EFEZE 5 - Kalate Zambe Nnomo a Mfefe Mfefé Nkôñelan

¹ Vuane Zambe, amu mi ne *bon a nye'e.

² Nyiñan e nye'an été, avale Krist a nga nye'e bia, a a nga ve émiene Zambe ajô dangan, ane mvean étyi'a, aval ane ôlobinda a ne abeñe menyum.

³ Ebamba, mvin, aval ese bi ne, a ôzañ akum, bi bo'o te totebane zañe jenan, avale te nde da yiane mimfufup.

⁴ Mbia bifia, *minkobô mi ne tee fek nge mbia fianga, nalé a nji yian. Ve va'an e mvean akéva.

⁵ Amu mia yiane tu'a yeme na, teke mbo ébamba, nge mvimvine môt, nge ñwôlé bôte bevo'o akum, nkañe bezambe befe ate, a ne bi ngap éjôé Krist ba Zambe.

Dibi e melu mvus, ve éfufup éyoñe ji

⁶ Môt a bo'o te du'u mia a bivôlevôla bifia. E ne bebela na, mame mete mme ma dutu ayaa Zambe e be *bon be ne melo.

⁷ Ajô te, te boone benyoñe ngap, mia be be.

⁸ Melu mvus, mi mbe dibi, ve éyoñe ji mi ne éfufup e be Nti. Wula'an ane bone b'éfufup.

⁹ Ebuma éfufup é ne jôé na: Mvam, *zôsôô nge na benya mejôô.

¹⁰ Fasane mame Nti a yene mvaé.

¹¹ Te boone benyoñe ngap a minkôkôme mimboone mi dibi. Ve kula'ane mie éngengeñ.

¹² E ne ôsone ya kobô mame bôte bete ba bo asoé.

¹³ Ve jam ese e ne nkulane éngengeñ, da litiban a éfufup.

¹⁴ Amu jam ese da litiban e ne éfufup. Ajô te ba jô na: ve'e ôyo, a môt ô ne ôyo.

Kôlô'ô si e zañe miñwuan, a Krist a ye faé be wo

¹⁵ Mi tuka'a fomban aval ényiñ mia nyiñ: Te boone mekut, ve bo'one mimfefe'e mi bôt,

¹⁶ Mmbe mia yeme belan éyoñe ya éyoñe ji, amu melu me ne *abé.

¹⁷ Te boon asuk, ve mi tuka'a yem jé é ne nkômbane Zambe.

¹⁸ Te veane miabebien nyuane bilam wo so'an, amu wo kee môt e zene njañan, ve bo'one njalan a Nsisim.

¹⁹ Minlañe ya ézezañe jenan mi bo'o besam a bia bi Zambe. Yi'an a wumulu Nti a minleme mienane mise.

²⁰ Va'ane Zambe Esaa akéva biyoñe bise e mfa'a ya mame mese, a jôé Nti wongan Yésus Krist.

²¹ E woñe Krist été, kañesa'ane kean éjôé bana a ba bevo'o si;

Beyôm a beyal

²² A beyal, su'ane mia bebiene si e be benyo beyôm, aval ane e be Nti.

²³ Amu nnôm a ne nlô ya be ngal, aval ane Krist a ne nlô keké, nye ate a ne nyii ya Nyôl jé.

²⁴ Ve aval ane keké é ne éjôé Krist si, nalé fe beyal ba yiane bo e be beyôm mfa'a mam mese.

²⁵ A beyôm, nyeka'ane benyo beyal, aval ane Krist a nga nye'e keké a ve émien amu je.

²⁶ Ajô te a nga kômbô bo je *mfuban a ntunane je a mendim ma sôp e ne na, mejô me Zambe été.

²⁷ A nga kômbô ve je émien étôtok, teke ayeñ, nge mbot, nge jam éziñ e ne *abé, ve na keké jé é bo étyi a tee jame ya ve je bijô.

²⁸ Nalé ñhe nnôm a yiane nye'e ngal aval ane nyôle jé émien.

²⁹ Teke môse môt a nga vini nyôle jé émien. Ve a ve je bidi a voñôlô je, avale Krist a bo keké jé,

³⁰ amu bi ne bibu'a ya nyôle jé.

³¹ Ajô te fam ja ye li'i ésaa ba nyia, ja ye lat a ngal, a bebaane ba ye bo ve nsône wua.

³² Ndimba jame nyô é ne anen, ma jô na, ja fombô Krist a keké.

³³ Ma wômesane jô na: Môt ase ya be mia, mfa'a wé a yiane nye'e ngal ane émien, a ngale ki a semé'é nnôme wé.