2 Ko 13 - Kalate Zambe Nnomo a Mfefe Mfefé Nkôñelan

Mebatan a mebendé ma su'ulan

¹ Jina é ne éyoñe lale ma zu e be mia. Ajô ese da ye tyi'iban a bengaa bebaé nge belaa.

² Me maneya jô nalé, a na, aval ane éyoñe njomane baa ma beta ba'alane de den me too momo, e be ba be nga bo *abé e mvus a ba bevo'o bese na: Nge me beta zu, ma ye bo te ye'ele môt éziñ,

³ mbôlô mia kômbô ndeme na Krist a kobô be ma. A nji bo ate'e mfa'a wônan, ve a liti ngule jé be mia.

⁴ Yaa, a nga tyelébane *krôa ate'e dé été, ve a vee amu ngule Zambe. A bia fe bi ne atek e be nye, ve bia ye bo bevevee bia be nye amu ngule Zambe e mfa'a wônan.

⁵ Fasane miabebien, a yene nge mia nyiñ e mbunan été, ve'elane miabebien; nge na, ye mi nji yeme na Yésus Krist a ne e be mia? Vengevenge ve *meve'ele ma kôñelan a wosane mia. Mi nji bi ngule ya liti mendeme me mbunan.

⁶ Ma buni na, mia ye yeme na, bi nga bo abime dangan.

⁷ Bia ye'elane Zambe na mi bo te bo *abé éziñ. Bi nji kômbô liti abim avé bi ne nguleya bo ésaé, ve bia kômbô yen ane mia bo mvaé, ja'ane da yené ane nge *meve'ele me ne bia e ngame yat.

⁸ Amu bi nji bi ngule ya wosane bebela ve nyô é né asu bebela.

⁹ Bi ne mevak éyoñ ése bi ne atek mi ke ngu. Nsôñane ya meye'elane mangan ñwô le: e nkean ôsu wônan.

¹⁰ Ajô te, éyoñe me ngenan ôyap, ma tili mia jame di, ndemben éyoñe ma ye kui be mia, me bo te tyi'i ajô éziñ me bem bela'an avale ngule Nti a nga ve ma e né, asu ya lôñ, saa tyam.

¹¹ A bobejañ, ma su'ulane jô mia na: Taba'an e mevak été, bo'on ésaé asu nkean ôsu wônan, va'ane ngule nyô mia mia, tuka'a boone tyiñe jia, nyiñan e *mvo'é été, a Zambe a ne nye'an a *mvo'é a ye tabe be mia.

¹² Mi bata'ane wua a nyô mbok, a nlatane menyu ô ne *mfuban. Mimfufube mise mia batane mia.

¹³ Mvame Nti Yésus Krist, nye'ane Zambe, mfula'an a Mfufube Nsisim bi tabe'e be mia bese.