GALATI 4 - Kalate Zambe Nnomo a Mfefe Mfefé Nkôñelan

Saa fe * ôlo , ve nti

¹ Nde ma jô na: Nté ôse nyoñ élik a ngenane mongô, baa *ôlo be nji ve'ele selane mfa'a éziñ, akôsa bo na nye a ne miene ya biôme bise.

² Ve a ne éjôé beba'ale biôm a betoñ bé si akekui éyoñ ésaa wé a nga tiñeti ja kpwaan.

³ Avale te fe bia, éyoñe bi nga to bongô, bi nga too éjôé mame ya *si nyô si, bi nga too fo'o belo.

⁴ Ve éyoñ éyoñ é nga kôme kpwaan, Zambe a nga lôme mone wé mbialane be minga, a too éjôé ya metiñe si,

⁵ nde te a ye kôté e ba be mbe metiñe si, ane bi ne nyoñ éto *bon.

⁶ Mi ne fo'o *bon. Zambe a nga lôme nsisime Mone wé minleme miangan été ñwô wo yôtane na: Abba, e ne na, Tate!

⁷ Ajô te ô nji fe bo *ôlo, ve mon. Aval ane mon, ô ntoo nyoñe ngab amu Zambe.

Ntyelane nleme yôb Paul ajô mbunan Beyude

⁸ Melu mvus, éyoñe mi mbe te yeme Zambe, mi mbe belo bezambe, mbe bete, a mbialane wop, be nji bo be.

⁹ Ve éyoñ mi nga yeme Zambe ji, nge na Zambe a nga yeme mia, mia beta bulane belo ya biôme bi ne atek a azoé, nkômbane ya beta bo belo bab aya'

¹⁰ Mia kañe mimôse miziñ, bengon b'éziñ, biyoñ a mimbu.

¹¹ Mia bo ma me ko woñe na, ésaé me nga bo e be mia é mbe zezé!

¹² A bobejañ, ma ye'elane mia na: Bo'on ane me né, aval ane ma fe me ntoo ane mia. Mi nji bo ma *abé éziñ.

¹³ Mia tu'a yeme na, me nga kate mia Mbamba Foé éyoñ ôsu me to nkôkon.

¹⁴ Akôsa bo nyôle jam é mbe beta *meve'ele été, ve mfa'a wônan, mi nji vini nge wô'ô me nyé. Ve mi nga viane nyoñe ma ane éngele Zambe, aval ane Krist Yésus.

¹⁵ Ava'a denan e ne ñhe vé? Amu ma kobô ajô denan avale di na, nge mi nga ye bi ngu, mi mbe ngule ya vaa mise menan, a ve ma me.

¹⁶ Ye me nto nsiñe wônan éyoñe ji, amu ma kate mia bebela'

¹⁷ Abui ñyemba'ane ba yembane mia e nji bo zesé, ba yi ve na, be kandé bia be mia, a na bebien be bo ba mia be be mia su'ulane lat.

¹⁸ E jam e ne mvaé, e ne ôsimesane ya mbamba nlatan biyoñ bise, saa ve éyoñ me ne zañe jenan.

¹⁹ A ayôme bone dam, e mintaé été, ma beta biaé mia mfefé akekui éyoñ Krist a ye yené be mia.

²⁰ Ma dañe kômbô tabe mia bebé éyoñe ji, me tu'a yem ane ma yiane kobô mia, amu fek é ne me njañan ajô denan.

Efunan bilate bibaé

²¹ Katane ma, mia mia kômbô tabe metiñe si, ye mi nji wô'ô jame metiñe mete ma jô'

²² E ne ntilane na, Abraham a nga biaé bone bebaé. Wua e be minga a mbe mbo ésaé, e nyô mbok e be minga a mbe *nti.

²³ Mone mbo ésaé a nga bialé a zene ya minsôn. Ve nyôô minga a mbe *nti a nga bialé a zene ya ngaka'a.

²⁴ Nkañete ôte ô ne v'éfunan. Binga bete bebaé ba liti bilate bibaé. Jia é ne ji ja so nkôle Sinayi, ja biaé *bon ya éto belo: élat éte nje é ne Agar.

²⁵ Amu nkôle Sinayi ô ne Arabi. A Agar a ne éve'ane Yérusalém ya éyoñe ji, amu a ne *ôlo a bone bé.

²⁶ Ve Yérusalém ya yôb a ne fili, a nye a ne nyia wongan.

²⁷ Amu e ne ntilane na: va'ak a nkôkôme minga, e wo ô nji bo ô biaék. Tôta'an a mevak, e wo ô nji yem ajô mintaé mi abiaé! Amu bone ya nyô be nga suu, ba ye bo abui a dañe bone ya nyô a bili nnôm.

²⁸ Ve mfa'a bobejañ, aval ane Izak, mi ne bone ya ngaka'a.

²⁹ Ve aval ane nyô a nga bialé a minsôn a nga bo a kpwe'ele'e nyô a nga bialé a Nsisim, e ngenane nalé éyoñe ji.

³⁰ E nde Mintilan mia jô aya? Tita'ane mbo ésaé a mone wé! Mone mbo ésaé a nji yiane nyoñe ngab baa mone minga a ne *nti.

³¹ Ajô te a bobejañ, bi nji bo bone be minga a ne *ôlo. Ve bone be minga a ne *nti.