LEVITIK 21 - Kalate Zambe Nnomo a Mfefe Mfefé Nkôñelan

Metiñ ma fombô betuni a ényiñe jap

¹ Nti a nga jô Môze na: Kate bone b'Aron be ne betuni na: Ntuni a nji yiane ve émiene mvin a nnambane mbime môte wé.

² Vengevenge ve bôt be ne fo'o émbé: nyia, ésaa, mona fame wé, mona minga wé, monyañ,

³ a kale jé é ngenan éndun é too nye bebé, éyoñ é ngenan te ke aluk; v'ane nguleya ve émiene mvin be kal éte.

⁴ Ezezañ ya bôte bé, *ntuni a bili ésaé nteb'ôsu; ajô te a nji yiane ve émiene mvin amu nalé a ye samele nye.

⁵ Eyoñ awu e né, betuni be nji yiane sôté éfase nlô nge tyeñe zel e mefefele mebaé y'anyu, nge tene mimbak e menyôle map.

⁶ Ba ye bo étyi asu Zambe wob a bo te ndaman étyi ya jôé Zambe wop, amu mbe ba ve Nti mimvean mia di'ibane nduan, bidi bi Zambe wop: ajô te ba yiane bo étyi.

⁷ Ba ye bo te lu'u minga ébamba nge nyô a maneya same, nalé fe ba ye bo te lu'u minga nnôm a te suu: amu *ntuni a n'étyi asu Zambe wé.

⁸ Môt y'Israél ase a ye semé étyi ya betuni amu mbe ba liti ma bidi mia ve Zambe wônan; ajô te *ntuni a ye bo étyi mfa'a wé amu me n'étyi, ma, Nti, me nga tobe Israél na a bo ayoñ e n'étyi.

⁹ Nge ngone *ntuni ja samele ébien a mboon ébamba, a samele ésaa: ajô te ba ye di'i nye nduan.

¹⁰ Ntuni nnen a ne évete betuni; a nga teléban étyi a ñwo'one mbone *môs a nga taté bisaé bié, a ne nguleya jaé mengômesan me n'étyi, ajô te a nji yiane tabe nsoé nlô, nge nyabe mengômesane mé.

¹¹ A ye bo te subu mbime bebé; nge ve émiene mvin to'o éyoñ ésaa nge nyia be wuya.

¹² A ye bo te kui atane ya vôme wom a n'étyi, nge ndaman étyi ya e ndaa Zambe wé: amu a nga teléban étyi a mbon ba wo'o ya Zambe wé. Ma me ne Nti.

¹³ A ye lu'u v'éndune ngon.

¹⁴ A ye bo te lu'u nkus nge minga be nga suu, nge minga ébamba nge nyô be maneya samele, ve a ye lu'u éndune ngone ya ayoñe dé.

¹⁵ A za bi mvoñe bôt é ne te *mfuban ézezañe bôte ya ayoñe dé: amu ma me ne Nti a telé nye étyi.

¹⁶ Ane Nti a nga kobô Môze a jô nye na:

¹⁷ Kobô'ô Arone na: É miaé mi bôt mia zu, teke môt éziñ ya mvoñe jôé a bili éyem éziñe nyôl a ye bi nkañesane ya subu bebé ata'a metuna'a na a ve ma bidi biam.

¹⁸ Teke ñyeyem éziñ wo ye nyoñeban ésaé éte: to'o ndindim, mfeñke abo, nyô jôé dé é bili éyem éziñ nge na abo, wo, jôm jia y'été é ne ayab a lôte ji évok.

¹⁹ Nyô abo nge wo bi ne mbu'an;

²⁰ Nyô a ne akule mvus nge ôwuluwula, nyô a kone mis, nyô a kone mintyañ, nyô a kone mebata nyôl, nge nyô a ne *miak.

²¹ Te ke wua ya mvoñe bôte *ntuni Aron a bili éyem éziñe nyôl a ye subu ata'a metuna'a bebé na a ve Nti mimvean mia di'ibane nduan; amu a bili éyem éziñ, nde a nji bi nkañesane ya bo bisaé *ntuni a yiane bo.

²² A ne nguleya di metuna'a me ne ma mvean, nalé fe bidi bia dañ étyi a bi bi n'étyi.

²³ V'amu a ne ñyeyem, a ye bo te subu bebé éndelé é tyele e zañe *nda y'étyi, nge subu a kui ata'a metuna'a. A nji yiane ndaman étyi ya *nda jam é n'étyi amu me ne Nti a ma ma telé betuni étyi na be bo m'ésaé.

²⁴ Ane Môze a nga kalane Aron mejô mete, e bone bé a bone b'Israél bese.