ESTHE GREK 1_1 - Kalate Zambe Nnomo a Mfefe Mfefé Nkôñelan

Mardôsé * a yem biyeyem

¹ E mbu baa, éyoñe te Emônene Artazerzés a too njôô, e *môs ôsu ya ngone Nisañ, ane Mardôsé a nga yem biyeyem.

² Mardôsé a mbe mone Yude ya Suze, e *nda bôte Yayi baa Seméyas a Kisayas, mvô'ô Bényamin; a mbe beta môt a mbo bisaé ya jale be Njô Bôt.

³ A mbe fe môte wua ya bôte Nébukatnétzar, njôô ya Babilôn, a nga ke bi e Yérusalem a zu be mekaban, baa Yékônia, njôô ya Yuda.

⁴ Biyeyem Mardôsé a nga yem mbie bi: Zô'é a éngôngôm,*mvam zo'oyañ a nti'itane si, biôm ya si ne buleka-bulukan.

⁵ Beta bibibi bibaé be nga zu a bôé beta *mvam.

⁶ Eyoñe be bôéya *mvam, e jôm ése é ne ayoñe bôt é nga kômesane bita, na ba zu wosan ayoñe bezôsô be bôt.

⁷ E teme na dibi ve ku ne kulut, éngôngol ane môt a ye wu *nlem ô ntyele yôp, édudu, si ése ne buleka-bulekan.

⁸ Ngum ayoñe bezôsô be bôte ôse, mebo ve téé be si, mbôl ba ko bitua bibubua bi mame bina woñ; be nga yange fo'o ve na ba zu mane jañ ékok,

⁹ be nga yône ñhe be Zambe. E mvuse miñyône miap, mendim me nga kui si abui abui, a taté bo ane abôndôñ me nga ke ma nenenen a bo ane beta ndam ôsôé.

¹⁰ Efufub ve zu faé, jôb ve tôô, ayôme bôt e nga bet e yôp, be nga mane di biwôlô bi bôt.

¹¹ Eyoñe Mardôsé a yemeya biyeyeme bi a mane fe yen e jôm Zambe a nga tyi'i na a zu bo, e nde a nga vee ôyo, a nga ba'ale jame te e nleme été. Alu e nga vin, a ngenan a kele a jeñ mezene mese ya wôk jame te.

Mardôsé a kulan ésok Gabatha baa Tharra

¹² Môs éziñ Mardôsé a woko'one be njô bôt. Ane Mardôsé a nga ke a tabe éto jé e jale be njô bôt, baa bemiak bebaé ba ba'ale jal, Gabatha a Tharra,

¹³ E nde a nga wôk ane ba bu mbia émo'o, a nga jeñ na *a yem e jôme ba bo. E nde a wô'ô na ba zu ke wôé njô bôt Artazerzés. Ane a nga ke kulane be e be njô bôt.

¹⁴ Eyoñe te njô bôt a nga sili bemiak bete bebaé ajô di. Eyoñe be memeya, ane be nga bili.

¹⁵ E nde ñhe njô bôt a nga bo na be tilii mame mete, ndemben be yeme ba'ale me; a Mardôsé fe a nga tili me.

¹⁶ Ane njô bôt a nga ve tyiñe na Mardôsé a tabee mbo bisaé ya jale dé a ve fe nye bifa'é asu ésaé a nga bo.

¹⁷ Môt éziñ a nga to fe valé, Haman Bugayôs, éwôlô môte ya be njô bôt, ndômane Hamadatôs. Amu ajô bezimbi bebaé ya jale be njô bôte di, môt ate a nga jeñe na a bo Mardôsé baa ayoñe dé mbia jam.

Artazerzés a ben Astin, minga wé

¹⁸ Mame ya biyoñe bi Artazerzés. Artazerzes ate a nga jôô bifas mesi mewôm mebaé a bila, ataté e mfa'a ya si India.

¹⁹ Eyoñ Artazerzes a zuya nyoñ éto éjôé e tisone ya Suza,

²⁰ e mbu lale ya éjôé jé, e nde a nga ka'a beta dina asu bemvôé a meyoñe mese, asu biwôlô bi bôte ya meyoñe Bepers a Beméd, a asu bengovina benen.

²¹ E nté melu ntet a mewôme muam, a nga liti be akume ya éjôé jé, duma a mvaé ya été.

²² E mvus abôk, ane njô bôt a nga ka'a dina e jale dé, melu mesaman, asu meyoñe bikul mese me mbe e tison.

²³ Nseñ ô mbe nkôman nyanga-nyanga a bikôb biyé bia fum, biyé bi lina a biyé bi musalina bi tyele e beta metu'u minko be to éfumulu ne fuum a évele ne zôññ, minkol mite mi woman akob or, a akob étyé moné, akob ebiene ki e beme e mekône m'ako'o malmô, a mekône me ako'o alebata. Binoñ ya été ve or a éfumulu étyé moné. Si é too mbô'an a édima señ émelôt baa naka, mfulan a malmô; ntiñane mimfinga, mi ngemba'an ne ngene-ngene-ngen; mesam me rosa mmiaman mbôma'ane e si si;

²⁴ mekob nkôman a or a éfumulu étyé moné, a *élaé éfumulu étyé é be'e mise m'évele señ e nyôlenyôl, jôme ya kui tañe bemoné toyini mewôm mela. E jôm é ne mvaé woon, ve aval njô bôt émien a nyu.

²⁵ Dina ate a mbe teke ngum abime ngap: E ne njô bôt a nga tyi'i nalé a ve fe bekabe bidi *tyiñ na be bo aval a kômbô a aval môt ase a yi.

²⁶ E minga njô bôt, Astin nye fe a nga ka'a dina asu binga ya *nda be njô bôt, afôla Artazerzes a nga too.

²⁷ E môse zamgbwale na, njôô a nga sane ñhe; e nde a nga jô Haman, Bazan, Zharra, Borazé, Zathôlta, Abataza a Tharaba - mimfefe'e zamgbwale baa be Artazerzes ba saé,

²⁸ na be loone ngal a zu e mise mé, a bo énguñ a nye a jalé nye ébab nkol éjôé e nlô a liti ñhe fe minlô mie a meyoñe biku abim abeñ a né: Nye k'a mbe ñhe fo'o jôm é ne abeñ!

²⁹ Ane Astin a nga bene zu, nde njô bôt a nga wô'ô *abé, ôlun ô bi ñhe nye. Ane a nga jô bemvôé na: Ye aval di e nde Astin a yalane ma? Nge nalé ñhe, mia bebien koba'an, mi tyi'i ajô té.

³⁰ E nde Akesayôs, Sasatayôs a Maléséa, minlô mi bôt ya éjôé ayoñe Bepers a Beméd, be nga subu nye bebé, be mbe njô bôt bebé, be too nye e mefefe, e nsamba bôt ya ôsu.

³¹ Ane be nga liti nye, aval metiñ ma jô, e jôm a yiane bo minga wé Astin, amu a nga ben a bo'ok mejô njôô bôt a nga tyi'i na bôt be ke nye kat.

³² E nde Mukayôs a nga nyoñe nkobô e mise me njôô bôt a minlô mi bôt ya éjôé, nye na: «Sake ve njôô nlam étam e nye Astin, minga njôô nlam, a ta? A ta fe minlô mi bôte mise a bengovina benen be njôô bôte bese.

³³ Njôô bôt a nga mane kañete be mejô me nga kui minga wé anyu a aval a nga yalane nye. Aval minga te a nga yalane njôô bôt Artazerzes,

³⁴ beyale minlô mi bôt ya éjôé Bepers a Beméd be fe ba ye kôme samele beyôm avale dada éyoñ ba ye wô'ô éyalan a nga yalane njôô bôt.

³⁵ Nge njôô nlam a kañese ñhe a tele'é atiñe ba ye tili e kalate metiñ Beméd a Bepers. Be bo'o teke tyii zene fe! E minga njôô bôt a bo'o te beta subu nye bebé, a nde fe e minga mfe a dañe mbamba fulu njôô a nyoñe nye a bo nye nga.

³⁶ Njôô bôt a teléya ñhe *atiñ, be kele ba yôtane de a be ba'ale'e de e si éjôé jé ése. Ajô te, binga bese ba ye dañe semé beyôm bap, ja'ane nyu a dañ *nzôzoé nge ke nyu a dañe nkukum.»

³⁷ Ane njôô bôt a minlô mi bôt ya éjôé be nga wô'ô nkobô té mvaé. E nde njôô nlam a nga bo aval ane Mukayôs a nga jô.

³⁸ Ane a nga lôme bekalate, éjôé jé ése aval ane é mbe nkabane bifas, éfas ése é bili nkobô wé, bôt bese be nga ke ba ko woñ e menda menda.