2 Bb. 17 - Kalate Zambe Nnomo a Mfefe Mfefé Nkôñelan

Ozé, njô bôt a su'ulan Israél, Samari a nyoñeban

¹ Mbu awôm a baa Akaz, njô bôte ya Yuda a nga jôô, ñwô Ozé, e mon Ela a nga tebe njô bôte ya Israél e Samari. A nga jôô mimbu ébu.

² A nga bo mam me n'abé e mise me Nti, ve saake ane bejô bôte ya Israél be nga too nye ôsu be nga bo.

³ Salmanazar, njô bôte ya Asiri a nga bet a wosane nye, ane Ozé a nga ke éjôé jé si a ya'ane nye *toya.

⁴ Ve njô bôte ya Asiri a nga kulane fe'e Ozé a nga bôndé na, a wôé nye, amu a nga lôme minlôman e be Sô, njô bôte ya Ejipte, a telé fe nlômane ya lôme *toya mbu ôse e be njô bôte ya Asiri. Nde njô bôte ya Asiri a nga bo na be ka'a nye a bengôkop a fete fe nye e *nda mimbôk.

⁵ Wôna njô bôt a nga wulu e si ése ya Israél a bete na a wosane Samari, ve bômane nye bita tañe melu mela.

⁶ Mbu ébulu Ozé ñwô njô bôte ya Asiri, a nga nyoñe Samari, a kee Israél minkôm e Asiri. A nga tooé be Ala a Abor yôp, ôsôé ya Gôzan, nalé fe e bitisone Beméde.

⁷ Nalé a nga boban amu bone b'Israél be nga bo Nti, e Zambe wob *abé, Nyô a nga soo be si y'Ejipte, be kôlô'ô éjôé Faraoñ, njô bôte y'Ejipte si, a amu be nga ko bezambe befe woñ.

⁸ Be nga tôñe miñye'elane ya meyoñe Nti a nga wôlé biôm ôsu bone b'Israél; nalé nye bejô bôte ya Israél be nga bo.

⁹ Bone b'Israél be nga bo Nti, e Zambe wob, e mam me nji yian asoé: be nga lôñe bito ya bikôndô'ô yôp e bitisone biabe bise été, e Azomezome menda benonô bitison, avale fe ane e bitison bi bili alem.

¹⁰ Be nga telé mekôn me ne mbaan a mekône m'Akéra e minkôle mise mi ne mbetane yôb, a e bilé bise bi ne nyumi si.

¹¹ A valé, nye be nga di'i beôlobinda e bito bise ya bikôndô'ô yôp, aval'ane *meyoñ a nga wôlé biôm ôsu viap. Be nga bo mbia be mam me nga bo Nti na, a wô'ô ôlun.

¹² Be nga kañe bengunemelan, mbe Nti a nga kobô be na: Mia ye bo te bo jame te.

¹³ Nti a nga ve Israél a Yuda ayemé ne ngeññ, anyu be bekulu mejô bé bese, a di beyene mam bese a jô be na: Bula'ane mvus mbia mezene menan, a ba'ale mebendé mam a memvinda mam, mi tôñôk atiñe dam ese me nga bendé b'ésoo benan a nde me nga lôm a anyu bebo bisaé bam be ne bekulu mejô.

¹⁴ Be nji ke vô'ôlô, ve bo ntib avale b'ésaa bap be nga bo, mbe be nji ke buni Nti e Zambe wop.

¹⁵ Be nga ben memvinda mé, élat a nga bo a b'ésaa bab a miñyiane mi mam a nga ba'alane be na be yem. Be nga lat a zezé biôm a bo bebien bemomo. Be nga lat a *meyoñ me nga bômane be a mme Nti a nga kamane be na be bo te vu.

¹⁶ Be nga li'i mebendé me Nti e Zambe wob mese, be nga bo bebiene bone benya'a bebaé a nyeman étyé, be nga ba mekône m'akéra, be nga kañ ateté ya yôb a kañe fe *baal.

¹⁷ Be nga di'i bobefam a bobebinga bab e nduan, be nga bo mvi'i a majik, a kuane bebien asu ya bo mam me n'abé e mise me Nti, a bo nye na a wô'ô ôlun.

¹⁸ Ajô te Nti a nga dañe wô'ô Israél ôlun, a telé be e fefele ya asu dé. Ayoñe Yuda étam nde e nga li'i;

¹⁹ ve to'o Yuda, nye fe a nji ke ba'ale mebendé me Nti, e Zambe wé! Be nga wulu, be tôñe fe, ve bibô'a mebo me Israél.

²⁰ Nti a nga bene mvoñe bôt Israél ése; a nga liti be ôsame, a nga kalane be e mo besa biôm, a a nga su'ulane titane be be kôlô nye mis a ke nye ôyap.

²¹ Eyoñ a nga wôlé Israél e *nda David, be nga telé Yérôbôam e mone Nébat njô bôt, a Yérôbôam a nga vaa be e be Nti a tindi nye na a bo *abé e n'anen

²² bone be Israél be nga bo aval *abé ese Yérôbôam a nga bo; be nji ke sa'ale de.

²³ Akekui Nti a nga telé Israél ôyab e mise mé, avale a nga kate de anyu be bebo bisaé bé bese be ne bekulu mejô. Israél a nga ke minkôm ôyab a si jé, Asiri, vôm a nga tabe a zu kui môse wu.

Besamariteñ

²⁴ Ane njô bôte ya Asiri a nga soo bôte ya Babilôn, ba ya Kuta, Ava, Amat a ba ya Sefarvayim. A nga tooé be e bitisone ya Samari, éjiane bone be Israél. Ane be nga nyoñe Samari, a tabe e bitisone bié.

²⁵ Eyoñ be nga taté na ba tabe été, be nji ke ko Nti woñ, ajô te Nti a nga lôme be bengbwengbwem be wôé be.

²⁶ Nde be nga kate njô bôte ya Asiri na *meyoñ ô nga kee me mekaban a tooé me e bitisone ya Samari me nji ke yeme mbunane *zambe ya si éte; *zambe ate a lômeya be bengbwengbwem ba wôé be, amu be ne te yeme mbunane *zambe ya si éte.

²⁷ Njô bôte ya Asiri a nga lôm abendé na: Lômane wua ya betuni mi nga kee be minkôm wé, a tabe'e wé a ye'ele be mbunane *zambe ya si éte.

²⁸ Ane wua ya betuni be nga ke minkôme be so'o Samari, a nga zu tabe Bétél a ye'ele be avale ba yiane ko Nti woñ.

²⁹ Ve *meyoñ me nga bo ayoñ ese bezambe bap. Be nga telé be e menda me mbe e bito ya bikôndô'ô yôp, mbe bôte ya Samari be nga lôñe bitison, e vôm ayoñ ese ya *meyoñ mete e nga too.

³⁰ Bôte ya Babilôn be nga bo *zambe, jôé na Sukôt-Benôt, ba ya Kut be nga bo nyô a mbe jôé na: Nergal, bôte ya Amat be ki be nga bo *zambe jôé na Akima,

³¹ Ba ya Ava be nga bo émbap môé na: Nibaz a Tartag; ba ya Safarvayim be nga di'i bone babe nduan asu duma bezambe môé na: Adramélék a Anamélék bezambe ya Sefarvayim.

³² Be nga ko fe Nti woñ, a be nga telé betuni ya bito ya bikôndô'ô yôp mbe be nge nyoñe vôm asu bezambe bete; betuni bete be nga bo bisaé asu bezambe bete e menda bito ya bikôndô'ô yôp.

³³ Nalé ate be nga ko Nti woñ, ve be kañe fe bezambe bap, aval'éyeme meyoñe ya mevôm be nga so a zu mekaban é né.

³⁴ Be ngenan be bo'ok mimboone miabe ya atata'a a zu kui môse wu. Be nji ko Nti woñ, teke bo memvinda a biyeme biap, nge metiñ a mebendé Nti a nga ve bone be Yakob, nyô a nga yôlé na Israél.

³⁵ Nti a nga bo Elat a be, a bendé be na: Mia ye bo te ko bezambe befe woñ; mia ye bo te kute meboñe si ôsu viap a mia ye bo te kañe be nge ve be mimvean.

³⁶ Ve mia ye ko Nti woñ, nyô a nga soo mia si y'Ejipte a beta ngu a wo ô ne nsaman; ôsu vié ñwô mia ye kute meboñe si a e nye mia ye ve mimvean.

³⁷ Mia ye ba'ale a bo memvinda, minjôan, metiñ a mebendé a nga tili mia éyoñ ése a mia ye bo te ko bezambe befe woñ.

³⁸ Mia ye bo te vuan élat me nga bo a mia, a mia ye bo te ko bezambe befe woñ.

³⁹ Ve mia ye ko Nti e Zambe wônane woñ, a a ye kôté mia e mo besiñe benan bese.

⁴⁰ Be nji bo mewôk a ba bo e fulu jabe ya atata'a.

⁴¹ Meyoñ mete me nga ko Nti woñ ve be nga kañe fe bengunemelane bap. Bone bap a bendaé bap ba bo ane b'ésaa bap be nga bo a zu kui môse wu.