Romye 9 - Ɓwaatiye New Testament

Həmɨnpwa a nggɨl mi Israila

¹ Ləma na dɨ boyo diyalə aa jeronyi, gələ hɨnə hɨnggə Ma Həmɨnpwa a Yaɓwarən. Pitɨ Ɗəmɗəmtə bɨli bwang a vor səɗə-yedye de atɨ aa jeronyi na dɨ kəsə atɨ,

² le nə dɨ hashi a huboshi kɨr-kɨr gə tən mi Israila.

³ Taa kwo sate atɨ Həmɨnpwa a nda hiwdi a take ka Ma Həmɨnpwa a Yaɓwarən gə le darən tən ji-baagi,

⁴ mi Israila. Həmɨnpwa a mɨndərən jingɨn nə, nda vərən fukatɨ dan, nda kɨləsə kaarən a nə shee som-som, təna luu ɓashitɨ dan, a ɗɨm humwatə gə təna kalan-gbəətə a vor Shafe. Sə mgban nda nzarən də le a nə shee hananang.

⁵ Tənə myee dɨma dɨ kwirə yə jigəm Ibɨraim, ka Ishaku, ka Yakubu, dɨ kwirəngɨn mgban Ma Həmɨnpwa a Yaɓwarən a dɨma, mya mwasarən ɓwaara. Sɨnə Həmɨnpwa a nə nagi ndo sə a vɨratə kat, sɨnə kana mya ɓondirən kaaru-kaaru! Amin.

⁶ Mye ɓa sa atɨ ləməgyee kat Həmɨnpwa a boyo a nzadərən aa naa ma? Ə'ə, hwuna leyə atɨ aa myee kat a vor mi Israila nə Həmɨnpwa a nggɨlə gə təna gə vor myee dan.

⁷ Aa myee kat dɨma dɨ kwirə Ibɨraim nə je dan, gəkɨlə Həmɨnpwa a sa Ibɨraim atɨ, “Myee ɓa dɨma dɨ kwirə Ishaku nə ɓəmbə mya bəltɨrən atɨ jinga.”

⁸ Naarə ləngɨn nə atɨ, aa je kat mya mwasa dɨ sɨtə a hara ka zaambe nə je da Həmɨnpwa, shezə je mya mwasa dɨ la Həmɨnpwa a boyo a nzadən nə, tənə diyalə jee mya bəltɨrən dɨ kwirə Ibɨraim.

⁹ Gəkɨlə la Həmɨnpwa a boyo a nzadən a vor korminə nə atɨ, “Fərəngɨn kana kənə, Saratu ɓa mwasa nze na ɓə mɨna.”

¹⁰ Aa ləngɨn nə ɓəmbə, je da Rabeka nə ka baatə hiɗə, sɨnə jigəm Ishaku.

^11-12 Ite myaa nda mwasa ji-zaryingɨn, a ite tənaa nda ɗa a səfemə ndəng a səhasə, Həmɨnpwa a sa Rabeka atɨ, “Jibiye ɓa gəə kɨsa a haka mufe.” Gə-angɨn a bɨldə sate atɨ waha da Həmɨnpwa aa kangə nə səfema ɓwaara a ɗa, shezə ndi ka nənəngɨn nda dɨ nggɨl ɓwaare ɓətɨya nda dɨ mwo.

¹³ Ɓətɨ mya doro atɨ, “Yakubu nə na mworən, a kwo Isuwa.”

¹⁴ Ɓə a shiya mye ɓa sa ka ləngɨn? Mye ɓa sa atɨ Həmɨnpwa aa ɗa sə pepeye? Ə'ə nagi kəng-kəng.

¹⁵ Gəkɨlə Həmɨnpwa a boyo Musa atɨ, “Hɨn ɓa ɗa purutɨ ma hɨn ɓa ɗa purusən, hɨn ɓa wula ka ma hɨn ɓa wulakan.”

¹⁶ Gəkɨlə angɨn nggɨlha da Həmɨnpwa, ka waha dan aa gəkɨlə kanata ɓwaara, aa gəkɨlə sa ɓwaara a ɗa mgban, angɨn ndə puruta Həmɨnpwa nə.

¹⁷ Gələ a vor Malɨmtɨ Ɗəmɗəmtə Həmɨnpwa a boyə Firawna hama Ijip atɨ, “Hɨnə vu həmne gə na bɨldə gətɨ de a nanga, na ɗa lyentə a bɨldə nyerətɨ de gələ kwaka a ngguro a mbəgə vɨratə kat.”

¹⁸ Gə-angɨn Həmɨnpwa a dɨ bɨlə ma nda mwo ɓa bɨlən purutə, nda dɨ və ama yedi kɨr-kɨrye ɓətɨ nda dɨ mwo.

¹⁹ Ama ɓa ɗiyə atɨ, “Ɓə ya Həmɨnpwa a dɨ mɨna ɗɨmgə ɓwaare le a kəttɨrən ka səhase ɓə? Wonə ɓa mba kwotə a kwo sa Həmɨnpwa kana?”

²⁰ Kək! Nda hyenə wonə mgban, a hye ɓwaara, hye ɓa ɓə mwamdiya a luwa le a kwaamɨ Həmɨnpwa? Ɓə soɓwe ɓa ɗiyə nzə-nwoshe atɨ, “Ya hye ɓə nwori yang?”

²¹ Nzə-nwo dwe kat, a sa nda mwo nə ndi ɓa ɗa ka soɓwe? Nda nwo dwe som-som, i dwe gə lyentɨ fawne, 'ye mgban gə lyentə fərə-fərə a hwoɗye ka soɓwo hiɗəti.

²² Ɓə mɨnə də na Həmɨnpwa mwa ɓa bɨldə yedi-kɨttɨ dan gə mya naa gətɨ dan, nda ɓə shea nggur mbasɨtə kɨr-kɨr ka myee kana təna nda yerə ɓaa?

²³ Ɓə anda Həmɨnpwa a ɗaasə gə nda bɨldə gbaktɨ fukatɨ dan a hakarən tən myee nda ɗa purusərən, a tən myee nda nzadərən kɨnɨnɨng gə fukatɨ dan –

²⁴ nagi nda hɨm nə myee nda warəm, aa dɨ vor Yawude ɓəmbə, shezə dɨ vor myee aa Yawude mgban?

²⁵ Ɓətɨya Həmɨnpwa a boyo dɨ kwaamɨ kpale Hosaya atɨ, “Wule myee aa hɨngginə, tənə hɨn ɓa watɨrən atɨ, ‘Myee de.’ Ka nggi mete myaa mwotɨrə, kotə hɨn ɓa watɨrə atɨ, ‘Nji-maare de.’ ”

²⁶ Sə mgban, “A tɨnyi haa mya sarən atɨ, ‘Aa hwunə myee de,’ a hangɨn mya watɨrən atɨ, ‘Je da Həmɨnpwate ka myentə.’ ”

²⁷ Ɓətɨya kpale Ishaya a boyo ka kormɨ kpane a nə mi Israila atɨ, “Nagi mi Israila a furo ɓətɨ tiya a kwaka gbɨnuwtɨ sɨkorən nə, ɓwaare ɓyeləng dɨ vorsərən nə ɓəmbə ɓa ɗɨm mbətə.

²⁸ Gə aa dɨ ɓongə Həmɨnpwa ɓa ɓashidə vɨratə tan-tan baa kpawsə.”

²⁹ Ɓətɨya Ishaya a boyo kɨnɨnɨng, “Naa gəkɨlə Həmɨnpwa Həmɨ gətə a mbiɗa imi ɓyeləng a vor mi Israila, mye ɓa nda gəm ɓətɨ mi vɨraa Sodom, sə mgban mye ɓa nda gəm ɓətɨ mi vɨraa Gomora.”

Ɗongə mwadiyale da mi Israila

³⁰ Ɓə a shiya mye ɓa sa ka ləngɨn gəngna? Ləngɨn nə atɨ myee aa Yawude, tənaa ɓərə gə təna gəə mi pepeyi a humwa Həmɨnpwa, shezə nda bəltɨrən mi pepeyi dɨ ha mwadiyale darən.

³¹ Tən mi Israila myee ɓəri gə təna gəə mi pepeyi a humwa Həmɨnpwa dɨ ha koddə ɓashitə, ndaa bəltɨrən mi pepeyi.

³² Ɓə mɨnə ɗa? Gəkɨlə tənaa ɓərə gə təna gəə mi pepeyi dɨ ha mwadiyale, shezə təna ngguro ɓətɨ dɨ ha lyentɨ darən ɓəmbə tən ɓa gəə mi pepeyi. Səngɨn ɗɨki təna pawo nə “fara pawtɨngɨn.”

³³ Ɓətɨya mya doro atɨ, “Niyəm hɨn bədə fara a Siyona a ɓa gəə mgbaalə pawta ɓwaare, ka faraa ɓa ɗɨkdə ɓwaare təna fokə. Nagi wonə ma kat mwakan, sopye aa dɨ gə mangɨn.”