Romye 12 - Ɓwaatiye New Testament

Hamatee ka myentə

¹ Gə-angɨn ji-nuwo, hɨnə dɨ nyisəwnə gə gbaktɨ puruta Həmɨnpwa, hwuna vədə nəngəwnə kwa hamatee ka myentə mya kəpdə gə le da Həmɨnpwa ite ha ɓa nɨngən kaarə. Angɨn nə kala-gbəəte a vor pitə.

² Ɓe hwunaa koɗə ɗashe ɓətɨya mi vɨra wanetɨnə a dɨ ɗa, ɗakamə Həmɨnpwa nda viriwa dəwnə gəkɨlə hwuna nggəɗə dɨ ha səɗə-yedye dəwnə. Də hwun ɓa shea lee sa Həmɨnpwa a dɨ mwo bwang, a wule pepete haa ɓa nɨngən kaarə.

³ Dɨ ha gəte Həmɨnpwa a vi na dɨ boyə nagi ndo ma a vorsəwnə atɨ, ɓe hwunaa nggur nəngəwnə a saaɗə. Shezə hwun ta nidə nəngəwnə ka səɗə-yedi hyatane kəni-kəni ka wule mwadiyala Həmɨnpwa a və nagi ndo ma a wakasəwnə.

⁴ Ɓətɨya nagi ndo ma nə ka kada sɨtə hiɗə, ngga ɓə təkə som-som nagi ndo basa ka lyentɨ dan,

⁵ sə mgban mye peyəm gəm sɨtə hiɗə, gəkɨlə hɨm nə ɓwaa ka Ma Həmɨnpwa a Yaɓwarən, nagi ndo ma mgban hɨnggə mbiɗitə nə.

⁶ Nagi ndo ma a wakasəm nee ka wule gəte Həmɨnpwa a wulakan a vən. Anda kpalti Həmɨnpwa a vən, nda kpalə kəni-kəni ka wule mwadiyala Həmɨnpwa a vən.

⁷ Anda gwadə ɓwaare ka lyenti, ndi ta gwadəha. Anda lyentɨ kəndəshi mya vən, ndi ta kəndəshe.

⁸ Anda lyentɨ nyerədə ɓwaare mya vən, ndi ta nyerədəha. Ma mgban mya vən həmtə ka ɓwaare ka wule sa nda gə kan, ndi ta ɗaasə ka hubosən hiɗə. Ma mgban mya vən jin ɓwaare, ndi ta jintɨrən ka diyale. Anda bɨlə ɓwaare puruti mya və ma, maa nda ɗaasə ka hanɨngtə.

Mwomsə

⁹ Mwoha mbak-mbak, nda gə ka diyale. Kwom sa hashi-hashi, kpɨripəm sa pepe.

¹⁰ Bɨləməsə mwosətə ɓətɨ hwunə hiɗə a dangəwnə, nagi ndo ma a ndukodə kpeyəsən a pɨrgə nənəngɨn.

¹¹ Ɓe sɨsəwnə aa kpalagəwnə, shezə hwuna gə ka pɨpɨrə ɗa lyenta Həmɨmiye.

¹² Ɗam hanɨngtə gəkɨlə hwunə ka bəə myentə a haka Həmɨnpwa, hwun ta nggur mbasɨtə a vor tənətɨ dəwnə, vəmdə nəngəwnə hwun ta ɗa hiwtə ka ɓwamosowe.

¹³ Hwun ta gwadə myee da Həmɨnpwa 'ye taa asə kaarən dɨ vorsa hwuna gə kan. Hwun ta luu omye pepe a hwodəwnə.

¹⁴ Nyisəmə Həmɨnpwa a nə myee dɨ tənəə dəwnə nda ɗarən səfeme, ɓe hwunaa hiwdərən.

¹⁵ Myee a vor hanɨngtə, hwuna ɗa hanɨngtə kaarən. Myee mgban dɨ təwi, hwuna təwo kaarən.

¹⁶ Sə mgban hwuna nza a kətsə pepe. Ɓe hwunaa gə ka ngguune, hwun ta pedə nəngəwnə ka wule myee fukasərən aa tɨlka hɨnggəwnə. Ɓe hwunaa nggur nəngəwnə ɓətɨ hwunə pɨrgə mbiɗitɨ ɓwaare.

¹⁷ Ma kat vyetəwnə hashi-hashi, ɓe hwunaa vyetən sə. Hwuna gə ka ɗyangale a nə səfema hwuna dɨ ɗa a humwa ɓwaare kat.

¹⁸ Na mwotənə ɗɨmtə, hwuna ɓərə a nza pepe ka ɗoltə ka ɓwaare kat.

¹⁹ Ji-nuwo 'ye na dɨ mwo, ɓe hwunaa vyetə ɓətɨya mya vyetəwnə, ɗakamə yedi-kɨtta Həmɨnpwa naa ngga janga a nəngrən. Ɓətɨya Həmɨmiye a boyə vor Malɨmtɨ Ɗəmɗəmtə atɨ, “Hɨn ɓa puk-sɨkunge, hɨn ɓa mbwarən ka wule sa təna ɗa.”

²⁰ Ɓətɨya mya mɨna doro atɨ, “Myatə kana gə nzə-nyaagu, vən sɨzɨmtə a nda zɨmə, wor-haɓye kana gən, vən haɓye a nda soɓwo. Dɨ haa ɗatɨngɨn hye ɓa gbəwondə kələngə ɗiye a nəngɨn, ndəng sopye ɓa gən nda virwa.”

²¹ Ɓe hwunaa mwa sa hashi-hashi a mgbɨləwnə, mgbɨləmə sa hashi-hashi ka ɗa səfeme.