EZAYI 2 - Kalate Zambe Nnomo a Mfefe Mfefé Nkôñelan

¹ Nkômbane Zambe, aval Ezayi, e mon Amos a nga yen, ajô Yuda a Yérusalém.

Meyoñ me bôte mese ma ye ke e Yérusalém

² A ye bo melu y'asu'ulane na nkôle ya vôme Nda Nti é ne nlôñan, wo ye bebe abôbône minkôle yôp, wo ye dañe bone minkô ôyabe yôp, a *meyoñ me bôt mese ma ye tinekane ke wé.

³ Abui bôt da ye ke wé a jô na: zaka bi betan e nkôle Nti, e Nda Zambe Yakob, nalé ate a ye ye'ele bia mezene mé, a nalé ate bia ye wulu e mezene mé été. Amu nne nye'elan wo ye so Sioñ a nne mejô me Zambe ma ye so Yérusalém.

⁴ A ye bo *ntyi'i mejô e zañe *meyoñ me bôt, a a ye bo ntyi'i mam ya bizu'u bi bôt. Ba ye lui bidikas a minkpwaté mekône miap, a lui avône minkus a mekoñe map: ayoñ da ye bo te beta kôlô si a wosan ayoñ avok, a bôt ba ye bo te beta yé'é mboone bita.

⁵ Za'an a *nda bôte Yakob, Za'ane bi wulu a éfufube Nti!

Môse Nti

⁶ A Zambe, ô li'iya ayoñe bôte dôé, *nda bôte Yakob, amu é ne njalan a mimboone ya jôp da tôô, njalan a majik ane Befilisteñ, a amu ba fulane mam a bone *meyoñ bikuu,

⁷ si jé é ne njalane argent a or, mefo'o mé me ne teke nné, si jé é ne njalane bikabela, bevagoñe bé teke alañé.

⁸ Si jé é ne njalan a azezambe; mboone ya anyu dé e nga bo.

⁹ Ajô te môta binam a ye silibane si, a môt ase a ye bili ôsame, a wo Nti, wo ye bo te jamé be.

¹⁰ Nyi'in e mbas ako'o été, a sobô'ô e mbulu'u été, bi too ôyap a angôndô ya be Nti, a ngule ya étôto'o jé.

¹¹ Mise m'ébiasé me môta binam ma ye silibane si, a mebune me bôt ma ye vitebane si; Nti étam nye a ye betebane yôp *môs ôte.

¹² Amu Nti ya *minsamba mewosan a teléya ngumba môs asu ya wosan e bôt be ne mebun a ébiasé;

¹³ asu ya wosane besédre ya Libañ Be ne mbetan ôyabe yôp, a asu ya wosane bilône ya Basañ,

¹⁴ asu ya wosane beta minkôle bese; a e bone minkôle bese be ne mbetane yôp;

¹⁵ azomezome menda ese e ne ôyabe yôp a meka'a mese me n'alem;

¹⁶ besitima bese ya Tarsis a biôm bise ya mimvôman.

¹⁷ Mbia anyu môta binam a ye vitibane si, A mebune ya bôt ma ye silibane si; Nti étam Nye a ye betebane yôp *môs ôte.

¹⁸ Azezambe ese da ye jañ.

¹⁹ Bôt ba ye nyiine mimbase meko'o été a e bido'o ya mbulu'u été, ôyap a angôndô ya be Nti, ôyap a étôto'o y'éjijine jé, éyoñ a ye tebe na, a jalé *si nyô a woñ.

²⁰ Môs ôte, môta binam a ye wua bivôlevôla bezambe be argent a or bé e be bekoé a angem; bezambe émien a nga bo, A kute meboñ mé ôsu viap,

²¹ Bôt ba ye nyiin e mimbane meko'o été, a e minsalane mekôm été, ôyap a angôndô ya be Nti a étôto'o y'éjijine jé, Eyoñ a ye tebe na a jalé *si nyô a woñ.

²² Jôka'ane ntabane ndi e be môta binam, nye ate a bili v'ôyôme mvebe e mimbile mi môé mié été; amu a lañebane za jômô'