BERÔMEÑ 16 - Kalate Zambe Nnomo a Mfefe Mfefé Nkôñelan

Mebendé; mebatan; minkômban

¹ Ma bendé mia ajô Febé, kale jangan, diakon ya e keké é ne Kenkréa.

² Nyoñane nye be Nti, aval ane da yiane mimfufup. Vola'ane nye mfa'a ya jam ese a ye yi na mi volô nye. Amu a nga bo ésaé ya volô bôt abui, aval ane mamien.

³ Mi sila'ane me Priska ba Akilas, beébe bebo bisaé bam e be Krist.

⁴ Be nga ve bebien asu ya kaman ényiñe jam. Saa ma étam ma ve be akéva, ve nalé fe bekeké bese ya bikuu.

⁵ Sila'ane fe ma keké é wô'ô sulan e *nda jap. Sila'ane ma nyô ma nye'e Epayinét, mbômô ébuma ya Azi e be Krist.

⁶ Sila'ane ma Marie nyô a nyoñe nju'u abui mfa'a wônan.

⁷ Sila'ane ma Andrônikus ba Yunias, bivuvumane biam, mbe bia be be bi mbe nsamba minkôm. Be ne minlômane ya duma. Be mbe ma ôsu, mfa'a ya bo ba be Krist.

⁸ Sila'ane ma Ampliatus, nyô ma dañe nye'e be Nti.

⁹ Sila'ane ma Urbeñ, ébe mbo ésaé wongan, a nyô ma nye'e, Stakis.

¹⁰ Sila'ane ma ba ya *nda Aristôbul.

¹¹ Bata'ane ma Hérôdioñ évuvumane jam. Sila'ane ma ba ya *nda Narsis ba buni Nti.

¹² Sila'ane ma Triféne, a Trifôze, mbe be nga ve bebiene nju'u abui e be Nti. Sila'ane ma éñwom Persis, nyô a nga jibi abui njuk e be Nti.

¹³ Sila'ane ma Rufus, ntobane be Nti a nyia wé a ne fe nyia wom.

¹⁴ Sila'ane ma Asim Krist, Flégon, Hermés, Patrôbas, Hermas a bobejañe baa be be be né.

¹⁵ Mi sila'ane ma Filôlôg a Yuli, Neré a kale jé Olimpas a mimfufube mise baa be be be né.

¹⁶ Mi bata'an, wua a nyô mbok, a nlatane menyu ô ne *mfuban. Bekeké bese ya Krist ba batane mia.

¹⁷ Ma ye'elane mia a bobejañ na, mi sa'ale ba ba té mengam a mam ma kolé ôbak, mbe bete ba li'i ñye'elan mi nga nyoñ. Kelane be ôyap.

¹⁸ Amu balé bete be nji bo Krist Nti wongan bisaé, ve mebume map mebien. Mbe bete, a élen nkobô jap ya éwono'o, ba du'u minleme mi ba be ne biyebeyebe.

¹⁹ Ajô te, ma vak amu ajô denan. Ve ma yi na, mi yeme kandé mame me ne mvaé a bo *mfuban mfa'a mam me ne *abé.

²⁰ A Zambe ya *mvo'é a ye fite Satan e mebo menane si. Mvame Nti wongan Yésus é tabe'e be mia.

²¹ Timôté, ébe mbo ésaé wom, a sili mia, nalé fe Yason a Sôsipatrôs, bivuvumane biam.

²² Ma, Tertius, ntili kalate nyô, ma batane mia e be Nti.

²³ Gayius, nyô me too *nda, a nyô ngume keké wo sulane be nye, a batane mia. Eraste, nkale akume ya tison a sili mia, nalé fe Kartus, mojañe wongan.

²⁴ E mvame Nti wongan Yésus Krist é tabe'e e be mia bese. Amen!

Duma e be Zambe étam

²⁵ Nde e be nyô a bili ngule ya yemete mia, aval ane Mbamba Foé ma kat a né, éyoñe ma kañete Yésus Krist, aval ane nkulane *nsolane jam ô nga ba'aleban évôl été aso biyoñe ya nnôm éto ô né,

²⁶ ve éyoñe ji, ô yenébaneya a bobane na meyoñe bikuu me yeme wô a zene mintilane bekulu mejô, aval ane njôane Zambe a too nnôm éto ô né, asu ya kee be e mewô'ô ma so mbunan été,

²⁷ e be Zambe ate étam, susu'a mfefek, duma e bo'ok amu Yésus Krist, nnôm éto. Amen.