Romye 16 - Ɓwaatiye New Testament

Wunakaha da Bulus

¹ Hɨnə dɨ humwa Fibi a hakəwnə atɨ, nggi nji-kottɨ pepeti, dɨ gwadəha ka lyentə a vɨnə hiwtɨ Senkɨriya.

² Zə luwomtɨrə gələ kote hiɗə a vor myee da Həmɨnpwa. Hwuna gwadə anda kote dɨ ɨl gwadəha dɨ hakəwnə, gəkɨlə nggi gwadə ɓwaare hananang ka hɨn kat.

³ Wunamka Bɨriskila ka Akila, tənə yə ndewe lyentɨ de a vor lyenta Yesu Ma Həmɨnpwa a Yaɓwarən.

⁴ Tənə vədə myensərən gə le de. Hɨnə dɨ ɗarən usəkətə, aa hɨnə hiɗə ɓəmbə, kat ka ji-kottɨnə a vəni hiwta myee aa Yawude nə dɨ ɗarən usəkətə.

⁵ Wunamka ji-kotte dɨ peyə vor hwodarən tən yə Bɨriskila ka Akila dɨ ɗa hiwtə. Wunamka ndewogi Ifenetus a na dɨ mworən, sɨnə ma kwaməte gəə nzə-koɗə Ma Həmɨnpwa a Yaɓwarən a vor njiya Asiya.

⁶ Wunamka Maryamu ite gwadəwnə lyentə kɨr-kɨr.

⁷ Wunamka Andɨronikus ka Juniyas, tənə Yawudee mya gbenə kaarən a vɨnə gbərəwe, tən kpe-lagbi 'ye mya leetɨrən twa, tənə myee tiyagi luu Ma Həmɨnpwa a Yaɓwarən.

⁸ Wunamka Ampiliyatus, sɨnə ndewogi a na dɨ mworən a vor Həmɨmiye.

⁹ Wunamka Urbanus, sɨnə ndewo lyentɨ dam a vor lyenta Ma Həmɨnpwa a Yaɓwarən, ka ndewo twaye de, Istakis.

¹⁰ Wunamka Apelis, ndi ma a vor kanaha nda kangə nə mwadiyale dan dwat a nə Ma Həmɨnpwa a Yaɓwarən. Wunamka mi hwoda Aristobulus.

¹¹ Wunamka Hirodiyan, ndi Yawuda mgban. Wunamka mi hwoda Narkisus 'ye ji-kotti a vor Həmɨmiye.

¹² Wunamka Tɨrayifina ka Tɨrayifosa, tənə mandyee ɗa lyenta Həmɨmiye ka diyale. Wunamka gyenəgi Parsis, kote hiɗə dɨ vor mandyee ɗa lyenta Həmɨmiye kɨr-kɨr.

¹³ Wunamka Rufus, ndi ma leeti a vor lyenta Həmɨmiye, ka nuwogən nggi mate ngguti gwadi ɓətɨ nzəngrə nə.

¹⁴ Wunamka Asɨnkɨritus, ka Filgona, ka Hamis, ka Patɨrobas, ka Hemas, ɗɨkənə mbiɗitɨ ji-kotte ɓwaa kaarən.

¹⁵ Wunamka Filologas ka Juliya, ka Neriyus ka mwafɨrən, ka Olimpas, ɗɨkənə mbiɗitɨ myee da Həmɨnpwa kat 'ye ɓwaa kaarən.

¹⁶ Wunamkasə ka kpɨripsətɨ mwoha ɗəmɗəme. Ji-koɗə Ma Həmɨnpwa a Yaɓwarən a vəni hiwtɨnə ganə kat nə dɨ wunakəwnə.

¹⁷ Hɨnə dɨ nyisəwnə ji-nuwo, bəmdə myensəwnə ka wule myee dɨ woyi taka waka ji-kottə, tənə dɨ kɨɗa mwadiyale dəwnə gə hwuna pawo a ɗeyə, tənə dɨ kɨɗa shee mya kənəwnə gə wule kəndəshe darən. Təkəməsə ka wule mingɨn.

¹⁸ Mye dɨ ɗa wule shi hashingɨn, aa Ma Həmɨnpwa a Yaɓwarən Həmɨmiye nə təna dɨ ɗan lyentə, ɓərə yedingrən nə təna dɨ ɓərə. Ka kwanɨnge darən təna dɨ vwaka kpenəwye.

¹⁹ Ɓwaare kat kɨl lə kangte hwuna kangə dwat a nə koddə le da Həmɨnpwa, səngɨn ɗa hanɨnyi kəwnə. Shezə mwoshinə atɨ hwuna gə ka lele a nə sa pepe, hwuna təkəsə ka lyentɨ kwakaɗɨkatə.

²⁰ Aa dɨ ɓongə Həmɨnpwa ndi ma dɨ vədə ɗoltə, ɓa kɨɗa gəta Shetan, a mɨnadən a poki mbwayingəwnə. Maa wuladəha da Yesu Həmɨmiye dam a nza ɓwaa kəwnə.

²¹ Timoti ndewo lyentɨ denə dɨ wunakəwnə, ka Lukiyus, ka Jason, ka Sosipata, tən kat Yawude ɓətɨ hɨn.

²² Hɨn Tartiyus, hɨn manə dor malɨmtɨnə a moonə Bulus, hɨnə dɨ wunakəwnə a vor Həmɨmiye.

²³ Ndi Gayus, ma na janga a vor hwodan, a ma dɨ luu mbiɗitɨ ji-kottə ganə kat a vor hwodan pepe, sɨnə dɨ wunakəwnə. Arastus ndi nzə-kəpdə taa da mi vɨratɨngɨn, ka nzə-nuwogəm Kwatus, tən kat tənə dɨ wunakəwnə.

²⁵ Mya ndukomdə Həmɨnpwa! Sɨnə ma ɓa kangdəwnə dwat a vor mwadiyale dəwnə, dɨ ha ləmə fema na hiwawnə a nə Yesu Ma Həmɨnpwa a Yaɓwarən. Sɨnə diyala a haa ɓotə kɨnɨnɨng,

²⁶ shezə ɓəgəng diyaləngɨn nə a mya dɨmaadən bwang. Həmɨnpwate kaaru-kaaru a ɗɨkə hwuna lee diyaləngɨn dɨ ha shee kpalye dan a doro, gələ mbiɗitɨ vɨratə kat a mwakan a koddən.

²⁷ Həmɨnpwa hiɗə kal-kal sɨnə ma ka lele, hɨnggən nə fukatə kaaru-kaaru dɨ haka Yesu Ma Həmɨnpwa a Yaɓwarən! Amin.