Romye 2 - Ɓwaatiye New Testament

Ɓashitɨ diyale da Həmɨnpwa

¹ Hye tam ka mgbaale hye ɓashiyə ama a nə səhasa nda dɨ ɗa. Nagi ndo ɓashiti hye ɓashiyə ama, hyenə dɨ lɨbadə nanga, gəkɨlə shee hye dɨ ɓashiyə ama a nəngrən, hye nee dɨ ɗa shingɨn.

² Mye leyə kat atɨ a nə diyale Həmɨnpwa a dɨ ɓashiyə myee dɨ ɗa wule shingɨn.

³ Ɓə hye mgban, a hye ɓwaara kpamləmɨntə, hye dɨ niyə ɓətɨ Həmɨnpwa ɓa ɓashiyə myee dɨ ɗa wule səhasa hye dɨ ɗa, hyenə hye ɓa mbəgə ɓashitɨ dan?

⁴ Hii! Hye dɨ ushi gbaktɨ fyemta Həmɨnpwa ka kɨt sɨtə ka mbasɨtɨ dan kəw ma, tee leyi atɨ nda dɨ bɨlu fyemtɨ dan gələ nda gwada a vu humwatə hye por-njiya ma?

⁵ Shezə gəkɨlə mgbɨləha dəw ka hubo ɗongə por-njiya dəw, hyene dɨ pedə yedi-kɨtta Həmɨnpwa a nanga, baa a tɨlə fəra ɓwaare ɓa naa ɓashitɨ diyale da Həmɨnpwa kan.

⁶ A fərə ɓashitɨngɨn, Həmɨnpwa “ɓa və nagi ndo ma moone dan a kana ka wule lyente mangɨn a ɗa.”

⁷ Kat myee dɨ tuula a vor lyentɨ pepetə, tənə myee dɨ ɨl fukatə ka ndukoha ka myente aa dɨ yə gaa mbəə a haka Həmɨnpwa, ndi ɓa vərən myente kaaru-kaaru.

⁸ Wule myee mgban mwo nəngrən, kwo diyale virwi dɨ koɗə səhase darən, yedi-kɨtta Həmɨnpwa kat ka ɓashitɨ dan nee a nəngrən.

⁹ Tənətə kat ka sɨtɨ otə nee nza nə myee kat dɨ ɗa səhase, angɨn ɓa tiya ka Yawude a zə nə myee aa Yawude.

¹⁰ Shezə fukatə ka ndukoha ka ɗoltɨ da Həmɨnpwa ɓa nza nə myee dɨ ɗa səfeme, angɨn ɓa tiya ka Yawude a zə nə myee aa Yawude.

¹¹ Həmɨnpwa aawa bɨldə mwonəha.

¹² Kat myee ɗa səhase a nə ɗongə lee ɓashita Musa, Həmɨnpwa ɓa ɓashiyərən a nə ɗongə lee ɓashitɨngɨn. Sə mgban, myee ɗa səhase a nə lee ɓashita Musa, Həmɨnpwa ɓa ɓashiyərən dɨ vor ɓashitɨngɨn.

¹³ Gələ aa kɨl ɓashita Musa ka kwakye nə ɓa gwadə ma nda gəə ɓwaara pepeyə a humwa Həmɨnpwa, soɓwo daasə myee dɨ kɨl ɓashitɨngɨn dɨ koddə, tənə myee Həmɨnpwa ɓa naarən mi pepeyi a humwasən.

¹⁴ Ka diyale tən myee aa Yawude, a tən myee tam ka ɓashita Musa, tən kana ɗa sa ɓashitɨngɨn a boyo a vor ɗongə leetə, tən bɨldə sate atɨ tən lee sa kana təna ɗa, ka sa aa kana təna ɗa.

¹⁵ Gəkɨlə lyentɨ darən bɨldə sate atɨ sa ɓashitə a boyo, mye nzadən a hubosərən, səɗə-yedye darən mgban nee dɨ bɨlərən atɨ səfemə təna dɨ ɗa, ɗyangale darən nee dɨ bɨlərən səhasa ka səfema təna dɨ ɗa.

¹⁶ A fəra Həmɨnpwa ɓa ɓashiyə dɨ haka Yesu Ma Həmɨnpwa a Yaɓwarən də, ndi ɓa dɨmaadə shee ɓwaare a dɨ ɗatɨrən a ɓotə, ɓətɨya ləmə fema na dɨ hiwa kan a boyo.

Yawude ka ɓashita Musa

¹⁷ Ɓə hye mgban, a hye ma dɨ sa ka nanga atɨ hye Yawuda, hye tingɨrə ɓashita Musa, hye dɨ nggorkonye atɨ hyenə hɨnggə Həmɨnpwa?

¹⁸ Hye sa atɨ hye lee sa Həmɨnpwa a dɨ mwo atɨ hye ɗa, sə mgban hye lee sa kana ɓwaara a ɗa gəkɨlə ɓashita Musa kənu səngɨn.

¹⁹ Anda hye mwaka nanga atɨ hyenə dɨ kɨsə welye kada, hyenə tikɨle da myee a vor kulitə,

²⁰ hye sa atɨ hyenə dɨ kənə dəɗye shee, hyenə mgban dɨ kənə ji-kurkurye shee, gəkɨlə ɓashita Musa a peyudə lele ka diyale.

²¹ Ɓə hye ma dɨ kənə ɓwaare shee, mɨnə ɗa teewa kənə nanga shee? Hye ma dɨ hiwa atɨ ɓe tənaa hɨrə, teewa hɨri?

²² Hye ma dɨ sa ɓwaare atɨ ɓe təna ɨl mandye a ɗa sharawne, teewa ɗa sharawne? Hye sa atɨ hye kwo pɨle, tee dɨ koɗərən, hye tam dɨ ɗashi takɨmye?

²³ Hye dɨ məndaranye a nə ɓashita Musa, ɓə mɨnə ɗa hye dɨ kɨɗa kwakɨ Həmɨnpwa dɨ ha ɓiya ɓashitɨ dan?

²⁴ Angɨn nə ɓətɨ wule la mya doro atɨ, “Gəkɨlə le dəw mya dɨ kɨɗa kwakɨ Həmɨnpwa a waka myee aa leerən.”

²⁵ Anda hye koddə ɓashita Musa, lakəwne dəw ɓa gə ka fukatə. Anda hye ɓiya ɓashitɨngɨn, angɨn gə ɓətɨ myaa tiyaa jengda a lakəwne.

²⁶ Anda myee myaa jengdərən a lakəwne ɗa sa ɓashita Musa a boyo, myaa dɨ nidə mingɨn ɓətɨ mye jengdərən a lakəwne?

²⁷ Ndi ma myaa jengdən a lakəwne, shezə nda dɨ koddə ɓashita Musa, ɓə wulagu hye ma ka ɓashitɨngɨn, mya mɨna jengda lakəwne atɨ gə hye Yawuda, di hye nzə-ɓiya ɓashiti.

²⁸ Aa gəkɨlə mya jengda a lakəwne, angɨn a mɨnda Yawuda diyalə a humwaa Həmɨnpwa.

²⁹ Ə'ə di Yawuda diyale nee a hubota, sɨnə wule ma Pitɨ Ɗəmɗəmtə a viriwdə hubosən, aa ma dɨ nggur ɓashitə dɨ kanyi kaarə nə. Wule mangɨn, aa ɓwaare dɨ humwan, Həmɨnpwa nə dɨ humwan.