1 Bb. 8 - Kalate Zambe Nnomo a Mfefe Mfefé Nkôñelan

Mveane Zambe * nda . Meye'elane Solômon Zambe a yené be nye éyoñe baa

¹ Ane njô bôte Solômon a nga sulane bemvendé y'Israél, bivete bise ya *meyoñ, bi ya menda me bôte me bone b'Israél e fefele jé Yérusalém na, be vaa éwolo élate Nti Sioñ, tisone David.

² Ane bôte bese y'Israél be nga sulan e fefele njô bôte Solômon e ngone Etanim nje é ne ngone zamgbwale, éyoñ abôk é né.

³ Ane bemvendé bese y'Israél be nga sulan a betuni be nga be'e éwolo.

⁴ Ane be nga nyoñ éwolo Nti, e *nda éndelé bendôba'an, a biôm bise bi n'étyi bi mbe *nda éndelé. Betuni a Belévit mbe be nga kee bie.

⁵ Njô bôte Solômon, a ékôane bôt ése y'Israél a nga bañete e fefele jé, be nga tebe asu éwolo. Be nga tyi'i mintômba a benyak abui teke alañé, nge ayemé tañ bi mbe.

⁶ Betuni be nga zuu éwolo élate Nti e vôme wé, e vôm a ne ntelan étyi e *nda été, e vôm a dañ étyi, a kui mefabe Bekerubime si.

⁷ Amu Bekerubim be nga ndamé mefabe map e yôbe ya vôm éwolo élat é nga yiane bômbô. Bekerubim be nga buti éwolo a mimbôñe mié yôp.

⁸ Nté mimbôñ ô nga volô na be yen meku'u map ô tele vôm a n'étyi, ve teke yené éyoñ ô tele atan. Mi ne valé a zu kui môse wu.

⁹ Teke jôm éfe é mbe éwolo été ve bifase meko'o bibaé ya Môze a nga bôé été e nkôle Oréb, éyoñe Nti a nga bo élat a bone b'Israél éyoñ be nga kôlô si y'Ejipte.

¹⁰ Eyoñe betuni be nga kôlô vôm a n'étyi, *nkut ô nga yandane Ndaa Nti.

¹¹ Betuni be nji fe bo ngule ya tabe été na, be bo ésaé, amu *nkut abui, amu étôto'o Nti é nga jalé Ndaa Nti.

¹² Ane Solômon a nga jô na: Nti a nga jô na, a ye tabe e dibi été!

¹³ Eyoñe ji me lôñeya wo vôme ya tabe, e vôm wo ye tabe nnôm éto!

¹⁴ Ane njô bôt a nga kôñelan asu dé a botan ékôane bôte ése y'Israél. Ekôane bôt ése y'Israél é nga tele tetele.

¹⁵ Nd'a nga jô na: Ébotan a Nti, Zamba Israél, Nyô a nga kobô Esaa wome David a anyu dé ebien, a nye a jalé jam a nga jô a ngule jé;

¹⁶ ataté môse me nga vaa Israél ayoñe dam Ejipte, me nji tabe tison éziñ ézezañe *meyoñ mese y'Israél na, be lôñe *nda été e vôme jôé dam da ye tabe, ve me nga tobe David na a bo nteb'ôsu ya ayoñe dam Israél.

¹⁷ Esaa wom David a nga bi nkômbane ya lôñe jôé Nti, e Zambe Israél *nda.

¹⁸ Ve Nti a nga jô Esaa wome David na: Amu ô biya nkômbane ya lôñe jôé dame *nda, ô nga bo mvaé ya bi jame te e *nlem.

¹⁹ Ve jame da na, saa ke wo wo ye lôñe nda; nyô mon nyô a ye vame *miñya miôé, nye a ye lôñe jôé dame *nda.

²⁰ Nti a tôéya nkobô a nga kobô. Me tebeya éjian ésaa wome David, avale Nti a nga jô, a me lôñeya jôé Nti, e Zambe Israél *nda.

²¹ Me ba'aleya ngume vôm été asu éwolo, e vôm élate Nti, élat a nga bo a b'ésaa bangan éyoñ a nga vaa be si y'Ejipte.

²² Ane Solômon a nga tebe tetele ôsu ata'a metuna'a Nti, a tele ékôane bôt ése y'Israél ôsu. A nga same mo yôp a jô na:

²³ A Nti, e Zambee Israél! Zambe mfe a nji bo ane wo, nge yôp mfa'a ya yôp, nge si mfa'a ya si; wo ba'ale élat a *mvam e be bebo bisaé bôé ba wulu vôm ô né a *nlem ôse!

²⁴ Avale te nde ô ba'aleya mfa'a mbo ésaé wôé, ésaa wom David, e jam ô nga jô nye, a e jam ô nga jô a anyu dôé, wo tôé de e môse wu a wo wôé.

²⁵ Eyoñe ji a Nti, e Zambee Israél, ba'ale'e, asu mbo ésaé wôé, ésaa wome David, e jam ô nga jô nye na: Ôsu viam, wo ye bo te jembane môt a tyendé wo éto njôan y'Israél nnôm éto, ma yi ve na bone be wulu mezene mam été ane da yian, be wulu vôm me né avale ô nga wulu vôm me né.

²⁶ Eyoñe ji, a Zambee Israél, nkobô ô nga kobô mbo ésaé wôé, ésaa wome David, ô ntoo ñhe ve tôéban!

²⁷ Ve jé! Ye Zambe a ye fo'o tabe e si? Tame yen, môp a môbe ya môp me se nguleya yiane wo, ngumane ki *nda me maneya lôñe nyô!

²⁸ Ve jame da na a Nti, e Zambe wom, tuka'a vô'ôlô meye'elan me mbo ésaé wôé a minja'ane mié, ñyôn a meye'elan mbo ésaé wôé a liti wo e môse wu.

²⁹ Tame kui e mise môé e *nda nyô alu baa *môs, e vôme womien ô nga jô na: Jôé dam da ye tabe valé! Vô'ôlô'ô meye'elane mbo ésaé wôé a bo e vôme nyô.

³⁰ Wo ye wô'ô minja'ane mi mbo ésaé wôé a mi ayoñe dôé Israél, éyoñ ba ye ye'elan e vôme nyô. Wo wo ye wôk, e vôm ô too, e yôb été; wo ye wôk a wo ye jamé!

³¹ Nge môt a bo môt a ne nye bebé *abé, a ba tindi nye na a kane ngana, nge ngana ja boban ôsu ya ata'a metuna'a dôé, e *nda nyô,

³² wo wo ye wôk, ô too yôb été, wo ye bo jam éziñ, a wo ye tyi'i bebo bisaé bôé ajô a ve môt a ku étom mekua, a bulane mboone wé e nlô wé yôp, mfa'a ya kale nyô a ne *zôsôô a bo nye aval'ane *zôsôô wé a né.

³³ Eyoñ ayoñe dôé Israél da ye yiteban ôsu besiñ, amu mboon *abé be boya wo, nge ba bulane be wo a kañe jôé dôé, nge ba ye'elane wo a sili wo mam e *nda nyôna,

³⁴ wo wo ye wôk ô too yôp, wo ye jamé *abé ya ayoñe dôé Israél a bulane zuu be e si ô nga ve b'ésaa bap!

³⁵ Eyoñe yôp da ye diban, mveñ te fe nnoñ, amu *abé be ne nguleya bo wo, nge ba ye'elan e vôme nyô, be kañe jôé dôé a jô'é *abé dap,

³⁶ amu nsamelan wo ye samele be, wo wo ye wôk ô too yôp, wo ye jamé *abé bebo bisaé bôé a di ayoñe dôé Israél. Amu wo ye ye'ele be mbamba *zen ba yiane wulu été, a wo ye noo mveñ e si ô nga ve bôte bôé ane ngap!

³⁷ Eyoñe mfumbale zaé a ye kui e si, éyoñe bim a ye kui, éyoñe mieñgele *nkôtan bidi bia ye bo, éyoñe bitandak a bemba'asane ba ye kui,

³⁸ éyoñe besiñ ba ye bômane bôte bôé e si jab été, e mimbé miap, éyoñe bibubua mevale mese a akon bia ye bo, meye'elan mese a minja'an mise avale môt ese e ne nguleya liti wo asu ayoñe dôé Israél, a môt ase a yeme meveñe ya nleme wé a a same mo e mfa'a ya *nda nyô,

³⁹ wo wo ye wô'ô nye e yôp, e vôm ô too; wo ye jamé, a bo ane wo yene mvaé, a bulane môt ase aval'ane mezene mé me né, amu wo étam wo yeme nleme bôte bese.

⁴⁰ Eyoñe te ba ye ko wo woñ, éyoñ ése ba ye nyiñ éfuse si ô nga ve b'ésaa bangan.

⁴¹ Avale te fe mfa'a mone bikuu a nji bo môte ya ayoñe dôé Israél, éyoñ a ye so si é n'ôyap, amu jôé dôé,

⁴² amu ba ye yeme na jôé dôé e n'anen, akule wo dôé ngu a wo wôé nsaman, éyoñ a ye zu ye'elan e *nda nyô,

⁴³ wo wo ye wôk e yôp, e vôm ô too, a wo ye ve nneñ e jôm ése a ye sili wo meye'elane mé été, nalé *meyoñ mese ya si ma ye yeme jôé dôé a ko wo woñ, aval'ane ayoñe dôé Israél, a be yeme na ba loone jôé dôé e *nda me maneya lôñe nyô!

⁴⁴ Eyoñe bôte bôé ba ye ke wosane besiñe bap, be tôñe e *zen wo ye liti be, nge ba ye'elan Nti be lôô e tison ô nga top, a *nda me maneya lôñe jôé dôé,

⁴⁵ wo ye wô'ô meye'elane map ô too yôp, nalé fe minja'ane miap, a kale ajô dap!

⁴⁶ Eyoñ ba ye bo wo *abé, amu teke môt a ne te bo *abé, éyoñe wo ye yaa be a kalane be e mo besiñ, éyoñe ba ba ye bi be minkôm ba ye kee be minkôm e si besiñ, é too ôyap nge bebé,

⁴⁷ nge ba bulan e be bebien be too e si be nga kee be minkôm, nge ba bulane be wo, nge ba sili wo mam be too e si ba be nga kee be minkôm a jô na: Bi maneya bo *abé, bi bili minkoban, bi boya jam e n'abé!

⁴⁸ Nge ba bulane be wo a nleme wob ôse, a ényiñe jab ése; be too e si besiñ be nga kee be minkôm, nge ba ye'elane wo mesu me lôô mfa'a si ô nga ve b'ésaa, e tison ô nga top, e *nda me maneya lôñe jôé dôé,

⁴⁹ wo ye wô'ô yôp, e vôm ô too, meye'elane map a minja'ane miap, a wo ye ve be mekabe.

⁵⁰ Wo ye jamé bôte bôé *abé dap be boya wo a mbia be mam bese be boya; wo ye bo na, bôt be bili be minkôm be nyoñe jame te ane jame ya ko be éngôngo, a ba ye ko be éngôngo.

⁵¹ Amu be ne bôte bôé a ngabe jôé, ba ô nga vaa Ejipte, ézezañe mbe'e nduan étyé!

⁵² Tame ku'i mise môé, e minja'an mi mbo ésaé wôé a mi ayoñe dôé Israél, a wô'ô be éyoñ ése ba ye loone wo!

⁵³ Amu wo ô nga kandé be a *meyoñ mevo'o mese ya si, a bo be ngabe jôé, aval ô nga jô e be mbo ésaé wôé Môze, éyoñ ô nga vaa b'ésaa bangan Ejipte, a Nti a too nnôm éto!

⁵⁴ Eyoñe Solômon a nga mane tote meye'elan mese ma a minja'ane mi, a nga kôlô si, ôsu ya ata'a metuna'a, e vôm a nga kute meboñe si, mo me same mfa'a ya yôp.

⁵⁵ A tele tetele, ane a nga botan ékôane bôt ése y'Israél tyiñe yôp a jô na:

⁵⁶ Ebotan a Nti, nyô a veya ayoñe dé Israél awo'on, aval'ane jam ese a nga jô e né! Mbamba mejô mese a nga kobô be Môze mbo ésaé wé, teke ajô da e li'iya te tôéban.

⁵⁷ Nti, e Zambe wongan, a tabe'e be bia avale a nga too be b'ésaa bangan,

⁵⁸ a bo'o te li'i bia nge vuane bia, ve a dutu'u minleme miangane be nye, nalé bia ye wulu mezene mé mese été a ba'ale mebendé mé, minjôane mié a memvinda mé mbie a nga ve b'ésaa bangan.

⁵⁹ Mejô me maneya kobô ane meye'elan be Nti, me tabe'e Nti, e Zambe wongane bebé *môs baa alu, a a va'a mbo ésaé wé a ayoñe dé Israél mekabe *môs ane *môs.

⁶⁰ Nalé *meyoñ mese ya si ma ye yeme na, Nti nye a ne Zambe a mfe a nji bo.

⁶¹ Va'ane nleme wônan ôse be Nti, e Zambe wongan, aval e ne môse wu, asu ya wulu aval'ane miñye'elane mié mi né a ba'ale mebendé mé.

⁶² Ane njô bôt a Israél ase be nga ve *bityi'a asu be Nti.

⁶³ Ane Solômon a nga ve étyi'a, étyi'a ya nlatane ngbwa nje a nga ve Nti: benyak toyini mewôm mebaé a ébaé, mintômba toyini ntet a mewôm mebaé. Eyoñe te njôô a bôte bese y'Israél be nga dii ndaa Nti

⁶⁴ *môs ôte, njô bôt a nga telé ézezañe ya nseñ ô ne ôsu ya ndaa Nti étyi; amu be nga ve *bityi'a bi ne ngumba, mimvean mi avut, a mevoñ, *bityi'a ya nlatane ngbwa.

⁶⁵ Solômon a nga jem abôk éyoñe te baa Israél ase. Beta ékôane bôt be so'o anyiin Anat, a kui ôtôñe y'Ejipte, be nga tele asu be Nti, e Zambe wongan, tañe melu zamgbwa a melu mefe zamgbwa, mese melu awôm a menyin.

⁶⁶ E môse muame, nde a nga suu bôt. Be nga botane njô bôt a bulan e menda bindelé map; be nga bo mefôn, *nlem njalan a mevak, amu mvaé ése Nti a nga bo mbo ésaé wé David a Israél ayoñe dé.