2 Bb. 15 - Kalate Zambe Nnomo a Mfefe Mfefé Nkôñelan

Azaria njô bôte ya Yuda

¹ Mbu mewôm mebaé a zamgbwale Yérôbôam, njô bôte ya Israél, a nga jôô, ñwô Azaria e mone Amatsia a nga tebe njô bôte ya Yuda.

² A nga bili mimbu awôm a misaman éyoñ a nga tebe njô bôt; a nga jôô nté mimbu mewôm metan a mibaé e Yérusalém. Nyia a mbe jôé na Yekôliahu, ngone ya Yérusalém.

³ A nga bo mam me ne mvaé e mise me Nti; a nga bo jam ese ane ésaa wé Amatsia.

⁴ V'akôsa bo nalé, bito ya bikôndô'ô yôp bi nji ke vas; bôt be nga ke ôsu a ve mimvean a beôlobinda e bito ya bikôndô'ô yôp.

⁵ Nti a nga bôme njô bôt a ôkone *zam, akekui e *môs a nga wu, ajô te a nga too e *nda é tele étam. Yôtam, e mone njô bôt, a nga jôô mame ya *nda a jô'ô fe bôte ya si.

⁶ Mimboon mivo'o Azaria, mam mese a nga bo, me ne ntilan e kalate minkañete bejô bôte ya Yuda.

⁷ Azaria a nga bômbô baa b'ésaa, a be nga jame nye baa b'ésaa e tisone David. Mone wé Yôtam a nga jôô éjiane jé.

Zakari, njô bôte ya Israél

⁸ Mbu mewôm mela a muam Azaria njô bôte ya Yuda a nga jôô, ñwô Zakari, e mone Yérôbôam, a nga tebe njô bôte ya Israél tañe ngon ésaman e Samari.

⁹ A nga bo mam me n'abé e mise me Nti avale b'ésaa be nga bo; a nji sa'ale mbia mimboone Yérôbôam, e mone Nébat, mmie a nga dutu Israél na a bo.

¹⁰ Kalum, e mone Yabés, a nga bôndé fe'e ya wôé nye, a nga bibi nye bôt be lôô, nde a nga wôé nye a jôô éjiane jé.

¹¹ Mimboon mivo'o ya be Zakari mi ne ntilan e kalate minkañete bejô bôte ya Israél.

¹² Nalé a nga boban aval'ane mejô Nti a nga kobô Yehu me mbe na: Bone bôé ba ye tabe éto njôane ya Israél a kui miaé nyini! A e nga bobane nalé.

Kalum, njô bôte ya Israél

¹³ Kalum, e mone Yabés, a nga jôô mbu mewôm mela a ébulu Ozias, njô bôte ya Yuda a nga jôô. A nga jôô tañe ngone jia e Samari.

¹⁴ Menahém e mone Gadi, a nga bet, a kôlô'ô Tirsa, nde a nga zu Samari a bibi kalum, mone Yabés e Samari. A nga wôé nye a jôô éjiane jé.

¹⁵ Mimboone mivo'o ya be Kalum a ékôane mewôé me môt a nga bo, mam mete me ne ntilan e kalate minkañete bejô bôte ya Israél.

¹⁶ Ane Menahém a nga bibi tisone Tirsa, a ba bese be nga too été, a éfuse si jé ataté Tirsa. A nga bibi tison éte amu é nji yooé mimbé mié, a nga sale mebum mese ya binga be mbe mebum.

Menahém, njô bôte ya Israél

¹⁷ Mbu mewôm mela a ébulu Azaria, njô bôte ya Yuda a nga jôô, ñwô Menahém e mone Gadi, a nga tebe njô bôt ya Israél. A nga jôô tañe mimbu awôm e Samari.

¹⁸ A nga bo mam me n'abé e mise me Nti. Nté ôse a nga vee, a nji sa'ale mbia mimboon Yérôbôam, e mone Nébat, a nga dutu Israél na a bo.

¹⁹ Pul, njô bôte ya Asiri, a nga zu e si jé, a Menahém a nga ve Pul betalañ be argent toyini, na a volô yemete nye éto njôan e mo mé.

²⁰ Menahém e nga nyoñe argent ate e be ba bese ya Israél be mbe minkukum, ane be ne ve njô bôte ya Asiri môt ase besikel be argent mewôm metan. Ane njô bôte ya Asiri a nga bulan teke ñhe fe beta tabe e si ya Israél.

²¹ Mimboon mivo'o Menahém, mam mese a nga bo, me ne ntilan e kalate minkañete bejô bôte ya Israél.

²² Ménahém baa b'ésaa be nga bômbô vôme wua. Mone wé Pékahia a nga jôô éjiane jé.

Pékahia njô bôte ya Israél

²³ Mbu mewôm metane Azaria, njô bôte ya Yuda a nga jôô, ñwô Pékahia, e mone Menahém a nga tebe njô bôte ya Israél e Samari. A nga jôô mimbu mibaé.

²⁴ A nga bo mam me n'abé e mise me Nti, a nji ke sa'ale mbia mimboon Yérôbôam, e mone Nébat, a ga dutu Israél na a bo.

²⁵ Péka e mone Remaliahu, mbe'e ébene wé, a nga bôndé fe'e ja kpwé nye éto njô bôt; a nga bibi nye e Samari a too ôleme ya *nda njô bôt, nalé fe Argôb a Arié; A nga bili bôt mewôm metan ya bone Begaladite. Nalé a nga wôé Pékahia a jôô éjiane jé.

²⁶ Mimboone mivo'o ya be Pékahia a mam mese a nga bo, me ne ntilan e kalate minkañete bejô bôte ya Israél.

²⁷ Mbu mewôm metan a baa Azaria, njô bôte ya Yuda a nga jôô, ñwô Péka e mone Remaliahu a nga tebe njô bôte ya Israél e Samari. A nga jôô mimbu mibaé.

²⁸ A nga bo mam me n'abé e mise me Nti; a nji ke sa'ale mbia mimboone ya Yérôbôam, e mone Nébat a nga dutu Israél na a bo.

²⁹ Melu Péka, njô bôte ya Israél, mme Tiglat-Piléser, njô bôte ya Asiri a nga zu a nyoñe Iôn, Abél-Bét-Maaka, Yanôa, Kédés Asor, Galad a Galilé, si ése ya Néftali, a nga kee bôte ya été minkôm e Asiri.

³⁰ Ozé, e mone Ela, a nga bôndé fe'e ja vaa Péka, e mone Remaliahu éto njô bôt; a nga bibi nye a wôé nye. A nga jôô éjiane jé e mbu mewôme baa Yôtam, e mone Ozias a nga jôô.

³¹ Mimboon mivo'o ya be Péka, mam mese a nga bo, bi ne ntilan e kalate minkañete bejô bôte ya Israél.

Yôtam, njô bôte ya Yuda

³² Mbu baa Péka, e mone Remaliahu, njô bôte ya Israél a nga jôô, ñwô Yôtam, e mone Ozias, a nga tebe njô bôt e Yuda.

³³ A nga bili mimbu mewôm mebaé a mitan éyoñ a nga tebe njôô, a a nga jôô mimbu awôm a misaman e Yérusalém. Nyia a mbe jôé na Yérusa, ngone Sadok.

³⁴ A nga bo mam me ne *zôsôô e mise me Nti. E mfa'a ya jam ese, a nga bo ane ésaa wé Ozias a nga bo.

³⁵ Ve da na, bito ya bikôndô'ô yôp bi nji ke vas; bôt be nga ke ôsu a ve mimvean a beôlobinda e bito ya bikôndô'ô yôp. Yôtam a nga lôñe *mbé ya *nda Nti ô n'ôyabe yôp.

³⁶ Mimboon mivo'o ya be Yôtam, a mam mese a nga bo, bi ne ntilan e kalate minkañete bejô bôte ya Yuda.

³⁷ Melu mete Nti a nga taté na a lôme Retsin, njô bôte ya Siri, ba Péka e mone Remaliahu na be wosane Yuda.

³⁸ Ane Yôtam a nga bômbô vôme wua baa b'ésaa e tisone David ésaa wé. E mone wé Akaz a nga jôô éjiane jé.