Romye 8 - Ɓwaatiye New Testament

Nzatə a vor gəta Pitə

¹ Gə-angɨn taayə ɓashitɨ wo a nə myee nza sɨtɨ Yesu Ma Həmɨnpwa a Yaɓwarən,

² gəkɨlə dɨ hakan gəta ɓashita Pite dɨ vədə myentə a dɨmdi gə ɓashita səhasa dɨ shi ka we.

³ Sa ɓashita Musa aa mban a ɗa gəkɨlə kadawo sɨtə a mɨndən ɓaa, sɨnə sa Həmɨnpwa a ɗa a ite nda lyana nzəngɨn nda nggur sɨte pasa kada sɨtɨ ɓwaara gə nda luwarəm gə səhase. Dɨ hangɨn nda lɨbadə kadawo səhasa nza sɨtɨ ɓwaara.

⁴ Həmɨnpwa a ɗa angɨn sə gə nda naadə sə pepeya ɓashitə a dɨ mwo dɨ hakam, hɨm myee aawa koɗə kadawo sɨtə, shezə mya nzam dɨ ha gwadəha da Pitə.

⁵ Wule myee dɨ koddə kadawo sɨtə, tənə myee ɗyangale darən a kangə nə sa kadawo sɨtə a dɨ mwo. Shezə tən myee dɨ koddə Pitə, ɗyangale darən nee kangə nə sa Pitə a dɨ mwo.

⁶ Ma ɗɨkdə ɗyangale dan kat a nə kadawo sɨtə, kpawsən nə we. Ma mgban ɗyangale dan a kangə nə sa Pitə a dɨ mwo, kpawsən nə ɗɨm myentə ka nzaa ɗoltə.

⁷ Ma ɗyangale dan a kangə nə kadawo sɨtə, nzə-nyaagə Həmɨnpwnə nə, kadawo sɨtə aawa və nəngrə a nə ɓashita Həmɨnpwa, nggaa dɨ mba angɨn a ɗa.

⁸ Wule myee kat dɨ koɗə sa kadawo sɨtə a bɨlərən, haa a dɨ nɨngə Həmɨnpwa kaarən.

⁹ Kat ka angɨn hwunaawa koɗə kadawo sɨtə, hwuna dɨ koddə sa Pitə a dɨ mwo, gəkɨlə diyalə Pita Həmɨnpwa nee ɓwaa kəwnə. Gə ma tam ka Pita Ma Həmɨnpwa a Yaɓwarən, mangɨn aa hɨnggən nə.

¹⁰ Shezə gə Ma Həmɨnpwa a Yaɓwarən nee ɓwaa kəwnə, sɨsəwnə nee a kwaamɨ we gə səhase, kat ka angɨn Pita Həmɨnpwa nee dɨ vəwnə myentə gəkɨlə ndi bəltəwnə hwun mi pepeyi.

¹¹ Anda diyalə Pita Həmɨnpwa ite maddə Yesu gə we nee ɓwaa kəwnə, Həmɨnpwatɨngɨn nə ɓa vəwnə myentə a nzaasəwnə a sɨtɨ soɓwa nə dəwnə dɨ haka Pitɨ dan ite ɓwaa kəwnə.

¹² Gə-angɨn ji-nuwo, le nə bə nəngəm, shezə aa ləmə koddə la kadawo sɨtə a dɨ mwo nə.

¹³ Hwun kana nza a dɨ koddə sa kadawo sɨtə a dɨ mwo, hwun ɓa mbərə. Shezə dɨ ha gwadəha da Pitə hwun kana ɓəl shee kadawo sɨtə a dɨ mwo, hwun ɓa ɗɨm myentə.

¹⁴ Gəkɨlə myee Pita Həmɨnpwa a dɨ koɗə kaarən, tənə je da Həmɨnpwa.

¹⁵ Wule Pite Həmɨnpwa a vəwnə, aa gəkɨlə Pitɨngɨn a mɨndəwnə kɨse nza vor kala ɓə, shezə nda vəwnə Pitɨngɨn gəkɨlə hwuna gəə hwunə je dan. Dɨ haka Pitɨngɨn mye ɓa sam kan atɨ, “Abba, Baatə.”

¹⁶ Pita Həmɨnpwa ka hɨnggəm takale atɨ hɨm nə je da Həmɨnpwa.

¹⁷ Sə mgban gə hɨm nə je dan, hɨm nə ɓa mɨnə shee nda bwe ləngrən ɓwaa ka Ma Həmɨnpwa a Yaɓwarən, hɨm kana gəm ɓwaa kan a vor tənətɨ dan sə mgban hɨm ɓa gəm ɓwaa kan a vor fukatɨ dan.

Fukate ɓaga shi

¹⁸ Hɨn leyə mbak-mbak atɨ wule tənəte mya gəmə vorsə ɓəgəng, myaa dɨ kanatɨrə ka wule fukate mya və miye a humwa.

¹⁹ Ɓəgəng a nzatɨnə nagi ndo sə a Həmɨnpwa a ɗarən a vor vɨratə nee dɨ kula ka hɨmnə sate atɨ Həmɨnpwa ɓa bɨldə je dan bwang.

²⁰ Gələ Həmɨnpwa a mɨndə shee nda ɗatɨrən a vɨratə kat təna yakə, aa atɨ ka mwotɨ shingɨn. Shezə ka mwosən ka bəə myentɨ dan ndi ma ɗatɨrən

²¹ ka sate atɨ a fərə nee də vɨratə kat ɓa ɗɨm nəngrə a dɨmgə mbətɨ ɓaatə. Təna ɗɨm nəngrən a pɨrə vor wule fukate Həmɨnpwa ɓa və je dan.

²² Mye leyəm kat atɨ baa a tɨla a nzatɨnə ɓəgəng, nagi ndo sə a vɨratə kat nee dɨ 'yesəwi ka sɨtɨ otə ɓətɨ mete a kwa-mwasati.

²³ Aa shi vɨratə nə ɓəmbə dɨ 'yesəwo vor sɨtɨ otə, kat ka hɨm myee luu həmtɨ Pitə, sɨnə kwamətɨ sa Həmɨnpwa a vəm. Hɨm nə dɨ 'yesəwo vor hubosəm ka hɨmnə sate atɨ Həmɨnpwa ɓa lurəm a gəədəm hɨm nə je dan, dɨ hangɨn hɨm ɓa piyamgə 'yesəwtə ka sɨtɨ otə.

²⁴ Gə a vor bəə myentɨnə hɨm a ɗɨməm mbətə, shezə bəə myentə a nə sa ma a nan aayə bəə myenti. Ɓə wonə ɓa bəə myensən a nə sa nda gə kan?

²⁵ Hɨm kana bəmdə myensəm a nə sa mye tam kan, mye ɓa kulam səngɨn ka mbasɨtə.

²⁶ Sə mgban Pitɨ Ɗəmɗəmtə a dɨ gwadəm gə taa mbarəti kam, hɨm aa leyəm ɗate kana hɨm a ɗam hiwtə, shezə Pitɨngɨn ka nənəngrə nə dɨ gwadəm dɨ nyisə Həmɨnpwa gə le dam ka 'yesəwtə ka wule kormye ɓwaara aa dɨ mbarən a boyo.

²⁷ Həmɨnpwa a dɨ pyel vor hubo ɓwaare kat, ɓə lee wule ɗyangale da Pitə gəkɨlə Pitɨngɨn a dɨ nyisə ɓətɨya Həmɨnpwa a dɨ mwo a nə myee nda vomiyərən.

²⁸ Hɨm leyəm atɨ a vor nagi ndo sə kat, Həmɨnpwa a dɨ ɗa lyentɨ fyemtə gə le darən tən myee dɨ mworən, a myee mya watɨrən a vorsa nda kana ɓa ɗa.

²⁹ Myee Həmɨnpwa a leetɨrən kɨnɨnɨng, tənə myee mgban nda tattɨrən gə təna pasa Nze dan, gəkɨlə Nze da Həmɨnpwa a gəə sɨnə ma kwamətə, a nə ji-nuwotə a tən ji-kottə kat.

³⁰ Myee Həmɨnpwa a tattɨrən, tənə nda wagatɨrən a hakan, myee nda wagatɨrən tənə nda bəltɨrən mi pepeyi, myee nda bəltɨrən mi pepeyi mgban, tənə myee nda fukadərən.

³¹ Ɓə a shiya mya sam ka lana? Anda Həmɨnpwa nee ɓwaa kam, wonə ma ɓa mwamdiya a kanggəm?

³² Həmɨnpwa aa kərdə Nzəngɨn Yesu, nda vədən gə le dam kat. Gə-angɨn ndaa dɨ hasə kam, ndi ɓa və miye shee kat.

³³ Wonə ka a lə som a nə myee Həmɨnpwa tattɨrən? Aɓə Həmɨnpwa nə bəltɨrən mi pepeyi!

³⁴ Wonə ma ɓa ɗam ɓashitɨ we? Aɓə Yesu Ma Həmɨnpwa a Yaɓwarən ndi ma mbɨri gə le dam, a nə angɨn, sɨnə Həmɨnpwa a maddən gə we ka myentə, sɨne a tɨfə zɨməngə Həmɨnpwa. Sɨnə mgban dɨ nyisə Həmɨnpwa gə le dam.

³⁵ Ɓə mɨnə ɓa mbam a takam ka mwote Ma Həmɨnpwa a Yaɓwarən a mworəm? Otɨ nzaa vɨrangnə nə ma? Tənəti? Tənədəha? Myati? Poriti? Shi hashi vɨrangnə nə ma? Naasə mgban wo ma?

³⁶ Ɓətɨya mya doro, “Gə le dəw mya dɨ tənəə denə, fərə-fərə hinə a kwaamɨ we, hinə ɓətɨ kwa mbagee mya kəsə ɓa por kwakasərən.”

³⁷ Ə'ə, kat ka shi hashingɨn, hɨm pɨrgə myee kɨt ne dɨ hakan ndi ma mworəm.

³⁸ Gə mbak-mbak hɨn mwaka sate atɨ taa asə də ɓa takam ka mwoha dan. Nagi wo, nagi myenti, nagi malyeni, nagi pɨle, nagi a nzatɨnə, nagi a nzate ɓaga shi. Nagi itɨ gəti,

³⁹ nagi gaarə a fintɨ pwa, nagi ganə a vɨratə. Taa asə də a vor vɨratə a ɓa mba takatə a takam ka mwote Həmɨnpwa a mworəm, a wule mwoha mya ɗɨməm dɨ haka Yesu Ma Həmɨnpwa a Yaɓwarən ndi Həmɨmiye dam.