2 Bb. 20 - Kalate Zambe Nnomo a Mfefe Mfefé Nkôñelan

Okon a ñyetane njô bôt Ezékias

¹ Melu mete Ezékias a nga kon bebé ya wu. Ane *nkulu mejô Ezayi, e mone Amos, a nga zu be nye a jô nye na: Avale di nde Nti a kobô na: Va'a *nda jôé mebendé, amu wo zu wu, woo ye ke fe nyiñ.

² Nde Ezékias a nga kôñelan asu dé mfa'a ya mfin a ye'elane Nti na:

³ A Nti, ko ma éngôngo! Simesa'ane na, me nga wulu e mise môé e bebela été, nalé fe a *nlem ôse, a me nga bo fe mam me ne mvaé e mise môé! Nde Ezékias a nga kuli mili'i mis abui abui.

⁴ Valé Ezayi a kuiya atan, ve a ngenan te suane nseñ ô n'anen, éyoñe te ajô Nti e nga kui be nye na:

⁵ Bula'ane ke jô Ezékias, nliti zene ya bôte bame na: Avale di nde Nti, e Zambe David, ésoo a jô na: Me wô'ôya meye'elane môé, me yeneya mili'i môé. Tame yen ma ye bo wo mvo'é; e môse lale, wo ye bet e *nda Nti.

⁶ Ma ye beté mimbu awôm a mitan e melu môé été. Ma ye kôté wo a tisone nyô e mo me njô bôte ya Asiri; ma ye kamane tisone nyô amu mamien, a amu David mbo ésaé wom.

⁷ Ane Ezayi a nga jô na: Nyoñane mbome befig. Nde be nga nyoñe wô a babe wô e vôm étyel é mbe, nde Ezékias a nga bo *mvo'é.

⁸ Ezékias a nga jô Ezayi na: Ndeme fé ma ye yeme je na Nti a ye bo ma *mvo'é, a na, ma ye bete *nda Nti e môse lale'

⁹ Ezayi na: E jame di da ye bo wo ndem, e so'o be Nti na, Nti a ye tôé nkobô wé: ye nsisiñ wo yiane yaé tañe medaa mebo awôm, ye bulane mvus tañe medaa mebo awôm'

¹⁰ Ezékias a nga yalane na: E ne tyi'ibi ya dutu nsisiñ tañe medaa mebo awôm. Ajô te ô jibi'i bulane mvus tañe medaa mebo awôm!

¹¹ Ane *nkulu mejô, Ezayi a nga ye'elane Nti, Nye ve bulane nsisiñe mvus tañe medaa mebo awôme ya medaa mebo Akaz, mfa'a nsisiñe te ô nga lumbu.

Minlômane ya Babilôn mia zu be Ezékias

¹² Melu mete, Berôdak-Baladan, e mone Baladan, njô bôte ya Babilôn, a nga lôme kalate a das e be Ezékias, amu a nga wô'ôtan ajô ôkon Ezékias.

¹³ Ane Ezékias a nga nyoñe minlôman mite a liti mie e vôme biôme bié bi ne beta tañ bi né: argent, or, bityita'a, a mbon ô n'édima, mengômesane bityé mé, a biôm bise bi mbe akume dé été; teke jôm Ezékias a nga bo te liti be e *nda jé a e bitaba'a bié bise.

¹⁴ Ane *nkulu mejô Ezayi a nga zu e be Ezékias, a jô nye na: Bôte bete ba te jô aya, ba so ke vé a zu be wo? Ezékias na: Ba te so si é n'ôyap, e Babilôn.

¹⁵ Ezayi a nga beta jô na: Jé ba te yen e *nda jôé? Ezékias na: Ba te yene jôm ése é ne e *nda jam. Teke jôm éziñe ya akume dam me nji liti be na be yen.

¹⁶ Eyoñe te Ezayi a nga jô Ezékias na: Vô'ôlô'ô nkobô Nti!

¹⁷ Tame yen, melu ma zu, ba ye kee jôm ése é ne *nda jôé e Babilôn a biôm bise b'ésoo be nga kôan a kui môse wu; teke jôm ja ye li'i, nalé Nti a jô.

¹⁸ Ba ye nyoñe bone bôé, ba ba so e be womien, e mbiane wôé. Ba ye bo bemiak e *nda njô bôte ya Babilôn.

¹⁹ Nde Ezékias a nga yalan Ezayi na: Ajô Nti wo te tot e ne *mvo'é. A nga beta jô na: Ke *mvo'é a évôvoé bia ye bo nté ôse ya ényiñe jame nga'

²⁰ Mimboone mivo'o mi Ezékias, éwôlô jé, étame mendim a nga bo, a zene mendim a nga bo na mendim me kui tison, me ne ntilan e kalate minkañete bejô bôte ya Yuda.

²¹ Ezékias a nga bômbô ba b'ésaa vôme wua, e mone wé Manasé a nga jôô éjiane jé.