HÉBRE 13 - Kalate Zambe Nnomo a Mfefe Mfefé Nkôñelan

Melep mevale meva

¹ Nye'an ane bobenyañ ô yené'é zañe jenan.

² Te vuane mbamba nyoñane bôt. Amu a wô, bôt bevo'o be nga nyoñ beéngele menda map, be te yeme nalé.

³ Mi simesa'ane ba be ne *nda mimbôk, aval ane nge mia bebien mi ne mimbôk, mia be be. Simesa'ane fe ba ba wu ékpwe'ele, aval ane nge mia fe le mia tôban ékpwe'ele.

⁴ Aluk e bii ésemé e be bôte bese, a énoñ aluk é bo'o te mvin. Amu Zambe a ye tyi'i bôte bijabô mejô a bebo *mejian.

⁵ O zañe moné ô bo'o te jôô mia. Va'an abime mi bili, amu Nti émien a nga kobô na! Teke me ye'e suu mia étam, teke me ye'e li'i mia!

⁶ Amu ajô te, a ndi *nlem ése, bi ne jô na: Nti a ne mvolane wom, maa ye ko jôm éziñ woñ, môt a ye bo me jé.

⁷ Simesa'ane beliti zene benan be nga kate mia mbamba foé. Fomba'an asu'ulane ya binyiñe biap. Vuane mbunane wop.

⁸ Yésus Krist a ne avale da angô'é a den. A ye tabe nalé nnôm éto.

⁹ Te yalane feñ amu abui miñye'elan mia so atan. Amu e ne mvaé na, *nlem ô bi ngu a zene *mvam, saa a bidi; mbie bite bi nji bo mvolan e be ba be nga ba'ale a tôñe mezene mete.

¹⁰ Bi bili ata'a metuna'a, nde bebo bisaé ya été be nji bi ngule ya nyoñe bidi biap été.

¹¹ Amu minsôn betit mmie beta *ntuni a wô'ô kee metyi vôm a ne étyi mfa'a metuna'a ya *abé mia di'iban e nlam atan.

¹² Amu ajô te Yésus, mfa'a ya fubu ayoñ a metyi mé, émien a nga wô'ô mintaé *mbé ya nlam atan, a be'e ôson wé,

¹³ e nkuane atan ya nlam a tôbane nye, bi be'e ôsone vié.

¹⁴ Amu bi nji bi nlam ô too kom e si va. Ve bia jeñe nlam wo ye zu.

¹⁵ Amu nye, e mva'ane Zambe étyi'a nkañan éyoñ ése, nalé a ne na ébuma ya biyaé.

¹⁶ Ve da vuane mbamba mimboon a akap, amu avale mimveane te nde Zambe a yene mvaé.

¹⁷ Mi va'a betebe ôsu benan mewôk a tabe e njôane wobe si. Amu ba mombô éyoñ ése ajô minsisime mienan,

¹⁸ nde ba ye yalan ajô ya été. Bo'one na be bo jame te a mevak, saa a ntat, nalé a ye bo teke mvolan mfa'a wônan, ye'elan ajô dangan. Amu minleme miangan mi ne fo'o *mfuban, a nkômbane ya wulu ane da yian éyoñ ése.

¹⁹ Bo'on, ma sili mia de éyoñ ése, nde ma ye ji'a suuban a zu e be mia.

Minkômban a mebatan

²⁰ Nde Zambe ya *mvo'é, nyô a nga vaa beta mba'ale mintômba miñwuan a metyi m'élat é too nnôm éto, Nti wongan Yésus,

²¹ a va'a mia ngu e mfa'a jam ese e ne mvaé na mi bo nkômbane wé, a bo'o be bia e mam a yene mvaé amu Yésus Krist nyô a nee duma nnôm éto a nnôm éto. Amen!

²² A bobejañ, ma sili mia na, mi jibi mejô ma lebe mia ma, amu ma te tili mia ômes ômes.

²³ Yemane na monyañ wongan Timôté, be suuya nye. Nge a ji'a so, ma ye zu yene mia bia nye nsamba.

²⁴ Bata'ane ma betebe ôsu benan bese, a mimfufube mise. E ba ya Italie ba batane mia.

²⁵ Mvam é tabe'e e be mia bese.