Romye 13 - Ɓwaatiye New Testament

Koddə həmi njiya

¹ Nagi ndo ma a vədə nəngɨn a koddə yə həmi njiya tən myee ka gətə a nə ɓwaare, gəkɨlə Həmɨnpwa nə və həmi njiyangɨn gətə təna ɗa həmne a nəngəm.

² Gə-angɨn nagi ndo ma ushi yə həmi njiya ndaa koddərən, mangɨn ushi sa Həmɨnpwa a kangdən, wule ma ɗaasə ɓa ɗɨmə nəngɨn ɓashitə.

³ Nzə-ɗa sə pepeye kat aa dɨ gəə kala yə həmi njiya, myee dɨ ɗa sa hashi-hashi nə kala ɓawa gərən. Na tee mwi atɨ kala yə həmi njiya a gu, zə ɗa sa pepe, yə həmi njiya mgban ɓa humow.

⁴ Gələ tenə kɨse da Həmɨnpwa tən ɓa ɗəw səfeme. Hye kana ɗa səhase, naa kala gu, tənaa kɨt sungwa takale a nə ɓaa. Həmɨnpwa nə lyentɨrən gə təna ɗa ji-ɗa səhase sɨgbəɗye.

⁵ Səngɨn nə ɗa mbak-mbak mya koddə yə həmi njiya aa gəkɨlə kala ɓashita Həmɨnpwa ɓəmbə, gəkɨlə səɗə-yedi pepeye.

⁶ Gə ləngɨn ɓə kana ɓwaare ta mbwa taa shemtə, gə yə həmi njiya nə ji-lyenta Həmɨnpwa ndi ma vərən lyentɨ nidə ɓwaare mba-dɨ-mba.

⁷ Gə-angɨn vəmə nagi ndo ma kat sa kana kan. Anda taa shemti mya dɨ koɗu, zə mbwa taa shemtɨngɨn, anda sa kana mya mbwa yə həmi njiya nə, zə mbwarən, anda tikɨsti, zə bɨldə tikɨstə, anda fukadəha, zə fukadəha.

Mwomsə gə bətə sɨka

⁸ Ɓe kiire aa bə nəngəwnə, a pɨrgə kiirə bɨləsə mwosətə. Nagi wonə dɨ mwo nduwongɨn ɓwaara, mangɨn naadə ɓashitə.

⁹ Həmɨnpwa a vədə gɨraha som-som, 'ye sa atɨ, “Ɓe ɗa sharawne, ɓe ɓɨl we, ɓe hɨri, ɓe hɨmagə sa hɨnggə ama.” Gɨrahangɨn ka gɨrahee mbiɗi kat, tənə galingə sɨtɨ gɨraha hiɗə, a sa atɨ, “Hye mwo nzə-vɨnəgu, ɓətɨ hye dɨ mwo nanga.”

¹⁰ Ma kat mwo nzə-vɨnəgən, ndaa dɨ ɗa mangɨn səhase. Gə-angɨn mwoha nə dɨ naadə ɓashita Həmɨnpwa kat.

¹¹ Wule shee kana hwuna ɗa nə yang, hwuna ledə wule vɨraa wanetɨnə. Fəre kənə, ɓa wula hwuna vaɗaya a maggə shentə, gə mbəha tɨla hakam gbyel, aa ɓətɨ kɨnɨnɨng a ite mya tiya mwadiyale a kwamətə.

¹² Mgbaarən pwara, haa ɓa dɨ kɨɗa. Ndɨka mya sɨɗamgə lyentɨ kulitə, hɨm a pɨrəmə shi pakawatɨ ɓɨrtə.

¹³ Mya ɗamdə wesəm a tɨfa kana, ɓətɨ myee a vor ɓɨrtə, aa ɓətɨ myee a vor kulitə nə, a wule myee dɨ sop vwe kɨr-kɨr kpashi kan, ka ɨl mandye, a wule myee a vor ɗa səhase ka nyatə ka sə, ka jiwne.

¹⁴ Ndɨka mya gəm ɓətɨ Həmɨmiye Yesu Ma Həmɨnpwa a Yaɓwarən, ɓe myaa pɨrə mwo shi kadawo sɨtə a vən humwatə.