Romye 14 - Ɓwaatiye New Testament

Luwom nagi ndo ma a wakasəwnə

¹ Luwom ma mwadiyale dan aa nyerə, nda gə wakasəwnə ɓe myaa ndəltən ka ləməgye a nə sa ndi ɓa ɗa, ka wule sa ndaa dɨ ɗa.

² Mwadiyale da ama a dɨ vən humwatə nda zɨm nagi ndawula sɨzɨmti, ma mgban mwadiyale dan aa tɨlə, ndaawa zɨm nagi ndawula sɨzɨmti, jibe hawti ɓəmbə nda dɨ zɨmə.

³ Ma dɨ zɨm nagi ndo sɨzɨmti, ɓe ndaa ushi ma aawa zɨmə. Sə mgban ma aawa zɨm nagi ndo sɨzɨmti, ɓe ndaa ɓashidə ma dɨ zɨmi, gəkɨlə Həmɨnpwa nee dɨ mworən mgban.

⁴ Hyenə wonə, hye ɓa ɓə ɓashiyə nzə-hwoda ama? Nzə-hwoɗingɨn nee ka həmɨ-hwoɗye kan, həmɨ-hwoɗingɨn nə ɓa bɨldən anda nzə-hwodan kangə ɗan lyentə pepe, naasə mgban sɨnə ɓa lɨbadən. Mangɨn ɓa kangə gəkɨlə Həmɨmiye ɓa gwadən nda kangə kpəkəkə.

⁵ Ama a dɨ nggur a fərə hiɗə ɓətɨ sɨnə pɨrgə mbiɗitɨ bətə kat ka fukatə, ama mgban a hakan nagi ndo fərə kat nə hiɗə. Nagi ndo ma a kangə nə sa nda ngguro.

⁶ Nagi ndo ma, a ma nggur a fərə ka fukatə, mangɨn a dɨ fukadə fərəngɨn gə ndukodə Həmɨmiye. Sə mgban ka ma dɨ zɨm nagi ndawula sɨzɨmti, nda dɨ zɨmə gə nda ndukodə Həmɨmiye a ɗa Həmɨnpwa usəkətə. Ma kat kwo zɨm wule i sɨzɨmti, nda kwotɨrən gələ nda ndukodə Həmɨmiye a ɗa Həmɨnpwa usəkətə ka angɨn.

⁷ Taa ama də a vorsəm nza nənəngɨn, taa ama də mgban ɓa mbɨrə nənəngɨn.

⁸ Nagi a nzaasəm ganə a vɨratə, gə le da Həmɨmiye mya nzam, nagi mya mbərəm, mya mbərəm gə le da Həmɨmiye. Gə-angɨn nagi mya gəm ka myentə nagi mya mbərəm, hɨm hɨnggə Həmɨmiye nə.

⁹ Səngɨn nə ɗɨki Ma Həmɨnpwa a Yaɓwarən a mbɨrə a maggə we ka myentə, gə mya leyə atɨ sɨnə Həmɨmiye ma ka gətə a nə myee ka myentə kat ka wogye.

¹⁰ Ɓə hye mgban, mɨna ɗa hye dɨ ɓashiyə nzə-nuwogu, naasə mgban mɨnə ɗa hye dɨ ushi nzə-nuwogu? Gələ hɨm kat, hɨm nə ɓa kangə humwa ruutɨ ɓashita Həmɨnpwa nda ɓashiyəm.

¹¹ Həmɨmiye a boyə vor Malɨmtɨ Ɗəmɗəmtə atɨ, “Hɨn gbə ka myenshi atɨ, nagi ndo ma kat ɓa gyerə humwashi, nagi ndo ma kat ɓa boyo bwang atɨ hɨnə Həmɨnpwa.”

¹² Gə-angɨn, nagi ndo ma ɓa bwe sa nda ɗa kat a humwa Həmɨnpwa.

¹³ Gə ləngɨn ɓe myaa yə ɓashiyəməsə. Ndɨka mya səɗəm ka yedingəm a nə sa kana mya ɗam. Ɓe ɗa sa ɓa ɗɨkdə nzə-nuwogu nda pawo a fukə, naasə mgban ɓe gən fara pawti.

¹⁴ Gə leete na lee Yesu Həmɨmiye, na boyo ka gbənzɨmtə atɨ taa ndəng itɨ sɨzɨmtɨ takɨmi də. Shezə hye kana niyə ama a nggur asə atɨ nda takɨmə, sə mgban ɓa gən takɨm.

¹⁵ Hye kana kɨɗa yedi nduwanga nzə-kotti gəkɨlə sa hye dɨ ngguro a zɨmə, angɨn bɨlə atɨ sa hye dɨ ɗa taa mwoha də. Gə-angɨn, ɓe sɨzɨmte hye dɨ zɨmə ɗɨkə nzə-nuwogu a fukə, gələ Ma Həmɨnpwa a Yaɓwarən a mbɨrə gə le da mangɨn mgban.

¹⁶ Ɓe ɗaka sa hye leyə atɨ sɨne pepe mya bwelə hase a nəngɨn.

¹⁷ Gələ həmne da Həmɨnpwa aa byelə sɨzɨmtɨ kwaamə ka shi soɓwo. Shezə gə nzaa pepetə, ɗoltə ka hanɨngtə dɨ haka Pitɨ Ɗəmɗəmtə.

¹⁸ Gəkɨlə nagi ndo ma dɨ koddə Ma Həmɨnpwa a Yaɓwarən, dɨ ɗa wule shi-pepeyingɨn, haa ɓa nɨngə Həmɨnpwa kan. Ɓwaare mgban ɓa mwakan.

¹⁹ Gə ləngɨn, maa hɨm a ɓərəm ta ɗam shee ɓa shi ka nzaa ɗoltə, hɨm ta nyerəmdəsə.

²⁰ Ɓe hwunaa kɨɗa lyentɨ pepeta Həmɨnpwa gələ sɨzɨmtɨ kwaame. Nagi ndawula sɨzɨmti kat təne pepe, shezə aa dɨ wula ɓwaara a zɨm sa ɓa ɗɨkdə nzə-nuwotə nda pawo a fukə.

²¹ Ndɨka ɓe zɨm hara, ɓe sop vwe, nagi asə hye ɓa ɗa a ɓa ɗɨkdə nzə-nuwogu nda pawo a fukə, ɓe ɗa səngɨn.

²² Nagi mɨnə hye mwakan a nə shinə, kɨshi dwat a wakasa ka Həmɨnpwatɨ dəw. Sə hanɨngti ka wule ma hubosən aa təkə kpe a nə sa nda nan pepe ɓa ɗa.

²³ Anda mangɨn nee ndəli a nə sa nda dɨ zɨmə, sɨne ka ɓashitə a hakan a nagi goɗi nda dɨ zɨm shingɨn, gəkɨlə hubosən a təkə taa mwadiyalə kan. Gə sa mgban mya ɗarən kat aa ka mwadiyale, angɨn səhasə.