HÉBRE 4 - Kalate Zambe Nnomo a Mfefe Mfefé Nkôñelan

Hé 10:35-39; Eza 26:3

¹ Ajô te, *nkoone woñ, a za bo na, éyoñ ngaka'a ya nyiin awo'one dé éte é né, môt éziñ ya e be mia a ye yené na, a boya te nyiine de.

² Amu bi nga wô'ô Mbamba Foé avale fe ane bôte bete, ve foé be nga wôk é nji ve'ele bo mvolan e be be. Amu éyoñ be nga wô'ô je, be nji nyoñe je a mbunan.

³ E bia bi buniya, bia nyiin awo'one te été nde Zambe a nga kobô a jô'ô na: Amu me nga kane ngana ayaa dam été, bia ye kôme yen nge ba ye nyiin awo'one dam été. Akôsa bo ésaé é nga mane boban a so mbôka'a ya *si nyô.

⁴ Amu vôm éziñ, e mimfufup mintilan été, e ne njôban e môse zamgbwale na: Zambe a nga wo'one bisaé bié bise e môse zamgbwale.

⁵ A beta jô avale da e mintilan été na, ba ye bo te nyiin awo'one dam été.

⁶ Nde amu ba be nga taté wô'ô Mbamba Foé be nji nyiine de été amu melo map, ve bôte bevok be ne nkañesane ya nyiine de été.

⁷ A beta telé *môs ôfe den, a so ayap e mvus e kalate David bi maneya yen a jô'ô na: nge mia wô'ô tyiñe jé te boone minleme mienan ayet.

⁸ A na, nge Yasua a to ve bôt awo'on Zambe a nga tiñeti, ve a nga ye bo te beta kobô mvus éte ajô *môs awo'on ôfe.

⁹ Ajô te *môs awo'on ôfe ô li'iya, wo funane môse zamgbwale, mfa'a bôte be Zambe,

¹⁰ amu nyô a nga nyiin awo'on dé été, nye fe a nga wo'on ésaé jé, aval a ne Zambe a nga wo'on énjé.

¹¹ E mbo'one ñhe avôle ya nyiin awo'on te été, nalé ate mbia éve'ela ate a ye bo te dutu môt éziñ e nkuan été.

¹² Amu mejô me Zambe me ne vevee a ngu. Me ne akap, a dañe ékpwelé é ne meyo mebaé. Ma tulan a kui vôm ényiñ a *nsisim ba tôban, ja'ane mua me nyôl a foñe bives. Ma yemelan minkômban a minsimesane ya nleme môt.

¹³ Teke nte'an jôm éziñ ô solô e mise me Zambe. Mame mese me ne soé e mise mé. Mese me bôô kayale asu dé, a nye ate bia ye yalane nye ajô mimboone miangan. Nde amu bi bili beta éwôlô Ntuni, nyô

Yésus Krist a dañe Minlô betuni ya nnôm élat

¹⁴ a nga tulane yôp, Yésus, Mone Zambe, e mbiane mmemane mbunane ngu.

¹⁵ E beta *ntuni bi bili, a nji bo nyô a kate yem ate'e dangan. Emien a nga tôbane *meve'ele mevale mese ane bia. Ve a nji bo *abé.

¹⁶ Ajô te e nsuba'an éto njôane ya mvame bebé a ndi minlem, ane bia ye kooban éngôngo a yene *mvam, nde bia ye nyoñe mvolan éyoñ ja yian.