñhe éñwom.

⁴³ Ane éngele a nga so nye yôp asu ya ve nye ngule nyôl.

⁴⁴ Mbôlô biyebe bi nga bili nye e nde a mbe a ye'ela'an éyoñ ése, a édudu'u jé é nga bo ane bibañe metyi bia toé si.

⁴⁵ A nga kôlô si meye'elane mé a zu be beyé'é e mbe be mbe ôyo amu ôlun,

⁴⁶ a a nga jô be na: Mia ke ôyo amu jé? Kôla'ane si, ye'ela'an, nalé mia ye bo te nyiine *mebôbela'a été.

Mbiane Yésus

⁴⁷ A ngenan a kobô'ô ateme na ndula bôt a nga suan a nyô a mbe a loba'ane Yudas, wua ya b'awômô a bebaé, a wulu'u be ôsu. A nga subu Yésus bebé na a latane nye anyu.

⁴⁸ Yésus a nga jô nye na: A Yudas ye wo koñe Mona môt a nlatane nye anyu!

⁴⁹ Ba ba be Yésus be mbe nsamba, ñyenan be nga yene jam e mbe na da zu boban, be nga jô na: A Nti, ye bia ye bôm a nkpwaté mekôn'

⁵⁰ A wua ya be be a nga ba'é mbo ésaé njôô betuni a tyi'i nye alo ya mbo nnôm.

⁵¹ Ve Yésus a nga nyoñe nkobô a jô na: Teba'ane valé! Wôna a nga nnambe alo môt ate a bo nye *mvo'é.

⁵² Wôna Yésus a nga jô minlô betuni, bivete beba'ale ya *nda Zambe a bemvendé be nga zu wosane nye na: Mia te zu a minkpwaté mekôn a mimbeñ ane betitane ze mimfaka.

⁵³ Melu mese bia be mia bi mbe e *nda Zambe, a mi nji ke bi ma. Ve vana a ntoo awolo denan a ngule dibi.

Pierre a kate Yésus. Yésus asu ékôane betyi'i mejô y'ayoñ

⁵⁴ Eyoñe be biya Yésus, be nga kee nye a kui nye e ndaa évete betuni. Pierre a mbe a za'a ôyabe mvus.

⁵⁵ Be nga kôbane nduan ézezañe nseñ a tabe si. Pierre a nga tabe ézezañe jap.

⁵⁶ Mbo ésaé minga éziñ a nga yene nye a too nduan ôsu, a nga fombô nye a jô na: E môte nyôna fe a mbe e nsamba wé.

⁵⁷ V'a nga kate de a jô na: A minga me nji yeme nye.

⁵⁸ Obe aboñ ô lôteya, môte mfe a nga yene nye a jô na: Wo fe ô ne e nsamba bôte bete. Pierre a nga jô môt ate na: Me nji bo été.

⁵⁹ Bebé awolo e lôteya, mfe a nga yemete na: Teke vaa na e môte nyô a mbe fe e nsamba wé amu a ne môte ya Galilé.

⁶⁰ Pierre a nga yalane na: A wo môt, me nji yeme jam wo kômbô jô. Awolo te ebien, a ngenan a kobô'ô, nnôme kup a nga loñ.

⁶¹ E nde Nti a nga kôñelan a fombô Pierre. A Pierre a nga simesane nkobô Nti a nga kobô nye na: Den te na nnôme kup a loñ, wo ye kate ma biyoñe bilaa.

⁶² A nga kui atan, a atane wé, a nga yôn abui.

Ba kpwe'ele Yésus

⁶³ E bôt be nga bili Yésus ve zu kpwe'ele a bôme nye.

⁶⁴ Be nga solé nye asu a sili nye minsili be jô'ô na: Kula'an asoé ba, za a te bibi wo'

⁶⁵ A be nga kobô nye *minkobô mi ébiasé mife.

⁶⁶ Eyoñe *môs ô nga kui, nsamba bemvendé ya ayoñ, minlô betuni a *beyeme bekalate, be nga sulan a bo na be zuu Yésus asu ékôane betyi'i mejô.

⁶⁷ Be nga jô na: Nge ô ne Krist, kate bia de. Yésus a nga yalane be na: Nge ma kate mia de, mia ye bo teke de buni,

⁶⁸ a nge ma sili mia minsili, mia ye bo teke yalan.

⁶⁹ Ataté éyoñe ji, Mona môt a ye tabe e mbo nnôme Ngule Zambe.

⁷⁰ Bese be nga jô na: Nde ô ne ñhe Mone Zambe nga? A a nga yalane be na: Mia jô nalé me ne nye.

⁷¹ Ane be nga jô na: Amu jé bia beta yi bengaa? Bia te de wôk biabebien e so'ok anyu dé.