HÉBRE 12 - Kalate Zambe Nnomo a Mfefe Mfefé Nkôñelan

Njibane meve'ele

¹ Ajô te bia fe, amu bi ne mbôma'ane a abime abui bengaa te, e ñwu'ane mbe'e ôse a *abé da bômane bia e si, a mate mbi a njiban ôse ya *meve'ele me ne bia mveban,

² bi lôbô'ô nyô a ne atata'a ya mbunan wongan a nyô a kee wô e vôme ya jaléban, e ne na, Yésus. Nye ate a nga ben mevak me mbe nye ôsu a jibi Krôa, a biasé ôson, a su'ulane tabe éto njôane Zambe.

³ Yaa, mi simesa'ane nyô a nga jibi abime mewosane te mfa'a wé e señe bebo *abé, ane a ne bo te li'i mia ntya'an a nyôle ne botok.

⁴ Mi ngenane te jibi a kui nkulane metyi: éyoñe mia wosan *abé.

⁵ Mi vuaneya ntômôlan ba tômôlô mia ane bone na: a mone wom, te biasé nlebane Nti, te bili atek éyoñ a komekane wo.

⁶ Amu Nti *a lep e nyô *a nye'e, a yaa e mon ase a nyoñ mfa'a wé émien.

⁷ Amu ajô ya nye'elan nde mia jibi de mintaé. Zambe a bo mia ane *bon. Mone *mbé nye ésaa wé a ne te lep'

⁸ Nge mia bo te nyoñe ngab *melep ane *bon, wôna mi ne bone *mejian, saa benya bonô.

⁹ Bi nga bi bebiaé bangane ya minsôn, ane beye'ele bangan be bôme bia, abim avé bia yiane wô'ô Esaa ya minsisim, a nyoñ ényiñ e be nye'

¹⁰ Mfa'a wop a mbe ajô ya étun éyoñ, aval ane *zôsôô wop a mbe, nde be nga lebe bia. Ve mfa'a wé a ne mfi wongan, mfa'a ya kôôé bia étyi jé.

¹¹ Eyoñ bia nyoñe *melep, bia ye yen été été na, a ne jam ôlun, saa mevak. Ve *melep me wô'ô su'ulane ve ba ba nyoñe me ébuma ya *mvo'é, a e ji *zôsôô.

¹² Beta'ane mo menan me joléya e yôp a bo ngu, a meboñe menan ma nyeñeban.

¹³ Bo'one zene mebo jenane *zôsôô, nalé ma ye bo te yemele, ve yet.

Mbane ya wulu ane bekristen

¹⁴ Va'ane ngule ya tabe bôte bese *mvo'é, a bo *mfuban, nge nalé momo, teke môt a ye yene Nti.

¹⁵ Momba'an, môt éziñ a za sube mvame Zambe. Nkañ éziñ ô ne ayô ô bo'o te faa e zañe jenan, amu zô'é ja ndamane nsamba bôt.

¹⁶ Momba'ane na, môte bijabô a bo te yené e be mia, nge ndaman étyi; aval ane Esô, nye a nga kuan éto ntôle jé, amu éyaseyas ésua mfiañe jia.

¹⁷ Amu mia yeme na, éyoñ a nga beta kômbô nyoñ ébotan, a nga sup, a teke *zen éziñ ya tyendé mfa'a wé é nga yené, akôsa bo meye'elan a nyône wé.

¹⁸ Mi nji ke subu bebé e nkôle be mbe nguleya nnambe ô yôñe nduan, teke dibi, teke ôkôs,

¹⁹ teke nloñane toñ, teke ñyôtane *minkobô avale ba be nga wô'ô wô be nga sili na be bo te beta tote be v'éfia jia.

²⁰ Amu be mbe te ngule ya jibi abendé e te na: Ja'ane ve tit nje ja ye nnambe nkô, ja ye wôéban.

²¹ A jame te e mbe étua angôndô avale Môze a nga kui vôme ya jô na: Ma wô'ô étua angôndô a fô'ôban.

²² Ve mi subuya nkôle Siôñ bebé a nlame vevea Zambe, Yérusalém ya yôp e be bizu'u beéngele,

²³ nsula'an abô'ô mintôle mi *bon, mbe môé map me ne ntilane yôb été e be Zambe, *ntyi'i mejô ya bese, a minsisime bezôsôô be bôt be maneya bobane nya *mvo'é.

²⁴ E be Yésus, ntebe zañe ya mfefé élat, a metyi me nga kui, ma beta kobô mvaé a lôte ma me Abél.

²⁵ Taba'ane ntyele ya bene wô'ô nyô a kobô mia. Amu nge be nga bo te sa'ale *melep, éyoñ be nga bene wô'ô nyô a tyeñele be *si nyô, kô fé bia ye bo te sa'ale *melep, nge bia bo te wô'ô nyô a kobô bia e yôb été'

²⁶ Nyô tyiñe jé é nga fô'ô si a kobô de na: A li'iya éyoñe jia ja su'ulan, ma ye fô'ô, saa ve si étam, ve nalé fe yôp.

²⁷ Mejô mefe ma beta liti na, e biôme bise bi ne ntéan bia fô'ôsan, bia ye vas. Nalé jôm é ne te fô'ôsan ja ye tabe.

²⁸ Amu bia nyoñ ayoñ e ne te fô'ôsan, e ntuka'a biane *mvam éte. Amu *mvam éte, e mbo'one Zambe ésaé a éjoté nyô a woñ aval a ye yene mvaé.

²⁹ Amu Zambe wongan a ne nduan ja di'i.