Titus 2 - Ɓwaatiye New Testament

Wule shee kana mya kənə mbiɗitɨ ɓwaare

¹ Hɨnggu hye kənə ji-kottə shee twa a daatɨfe da Həmɨnpwa.

² Hye kənə mi kpan-kpani morye shee a nə hamsɨtə, təna gə ka tikɨstə. Tən ta kɨt nəngrən a kangə dwat a nə mwadiyale ka mwoha ka ɓwamosowe.

³ Sə mgban hye kənə mi kpan-kpani mandye shee tən tawa koɗə Həmɨnpwa a fukadən. Ɓe təna gəə ji-lamdəha ka kɨɗa kwakɨ ɓwaare, ɓe tənaawa sop vwe ta kpashi kan, təna kəndə sa pepe.

⁴ Sə mgban təna kənə mandyee aa tɨlkarən a kyawatə ɗate tən ɓa ɗa təna mwo moryingrən ka jingrən.

⁵ Təna kɨt nəngrən a nza ɗəmɗəm tən ta lyenə vor hwodarən. Tən ta gwadə ɓwaare, tən ta vədə nəngrən a haka moryingrən gə ɓe mbiɗitɨ ɓwaare aa ushi le da Həmɨnpwa.

⁶ Sə mgban hye gwadə mbiɗitɨ ji-mattə morye təna ham sɨsərən pepe.

⁷ Nagi a vor ndo sə kat, hye ta bɨlərən sa pepe dɨ ha wetɨ dəw. Hye kənərən shee ka tikɨstə ka hubosa hiɗə

⁸ ka byelə twaye, a wule a ama aa dɨ nidən ɓaa, gə sopye a gə ji-kwo nanga gə ɓe tənaa ɗɨm lə hasa tən ɓa boyə nəngəm.

⁹ Kənə kɨse shee, hye boyərən tən ta vədə nəngrən a haka yə həmi hwodarən a ndukodərən a nagi ndo tɨfə mya koɗə kaarən. Təna ɗa shee haa ɓawa nɨngə həmi hwodarən kaarən, ɓe tənaawa luwa le a kwaamɨngrən,

¹⁰ ɓe tənaa hɨrə həmi hwodarən. Təna bɨldə sate atɨ tən kənə mya mwakarən, gə dɨ ha wetɨ darən ka byele darən ka lyentɨ pepetɨ darən kat, mbiɗitɨ ɓwaare ɓa ɗa hɨmnə le da Həmɨnpwa ndi Nzə-mbəsəm.

¹¹ Həmɨnpwa a wulakam gələ nda shi ka nagi ndo ma ka mbəha.

¹² Wulahangɨn nə kənə miye atɨ mya kwo səhase kat ka mwo shi vɨratə, gəkɨlə mya kɨt sɨsəm ka tikɨstə ta koɗə Həmɨnpwa pepe a vɨratɨnə.

¹³ A mya kulam ka bədə myentə a nə fəra Həmɨnpwa Magbake ka Nzə-mbəsəm ndi Yesu Ma Həmɨnpwa a Yaɓwarən ɓa mɨna a vɨratə ka fukatə.

¹⁴ A ndi Yesu ma vədə nəngɨn gə le dam gə nda luwarəm gə təfəgi ɓiya ɓashitə kat, nda suɓwagəm gə hɨm a gəm mi ɗəmɗəmi a myee hɨnggə Həmɨnpwa nə ka hɨmnə ɗa səfeme.

¹⁵ Wule shinə nə 'ye kana hye kənə ɓwaare. Zə gwadəha hye gɨraha ka gəte kəw, ɓe mwa ama a ushira.