2 Bb. 19 - Kalate Zambe Nnomo a Mfefe Mfefé Nkôñelan

Yérusalém a nyiiban, nsamba bita Senakérib wo bôlé

¹ Eyoñe njô bôt Ezékias a nga wô'ô jame te, a nga nyabe mengômesane mé, ve jaé nkuta a ke e *nda Nti,

² Ane a nga lôme bôte bana e be *nkulu mejô Ezayi e mone Amôs: Eliakim, mba'ale akume ya *nda njô bôt, Sebna, ñyeme bekalate, a betuni be dañeya tabe ayap ésaé betuni été, bese be be'e minkuta.

³ Nde be nga jô nye na: Avale di Ezékias a jô na: Môse wu ô ne *môs ôlun, wu meleb a ôsame; amu *bon be ntoo bebé ya kui e mebume benyia, ve nguleya ya biaé é ne momo.

⁴ Ndô'ôtô Nti, e Zambe wôé, a ye ke ôsu a vô'ôlô mejô me Rabsaké nye njô bôte ya Asiri, e masa wé, a te lôme na, a ta vevea Zambe, a ndô'ôtô na, a ye ve melebe mé amu mejô Nti, e Zambe wôé a te wôk. Bo'o ñhe meye'elan asu *mebuka'a me ngenane me vee.

⁵ Ane bebo bisaé be njô bôt Ezékias be nga ke be Ezayi.

⁶ Ezayi a nga jô be na: Avale di nde mia ye jô masa wônan: avale di nde Nti a jô na: Te ko mejô wo te wô'ô woñ ane bisoé bebo bisaé be njô bôte ya Asiri ba te kobô ma ébiasé.

⁷ Avale nsisime di nde ma ye futi be nye na, e foé a ye nyoñ ja ye bo nye na a bulan e si jé; a ma ye bo na a wu a nkpwaté mekôn e si jé.

⁸ Ane Rabsaké a nga bulan a koone njô bôte ya Asiri a wosa'ane Libna, amu a nga wô'ô na, a kôlôya Lakis.

⁹ Ane njô bôte ya Asiri a nga nyoñe foé ajô Tirhaka, njô bôte ya Etiôpi; be nga jô nye na: Tame yen, a te wulu dulu ya wosane wo.

¹⁰ Nde a nga beta lôme minlôman e be Ezékias a jô'ô na: Mia ye kobô Ezékias njô bôte ya Yuda na: E Zambe wôé, Nyô ô too nye ndi, a bo'o te du'u wo a jô'ô na: Yérusalém a ye bo te ku e mo me njô bôte ya Asiri.

¹¹ Womien ô nga wô'ôtan, e jame bejô bôte ya Asiri be nga bo mesi mese, be nga mane jiane me; ye wo ô nga ye kôtéban'

¹² Bezambe ya *meyoñ b'ésaa bam be nga tyam, ye be nga nyii me, Gôzan, Aran, Reséf a bone b'Eden be ne e Telasar'

¹³ Bejô bôte ya Amat, Arpad, tisone ya Sefarvayim, nyô ya Ena a Eva be ne vé'

¹⁴ Ane Ezékias a nga nyoñe kalate e mo minlôman, a lañe nye a bet e *nda Nti. Nde Ezékias a nga liti nye e mise me Nti.

¹⁵ Ezékias a nga ye'elan e mise me Nti, a jô na: A Nti, Zambe Israél, Nyô a too e Bekerubime yôp! Wo étam ô ne Zambe, asu bijôé bise ya *si nyô, wo ô nga té yôb a si,

¹⁶ A Nti! Ke'e alo a vô'ôlô! A Nti, ku'i mis a fombô! Vô'ôlô'ô nkobô Sénakérib a te lôme Rabsaké na a ta vevea Zambe.

¹⁷ A Nti! E ne bebela na bejô bôte ya Asiri be maneya jiane *meyoñ a mesi map.

¹⁸ Be nga wua bezambe bap e nduan, ve balé be nji bo bezambe, ve mimboone ya mo me bôt, bilé a *mekok, a be nga bo be momo jôm.

¹⁹ Eyoñe ji a Nti, e Zambe wongan, nyi'i ñhe bia e mo me Sénakérib, nalé meyoñe mese ya si ma ye yeme na wo Nti étam ô ne Zambe.

²⁰ Eyoñe te Ezayi e mone Amôs a nga lôme bôt be kate Ezékias na: Avale di nde Nti, Zambe ya Israél a jô na: Me wô'ôya meye'elan wo te ye'elane ma, ajô Sénakérib, njô bôte ya Asiri.

²¹ Nkobô Nti a kobôya a too nye ngame yat ñwô wu: a biasé wo, a woé wo, éndune ngon, ngone ya Siôn; a Si'isi nlô e mvuse jôé ngone ya Yérusalém.

²² Za nye ô nga ta a biasé' Ô nga bete *tyiñ a tebe nye ngame yat' Ô nga bete mise môé yôp, A fombô Nyô ya Israél a n'étyi!

²³ Ô nga ta Nti anyu minlôman O nga jô na: Me nga bet abôbône minkô a ézu'u bevagoñe jam. E temeteme Libañ été, ma tyi'i besédre bé ba dañ ôyabe yôp, besipré bé ba dañ abeñ, ma ye ke a kui e susu'a vôme wé a bômbô, a kui Afane dé da funane afube bilé bia wum bibuma.

²⁴ Me nga fak a nyu avale mendim afe. Ma ye vele ôsôé y'Ejipte a abo si ya mekule mebo mam.

²⁵ Ye ô nji wô'ô na, me boya mam mete aso ayabe mvus, na aso melu mvus, me nga bo me' Eyoñe ji ma zu soo me, a bitison bi bili alem bia ye bo ve mevise me mbuan.

²⁶ Bôt be too été be ne ngule momo. Ma ko woñ, ba wô'ô ôson. Be ne ane bilo'o ya mefup, a nte'ane bilo'o ya mefan, ane mbéane bilo'o ya mendi, ane menyeñ me fôn éyoñ é ngenan te bi metin.

²⁷ Ve ma yem éyoñe wo tabe si, éyoñe wo kui atan, a éyoñe wo nyiin e *nda été. Ja'an éyoñe wo wô'ô me *abé.

²⁸ Amu wo wô'ô me *abé. Nkobô ébiasé wôé ô beteya a kui e melo mam. Ma ye futi ôdô'ô wom e mimbile mi môé miôé, A kandé ékabela jam e biyaé biôé, a ma ye bo na ô bulan e *zen ô nga so.

²⁹ E jame di é bo'o wo ndem: mbu ôte ba ye di ébuma ya fé é nga ku si, a mbu wo tôñe valé, ébuma ya fes ja faa ébien. Ve mbu lale, béane bidi a kôane bie Béane mindi'i mi woon, a di bibuma y'été.

³⁰ Befam awu ya *nda Yuda, ba ye li'i. Ba ye beta kui minkañ e mfa'a ya si, a be'e bibuma mfa'a ya yôp.

³¹ Amu *mebuka'a ma ye so Yérusalém, a befam awu ba ye so nkôle Sioñ. E jam ayôñe mboone mame Nti ya *minsamba mewosan da ye bo, e nde le.

³² Ajô te Nti a kobô ajô njô bôte ya Asiri na: A ye bo teke nyiin e tisone nyô. A ye bo teke wua akoñ *élaé été, A ye bo te tebe je e ngame yat, Nge lôñe je bikôndôk e ngame yat. Nalé Nti a jô.

³³ E *zen a nga tyii, a ye je beta tyii a ye bo te nyiin e tisone nyôna été, nalé Nti a jô.

³⁴ Ma ye kamane tison éte na me nyii je, Amu mamien, a amu David mbo ésaé wom.

³⁵ A nga bo na, alu te ebien, éngele Nti a nga kui atan a wôé, e minkane Beasirieñ, bôte toyini ntet a mewôme muam a étan, a éyoñe bôt be nga kôlô si mametyé, a koé na bese be ntoo ve mimbim.

³⁶ Ane Sénakérib, njô bôte ya Asiri, a nga ke a bulane ke tabe Ninive.

³⁷ A nga bo na, meboñ me kute nye si e *nda Nisrôk e *zambe wé, bone bé Adramélék a Sarétsér, be nga wôé nye a nkpwaté mekôn a tup e si ya Arara. Ane mone wé Esaradoñ a nga jôô éjiane jé.