2 Bb. 24 - Kalate Zambe Nnomo a Mfefe Mfefé Nkôñelan

¹ Melu a mbe njô bôt, Nébukatnétzar, njô bôte ya Babilôn, a nga ke ôban. Yehôyakin a nga ke éjôé jé si tañe mimbu mila; ve a nga beta ben éjôé jé.

² Ane Nti a nga lôme minsamba Bekaldééñ be wosane Yehôyakin, nalé fe minsamba Besirieñ, Bemôabite a minsamba Beamônite; a nga lôme mie mi ke wosane Yuda na a jañ avale nkobô Nti a nga kobô anyu bebo bisaé bé bekulu mejô ô mbe.

³ Jame te e nga bobane fo'o v'amu abendé Nti, amu a nga kômbô telé Yuda fefele ya asu dé, amu *abé ese Manasé a nga bo,

⁴ a amu metyi me ne te bijô, mme Manasé a nga kuli, metyi me ne te bijô mme a nga jalé Yérusalém. Nti a nji ke kômbô jamé.

⁵ Mimboon mivo'o mi Yehôyakin, a mam mese a nga bo, bi ne ntilan e kalate minkañete bejô bôte ya Yuda.

⁶ Yehôyakin a nga bômbô baa b'ésaa vôme wua. E mone wé Yehôyakin a nga jôô éjiane jé.

⁷ Njô bôte ya Ejipte a nji fe beta kui atane ya si jé, amu njô bôte ya Babilôn a nga mane nyoñe biôme bise bi mbe biôme bi njô bôte ya Ejipte, ataté asô'ô y'Ejipte a kui ôsôé Efrat.

Yehôyakin, njô bôte ya Yuda Ndilane Yérusalém bita éyoñ ôsu

⁸ Yehôyakin a nga bili mimbu awôm a muam éyoñ a nga tebe njô bôt; a nga jôô ngon éla e Yérusalém.

⁹ A nga bo mam me ne *abé e mise me Nti, e mezene mese, aval ésaa a nga bo.

¹⁰ Melu mete bebo bisaé be Nébukatnétzar, njô bôte ya Babilôn, be nga bet a wosane Yérusalém, ane be nga dili tisone bita.

¹¹ Nébukatnétzar, njô bôte ya Babilôn, a nga suane metata'a me tison, éyoñe te bebo bisaé bé be dili'i je bita.

¹² Eyoñe te Yehôyakin, njô bôte ya Yuda, a nga ke tôbane njô bôte ya Babilôn, émien, nyia, bebo bisaé bé, bivete bié a bezimbi bé. Njô bôte ya Babilôn a nga bi nye mbôk e mbu muame ya éjôé jé.

¹³ A nga kuli akum ese ya *nda Nti a *nda njô bôt atan. A nga mane bôé biôme bise bi ne mboon a or bifuse bifus, mbie Solômon, njô bôte ya Israél, a nga bo e *nda Zambe Nti, avale Nti a nga jô.

¹⁴ A nga mane kee Yérusalém ase e minkôm, bivete bise a benya bôte bese, toyini awôm, a mintyetyeñe mise a belui mengôñ; bone be bôte ya si étam mbe be nga li'i.

¹⁵ A nga kee fe Yehôyakin e Babilôn; a nga kee fe nyia njô bôt e minkôm, akôlô Yérusalém a ke e Babilôn, nalé fe binga be njô bôt a bezimbi bé, a biwôlô bi bôte ya si.

¹⁶ Bôte mewosan toyini zamgbwa, mintyetyeñ a belui mengôñ toyini. Bese be too bevevee be bôt, be too nkôman asu bita. Njô bôte ya Babilôn a nga kee be minkôm e Babilôn.

¹⁷ Njô bôte ya Babilôn a nga telé Matania, ésaa mongô Yehôyakin njô bôt, éjiane Yehôyakin émien, a nga tyendé jôé dé a yôlé nye na Sédékias.

Sédékias, njô bôte ya Yuda. Nyoñane Yérusalém

¹⁸ Sédékias a nga bili mimbu mewôm mebaé a wua éyoñ a nga tebe njô bôt, a nga jôô mimbu awôm a wua e Yérusalém. Nyia a mbe jôé na Amutal, ngone Yérémi ya Libna.

¹⁹ A nga bo mam me ne *abé e mise me Nti e mezene mese, avale Yehôyakin a nga bo.

²⁰ Mame mete me nga boban amu ayaa Nti e nga jimbi Yérusalém a Yuda, a kui vôme ya wua be fé be kôlô nye mis. E nga bo na, Sédékias a nga bete nlô e be njô bôte ya Babilôn.