Romye 7 - Ɓwaatiye New Testament

Kana le a nə ɓashitɨ nzaa hwoɗye

¹ Hwun ji-nuwogi, na dɨ byelə ka tən myee lee ɓashita Musa, hwunə ɓa lee lanə na dɨ boyo atɨ ɓashitɨngɨn nee ka gətə mba-mba a nə ma ka myentə.

² Kana ləngɨn nə yang, ɓashitə a boyo atɨ, mete nzaa hwoɗye ka mure, nggi ɓa nza ka murəngrə baa a dɨmə we dan. Shezə murəngrə kana mbɨrə, nggi yə tam a pukə ɓashitɨ nzaa hwoɗye.

³ Gə-angɨn metə kana ɗaka murəngrə a ɗɨm a murə a ite murə kwamətə darə nee də ka myentə, mye ɓa wa wule metɨngɨn atɨ sharatə. Hye kana niyə murə kwamətɨ darə a mbɨrə, nggi piyagə ɓashite pedə nzaa hwoɗye ka murə kwamətə. Nggi kana ɗɨm a murə, myaa dɨ sa kaarə atɨ nggi sharati.

⁴ Sə mgban hwun ji-nuwogi hwun mbərə, mye dɨmdəwnə gə ɓashitə dɨ ha we da Ma Həmɨnpwa a Yaɓwarən, gə hwuna gəə hɨnggə a murə somo, a ndi ma Həmɨnpwa a maddən gə we. Angɨn nə ɓa ɗɨkə hɨm a ɗamə Həmɨnpwa lyentə ka diyale.

⁵ Gələ ite myene nza vor kadawo sɨtə, ɓashitɨngɨn a dɨ dɨmaadə mwo shi kadawo sɨte dɨ maddə hɨmnə ɗa lyentɨ hatte dɨ zə ka ɓwaara a we.

⁶ Shezə hɨm nə ɓətɨ wogi, ɓəgəng mye dɨmam gə ɓashite takrəm kɨnɨnɨng gə hɨm a ɗam lyentə a tɨfə hwela dɨ haka Pitɨ Ɗəmɗəmtə, aa yə dɨ dorshi iira ɓashita Musa a boyo.

Ɓəre ka ɗa səhase

⁷ Ɓə a shiya mye ɓa sa ka ləngɨn? Mye ɓa ngguro atɨ ɓashitə ka nənəngrə sə hatti ma? Ə'ə, aa sə gə ləngɨn. Kat ka angɨn ɓashitɨngɨn nə ɗɨki na ɓə lee diyalə sa mya wa atɨ səhase. Taa dɨ nda lee sa mya wa atɨ omshe, anda ɓashitə aa nda sa atɨ, “Ɓe hɨmagə se da ama.”

⁸ Shezə səhase a ɗɨm humwatə a kwaɗa kwatɨfa gɨraha a wunan, a pɨrake ka omshe ka hɨma shee som-som. Səngɨn ɗɨki ite taa ɓashiti də, səhase a bə ɓətɨ wo.

⁹ Kɨnɨnɨng ite ɓashite ɓa boyi atɨ ɓe ɗa səhase tamdə, hɨnə nza ka myentə taa lee səhase. Gɨraha ta tɨla, də səhase a viɗiya. Angɨn a ɗɨkə səhase aɓə ɗɨm gətə a na hɨn mgban na mbɨrə.

¹⁰ Də na ɓə shea leyə atɨ gɨrahaa kana nda shi ka myentə sɨnə shi ka we.

¹¹ Shezə səhase a ɗɨm humwatə a kwaɗa kwatɨfa gɨraha a wunan, a vwakari a zə ke a we.

¹² Gə-angɨn ɓashitɨngɨn nee ɗəmɗəm, gɨrahangɨn mgban nee pepe, mɨni ɗəmɗəm.

¹³ Gəngnə ɓwaa, mye ɓa sa atɨ ɓashitɨ pepetɨngɨn nə shike ka we ma? Ə'ə, aa sə gə ləngɨn. Shezə səhase a dɨma bwang gələ mya leyə atɨ səhasə shike ka we dɨ ha ɓashitɨ pepetɨngɨn. Gəkɨlə dɨ ha gɨrahangɨn səhase a dɨma bwang mya leyə atɨ səhasə.

¹⁴ Mye leyəm atɨ ɓashitə dɨ tɨfə Pitə ngga dɨma, hɨnggi hɨnə ɓwaara a vor sɨtə, mya vədi na dɨ ɗa səhase kɨsawne.

¹⁵ Ka diyale taa lee kənə sa na dɨ ɗa, gəkɨlə daasə sa na dɨ mwo atɨ na ɗa, aa sɨnə a na dɨ ɗarən. Soɓwo she salə ɗasən a hashi, sɨnə sa na dɨ ɗarən.

¹⁶ Na kana ɗa sa taa mwi atɨ na ɗa, angɨn bɨli bwang atɨ ləməgyee ɓashita boyo təne pepe.

¹⁷ Ɓətɨya a gə, aa yə hɨnə dɨ ɗa shingɨn, shezə səhasa nza huboshi nə dɨ ɗa səhasəngɨn.

¹⁸ Hɨn leyə atɨ taa ndəng səfemə a vor huboshi, pɨrgə a kadawo sɨtə. Nagi na mwo vor huboshi atɨ hɨn ɓa ɗa a səfemə kat ka angɨn taawa mba səngɨn a ɗa.

¹⁹ Gələ səfema na dɨ mwo atɨ na ɗa, sɨnə a taawa mban a ɗarən, shezə daasə səhasa taawa mwi atɨ na ɗa, sɨnə a na dɨ ɗarən mba-dɨ-mba.

²⁰ Hɨn kana ɗa sa taawa mwi atɨ na ɗarən, angɨn bɨlə atɨ aa hɨnə dɨ ɗa səngɨn, shezə səhasa nza huboshi nə dɨ ɗa səhasəngɨn.

²¹ Hɨn sɨ lee daasə sa dɨ ɓwe, gə nagi goɗi na maɗə ɓa ɗa səfeme, səhase nee ɓwaa ke.

²² A vor ha kuɓukə huboshi, hɨne dɨ ɗa hanɨngtə ka ɓashita Həmɨnpwa.

²³ Gaarə a vor huboshi ɓə, hɨn mɨnə naa wule itɨ ɓashiti som, a ite dɨ nya ka ɓashitɨ səɗə-yedye de, kote dɨ mɨndi a gbərəwe na dɨ ɗa kɨsawne a pukə ɓashitə a nə səhase.

²⁴ Sə oti ke! Ɓə wonə ɓa luwari a mbədi gə wule sɨtɨnə, a ite dɨ zə ke a we?

²⁵ Hɨn ɗa Həmɨnpwa usəkətə gələ Yesu Ma Həmɨnpwa a Yaɓwarən ndi Həmɨmiye dam, sɨnə ma ɓa luwari a mbədi. Gəngnə hɨnə dɨ koddə ɓashita Həmɨnpwa dɨ ɗan kɨsawne a vor səɗə-yedye de. Shezə a vor kadawo sɨtə na dɨ ɗa kɨsawne a pukə ɓashitə a nə səhase.