Titus 3 - Ɓwaatiye New Testament

Ɗa sa pepe

¹ Zə ɗyanga myee dəw təna vədə nəngrən a haka həmye ka myee ka gətə dɨ nidə njiya tən ta koddərən. Təna ɓərə ta ɗa sa pepe.

² Ɓe tənaawa kɨɗa kwakɨ ɓwaare ka lamdəha, ndɨka təna gə ka nzaa hamama, tən ta ɗyanga ka ɓwaare, təna nza ka nagi ndo ma ka hyatane.

³ Hɨm mgban sə hɨm a gəm a nzatɨrə kɨnɨnɨng, hɨm dəɗi hɨmaawa kɨl byelə satə, mya vwakarəm a ɗɨkdəm a vor kɨsawnə mwo nɨngtɨ vɨratə. Hɨm a nzamə vor nggwonshe ka jiwne, ɓwaare ɓa nda kwo nəngəm, hɨm ɓa nda kwomnəsə.

⁴ Shezə ite Həmɨnpwa Nzə-mbəsəm a wulakam ka pepetə ka mwoha dan,

⁵ də nda mbədəm aa gəkɨlə ɗa səfeme dam, shezə gələ nda ɗa purusəm a mbədəm dɨ ha suɓwate nda suɓwagəm, a mɨnadəm mi hweli dɨ haka Pitɨ Ɗəmɗəmtə.

⁶ Pitɨ Ɗəmɗəmtɨngɨn nə Həmɨnpwa a lyanashe kaarə ngga janga a nəngəm kɨr-kɨr dɨ haka Yesu Ma Həmɨnpwa a Yaɓwarən Nzə-mbəsəm.

⁷ Gə-angɨn beetɨ ite Həmɨnpwa a sawuɗam dɨ ha wuladəha dan, hɨm a gəm hɨm nə je dan 'ye ɓa ɗɨm myente kaaru-kaaru.

⁸ Ləmanə diyalə mya boyo. Hɨne dɨ mwi atɨ hye bwe ləməgingɨn a nzadərən dwat gə myee mwaka Həmɨnpwa a ɗadə kangsərən pepe a ɗa sa wula ka hubosərən hiɗə. Ləməginə i pepeyi gbaka, tən ɓa gwadə nagi ndo ma.

⁹ Hye təkəsə ka məntəmə ɓaatə ka gbaamitɨ kwirə yə sɨnggu ka ndɨlkasətə ka məntəmətə a nə ɓashita Musa, gəkɨlə wule shingɨn kat aa dɨ gwadəha, ləməgi ɓayi kat.

¹⁰ Wule ma dɨ taka waka ɓwaare, hye gɨrarən a fyel-kwakingɨn, hye mɨna mɨn-magba a gɨrarən. Anda ndaa kɨlə, hye təkəsə kan.

¹¹ Hye leyə ka diyale atɨ wule mangɨn kwa hubosən takə vor səhase, ɓə bɨldə sate atɨ ndi ɓashiyə lɨbadə nəngɨn.

Ləməgi kpawtə

¹² Hɨnə ɓa lyen Artimas naasə mgban Tikikus, anda wonə a vorsərən tɨlə hakəw, hye ɓərə a shi hake a Nikapolis gə a hangɨn hɨn ɓa nza ka ɓoolanə.

¹³ Hye gwadə Zinas nzə-lee kəndə ɓashitə ka Apolos gə omote tən ɓa ɗatɨrə, vərən nagi ndo sə a ɓa gwadərən ka omotɨngɨn.

¹⁴ A myee dam a ɗɨkdə nəngrən ta ɗa sə pepeye gə tən tawa gwadə myee kana, ɓe tənaa pɨrə nzaa ɓaatə a gə mi ɓayi.

¹⁵ Minə ganə a hake kat nə dɨ wunakəw. Hye wanaka ji-nuwogəm 'ye dɨ mworəm a vor kottə. Maa wuladəha da Həmɨnpwa a nza ɓwaa kəwnə kat.