ESTHE GREK 2 - Kalate Zambe Nnomo a Mfefe Mfefé Nkôñelan

Esthe a nyoñ éto

¹ E mvuse mam mete, éyoñ ôlun ô vobôya, njôô bôt a nga bo teke fe beta tot Astin jôé, a ba'ale'e e *nlem été e mejô mese émien a nga jô a aval a nga tyi'i ajô minga te.

² Ane bôt ba saane njôô bôt ba zu jô na: «Be jeñe njôô nlam bivôme bengon e bi bi ngenan bindun bi to fe abeñ e mis.

³ Njôô nlam a tele'é ñhe mingum mi bôt e bifase bi si bise ya éjôé, be ke ba tob bivôm bengon, bi to bindun a abeñ ya ékôp, be zuu be e *nda binga e tisone ya Suza. Ba ye ve be mmimi'a njôô bôt wo ba'ale binga. Ba ye ve be mimbone mi nyanga a toñe be ane da yian.

⁴ E minga njôô bôt a ye nye'e e nye a ye nyoñ éto Astin.» E nde njôô bôt a nga yene *mvo'é ya bo nalé.

⁵ Môt éziñ ki a nga too e tisone ya Suza, mone Yude jôé na Mardôsé'e *nda bôte Yayiros, baa Seméyas a Kisayas, mvô'ô Benjamin;

⁶ a nga zu e mekaban, a so'o e Yérusalem e tison Nabukodonoso, njôô bôt ya Babilôn, a nga mane tôt a kee je mekaban.

⁷ Nde Mardôsé ki a mbe a toñe mona minga valé ngon ésa wé éziñ Aminadab, ngon jôé na Esthe. Ngone té bebôndé bé be nga mane bo momo, e nde Mardôsé a nga naa nye na a ye lu'u nye; évôme ngone té é mbe abeñe ya yen.

⁸ Eyoñe be maneya yôtan e *tyiñ njôô bôt a nga ve, ane be nga tôkan bivôm bengon abui abui e tisone ya Suza, Gayi e nye be nga telé njôô wop. E nde ñhe ba ke liti Esthe e be Gayi, mba'ale binga.

⁹ Ane a nga yen Esthe mvaé *a nye'e fe nye. E nde a nga ji'a ve mimbone mi nyanga a ngab bidi jé, a bobebinga ba dañe biwôlô zamgbwa e ba be nga so e *nda be njôô bôt. A nga toñe ñhe nye abeñ e *nda binga va, a nye a nsamba bengone wé wu.

¹⁰ Esthe va teke kat ayoñe dé nge nlam abialé wé; amu Mardôsé a nga ve nye atiñe na a bo te kat.

¹¹ A nde fe, e *môs ôse ya yôp, Mardôsé a mbe a kele a tebe mfa'a ya *nda binga a bôtôk e jôm ja ye bo Esthe.

¹² Ane ngon awôm a ébaé é mané, éyoñe té e nje évôme ngon é ne subu njôô nlam bebé. Nté éyoñe té ô mbe éyoñ ngômesan. E tañe ngon ésaman, be woko'o mona minga mbon mira e ngon ésaman fok, be woko'o nye mimbone mi nyanga mi binga meval meva.

¹³ Eyoñe te ñhe a ke e be njôô bôt. E môt a bili asu ésaé te a ve ñhe évôme ngon ngul ya na a ke litane nye, atéé e *nda binga akekui e menda me njôô bôt.

¹⁴ Mamengô'é na a kele ñhe; ane tyé é lendé, a kui atan a kele e *nda binga fok, Gayi, *miak njôô bôt, e nye a to mba'ale ya été. Ataté éyoñe té a ntoo teke fe ke e be njôô bôt, sesale ve njôô bôt émien a loone nye.

¹⁵ Mfa'a Esthe ngon Aminadab, ésaa Mardôsé éyoñ a nga tabe nté ôse ya kômesane na a ye subu njôô bôte bebé, a nji bene jam éziñ ya mame mese *miak wo ba'ale binga ô nga jô nye. A bôte bese be mbe be yene nye, be nga wô'ô nye mvaé.

¹⁶ E ngon awôm a baa, nalé a jô na e ngon Adaa ane Esthe a nga subu njôô bôte bebé, e mbu zamgbwale ya éjôé jé.

¹⁷ E nde ñhe njôô bôt a nga diñe fo'o Esthe abui a yene nye mvaé e *nlem, alôte bivôm bengon bise bivok. Ane a nga jale nye ébab nkol alu'u e nlô.

¹⁸ E nde njôô bôt a nga ka'a beta dina asu bemvôé bé bese a biwôlô bi bôte bise, tañe melu zamgbwa na a jem abô'ô alu'u ya baa Esthe. Ane fe a nga suu betoya e si asu bôte bese ya éjôé jé.

¹⁹ Mardôsé a mbe a bo'o ésaé e jale be njôô bôt,

²⁰ Esthe ki a nji ke kulan e nlam abialé wé. Amu Mardôsé a nga ve nye atiñe dina na: Ô ko Zambe woñ a ba'ale metiñe mé ve aval ane éyoñe bia wo bi nga too. A Esthe a nji ke tyendé fulu.

²¹ Bemiak bebaé, be mbe bejôô bezimbi ba ba'ale njôô nlam, be nga wô'ô ñhe Mardôsé *abé ane a bete minkôñ, be nga jeñe ñhe na ba wôé njôô bôt Artazerzes.

²² Ayeme Mardôsé a yemeya jame té, ane a nga kate Esthe, nye ki a ke kate njôô bôte na ba bu émo'o ya bo nye *abé.

²³ Eyoñ njôô bôt a maneya wô'ô metyiñ bemiak bete bebaé, ane be nga tyelé be yôp. E nde fe njôô bôt a nga se'e Mardôsé a ve *atiñ na be tilii mam mete mese e Nda Bekalate bejô bôt a ba'ale ôsimesane ya ésaé Mardôsé a nga saé.