Romye 3 - Ɓwaatiye New Testament

Tikɨstɨ da Həmɨnpwa

¹ Ɓə anda she ləngɨn a gə, ka mɨnə Yawude a pɨrgə mbiɗita, ɓə mɨnə fukate a lakəwne da Yawude?

² Mbak-mbak nagi dɨ ndo gyengə, fukatə nee ka Yawude. A kwamətə, Yawude nə Həmɨnpwa a vərən ləməgye dan gə təna kɨsə ta nidərən.

³ Ɓə a shiya mya sa ka ləngɨn, anda imi a vor Yawude a bɨldə ɗongə tikɨstə, angɨn ɓa mɨndə tikɨsta Həmɨnpwa ɓaa ma?

⁴ Kək! Aa sə gən, nagi kəng-kəng. Nagi mi vɨratə kat ɓa gəə ji-kər jeronyi, Həmɨnpwa nee kangə nə tikɨstə ka diyale. Ɓətɨya mya doro, “Mbak-mbak ləməgyee hye boyo a bɨlə atɨ hye nee tikɨs, nagi hye ɓashiyə, ɓashitɨngɨn nee twa.”

⁵ Ɓə anda hasɨne dam nə ɓa dɨmaadə pepeta Həmɨnpwa bwang, a shiya mya sa ka ləngɨn? Anda Həmɨnpwa jangadə ɓashitɨ dan a nəngəm, ɗongə pepetɨ dan nə ɗɨki ma? (Na bwe lanə a vor ɗyangale da ɓwaara.)

⁶ Ka twai aa sə gən, ɓə anda sə a gə, ya Həmɨnpwa ɓa ɓashiyə mi vɨrata?

⁷ Sə mgban, anda kər-jeronye de nə ɓa ɗɨkə diyale da Həmɨnpwa a dɨma bwang a bɨldə fukatɨ dan, ɓə ya mya mɨna ɓashidi atɨ hɨn nzə-ɗa səhasa?

⁸ Imi a dɨttenə ka byele atɨ, hina sa atɨ, “Ndɨka mya pɨrəmə humwa ka ɗa səhase, gə-angɨn a shi ka səfeme.” Həmɨnpwa ɓa ɓashiyə mingɨn ka wule byela.

Taa ama pepeyə də

⁹ Ɓə kpawtɨ la nee a shiya gəngna? Mye ɓa sa atɨ hɨm nə fukam pɨri ma? Ə'ə, aa sə nagi kəng-kəng! Gə hɨm bɨldən bwang atɨ ka Yawude ka myee aa Yawude nee kat a kwa-hiɗə a pukə səhase.

¹⁰ Ɓətɨya mya doro vor Malɨmtɨ Ɗəmɗəmtə atɨ, “Taa ndəng ama femə də nagi hiɗə,

¹¹ taa ama də ka lele, a ma dɨ mwi atɨ nda ɗɨm Həmɨnpwa.

¹² Ɓwaare kat viriwo gəə mi ɓayi, taa ama də dɨ ɗa sə pepeye, nagi hiɗə.”

¹³ “Ləməgyee dɨ dɨma dɨ kwaamɨngrən nə ɓətɨ taanə wuni dɨ pomi. Kwaamɨngrən nə naa pas ka vwakaha.” “Ləməgye darən nə ɓətɨ kyanatɨ rokonyi.”

¹⁴ “Kwaamɨngrən nə naa pas ka hiwdəha ka kwatɨne.”

¹⁵ “Təna dɨ tan-tanə ɓɨl we,

¹⁶ nagi a ndo haa təna pɨrə kat, təna dɨ pɨrdə ɓwaare a humwaa tuktə ka tənətə, hangɨn a bəə yaafə.

¹⁷ Tənaawa shi ka nzaa ɗoltə a wakaa ɓwaare.”

¹⁸ “Tən tam ka kala Həmɨnpwa a hubosərən.”

¹⁹ Gəngnə hɨm leyəm kat atɨ nagi mɨnə ɓashita Musa a boyo, ngga boyə nə myee a pukə ɓashitɨngɨn, gə kwaamɨ nagi ndo ma a gbəə a humwaa Həmɨnpwa, nagi wonə a vɨratə a leyə atɨ Həmɨnpwa nə ɓa ɗan ɓashitə.

²⁰ Gə-angɨn taa ndəng ma də ɓa gəə ma pepeyə a humwaa Həmɨnpwa dɨ ha koddə ɓashitə. Ə'ə, ɓashitə a dɨ bɨlə ɓwaara atɨ ndi nzə-ɗa səhasə.

Pepetə dɨ ha mwadiyale

²¹ Gəngnə Həmɨnpwa dɨmaadə pepetɨ dan dɨ a kwatɨfə som, aa dɨ ha koddə ɓashitə. Malɨmta Həmɨnpwa ka kpalye dan bwe le a nə wule kwatɨfəngɨn ka ɓongtə.

²² Wule pepetɨngɨn da Həmɨnpwa a dɨma dɨ ha mwadiyale ka Yesu Ma Həmɨnpwa a Yaɓwarən ɓəmbə, a haka myee kat mwakan. Taa som-somtidə,

²³ gəkɨlə ɓwaare kat ɗa səhase, tən kwakagə fukata Həmɨnpwa.

²⁴ Kat ka angɨn Həmɨnpwa dɨ ha wuladəha dan, nda sawuɗarən ɓaa dɨ haka Yesu Ma Həmɨnpwa a Yaɓwarən ndi ma vərən ɗɨmne.

²⁵ Həmɨnpwa a vədə Yesu kwa hamati. Ite nda kəjidə zaambəngɨn a mbɨrə, nda nggurgə səhase. Mya ngguro ɓwaare gə səhase dɨ ha mwadiyale ɓəmbə. Həmɨnpwa a ɗaasə gələ nda bɨldə gəəte nda gəədə ɓwaare mi pepeyi. A vor mbasɨtɨ dan, ndaa ɓashiyə ɓwaare a nə səhasa təna ɗa a kwamətə.

²⁶ Həmɨnpwa a ɗaasə a vor nzatɨnə ɓəgəng gələ nda bɨldə nəngɨn atɨ ndi ma tikɨsə, nda gəədə myee mwadiyale ka Yesu mi pepeyi.

²⁷ Ɓə a nə mɨnə mya ɓə dɨ məndaranye? Taa ndəng sə də. A nə mɨnə ya, a nə koddə ɓashitə kpəkəkə? Ə'ə, a nə mwadiyale mba-mba.

²⁸ Mye kangə nə sate atɨ dɨ ha mwadiyale ɓəmbə Həmɨnpwa ɓa gəədə ɓwaara ma pepeyə, aa dɨ ha koddə ɓashita Musa.

²⁹ Həmɨnpwa ɓwaa, Həmɨnpwata Yawude ɓəmbə ma? Ndi aa Həmɨnpwata myee aa Yawude? Sə gən, ndi Həmɨnpwati a haka myee aa Yawude mgban.

³⁰ Gəkɨlə Həmɨnpwa nə hiɗə kal-kal ɓa gəədə myee mya jengdərən a lakəwne mi pepeyi dɨ ha mwadiyale, sə mgban ndi ɓa gəədə myee myaa jengdərən a lakəwne mi pepeyi dɨ ha mwadiyalə hiɗətɨngɨn.

³¹ Mye ɓa mɨndə ɓashitə nggagə ɓaa gələ mwadiyale? Ə'ə, nyerəti mya dɨ nyerədə.