Romye 11 - Ɓwaatiye New Testament

Mi Israila ɓyeləng Həmɨnpwa a kəpdərən

¹ Na ɗiyə atɨ ɓwaa, kwoti Həmɨnpwa a kwo myee dan ma? Ə'ə, aa sə gən nagi kəng-kəng. Hɨn ka nəna nzə-Israilati, nzə-jiyə Ibɨraim, dɨ kwirə jigenə Benjamin.

² Həmɨnpwa aa kwo myee dan 'ye nda leetɨrən kɨnɨnɨng. Hwuna ɗyanga ka ləməgyee Malɨmtɨ Ɗəmɗəmtə a boyə nə kpale Iliya, a ite nda tuwo a bɨlə Həmɨnpwa yedi-kɨttɨ dan a nə mi Israila atɨ,

³ “Həmɨmiye, tən ɓəl kpalye dəw, tən ɓeegə kɨriye dəw. Gəngnə hɨnə mbiɗi hiɗə kal-kal, tənə dɨ ɓəri gə təna ɓɨlti mgban.”

⁴ Shezə Həmɨnpwa a luwa a san, “Hɨnə ka ɓwaare haru bəw laka tukolukpe (7,000) a 'ye aa ndaga gyerə humwa pɨlaa mya wa atɨ Baal a kalan-gbəətə.”

⁵ Sə mgban ɓəgəng imi nə də ɓyeləng, a myee Həmɨnpwa a kəpdərən, dɨ ha wuladəha dan.

⁶ Gə dɨ ha wulahangɨn nə ɓəmbə Həmɨnpwa a dɨ nggɨl ɓwaara, aa gə lyente ɓwaara a ɗa. Gəkɨlə anda gə lyenta ɓwaara, angɨn taayə lə wuladəha də.

⁷ Ɓə a shiya hɨm ɓa sam ka ləngɨn? Mi Israila 'ye dɨ ɨl Həmɨnpwa ka haɓye a hubotə, tənaa ɗɨmrən, shezə myee Həmɨnpwa a tattɨrən nə ɓəmbə ɗɨmrən. Mbiɗisərən mgban mya nyara hubosərən.

⁸ Ɓətɨya mya doro atɨ, “Həmɨnpwa a kipa kwa-hubosərən ka səɗə-yedye darən kat, təne ka dye, tənaawa naa haa, ka kwakye mgban tənaawa kɨl le, baa dɨma a fəranə supo.”

⁹ Ɓətɨya həmɨn Dawuda a boyo atɨ, “Naa sɨlangsətɨ darən mgban a gərən pengə a tən ɓa kɨsə də, nda gərən fara pawti a tən ɓa pawo nəngɨn, Həmɨnpwa mgban a ɗarən səgbəɗye.

¹⁰ Naa diingrən a vwotə, gələ ɓe tənaa naa haa, beesərən mgban a puwa gələ ɓwatɨ tənətɨ darən kaaru-kaaru.”

Myee aa Yawude ɓa ɗɨm mbətə

¹¹ Na ɗiyə atɨ ɓwaa, pawte Yawude a pawo, gə təna fokə a yerə ɓaa ma? Ə'ə, aa sə gən! Ɗongə koddə le darən nə ɗɨki mbəha a ɓə mɨna a haka myee aa Yawude. Gə-angɨn a və mi Israila jiwne, təna mɨna a haka Həmɨnpwa.

¹² Anda ɗongə koddə le da Yawude nə shi ka mi vɨratə ka shi-pepeyi gbakye, poritɨ darən mgban a shi ka myee aa Yawude ka shi-pepeyingɨn, ɓə ya Yawude aa dɨ ɗɨm shi-pepeyee gbaki pɨri anda tən mɨna a haka Həmɨnpwa tən dɨ katə?

¹³ Hwun myee aa Yawude, hwunə na dɨ kənə. Gəkɨlə le dəwnə Həmɨnpwa a lyanari gə na gəwnə kpa-lagbe. Gə-angɨn a hake sə məndaranyi ka lyente Həmɨnpwa a vi.

¹⁴ Ndəng dɨ ha lyente na dɨ ɗa a wakasəwnə angɨn ɓa ɗɨkdə myee de tən Yawude təna ɗa jiwne a mɨna, gə imi dɨ vorsərən a ɗɨm mbətə.

¹⁵ Gəkɨlə ite Həmɨnpwa a kwotɨrən, mbiɗitɨ mi vɨratə a mɨna asɨ gəə tənə ndewogə Həmɨnpwa. Luute Həmɨnpwa ɓa mɨna luutɨrən ɓa gəə kwa-matti gə we ka myenti.

¹⁶ Anda a gyengə dɨ sɨtɨ burodite mya kəpdə gə mya həmə Həmɨnpwa kaarə nee ɗəmɗəm, angɨn bɨlə atɨ burodite mbiɗi nee ɗəmɗəm kat. Anda kwirə kada mya kəpdən gə mya həmə Həmɨnpwa kan nee ɗəmɗəm, base kadangɨn mgban ɓa gə ɗəmɗəm.

¹⁷ Anda mye ɓeegə base kadaa mya ngguɓo hwoɗye a dɨ mbwi, mya ɓaya base kadaa za a kaake a aawa mbwo a kpəkə sɨtɨ kadaa mya ngguɓo hwoɗye, hwun myee aa Yawude sə hwuna gə. Hwuna ɗɨmə a dɨ zɨmə ɓwaa ka sə dɨ sɨtɨ kadangɨn.

¹⁸ Gə ləngɨn ɓe hwunaa məndaranye a nənəngəwnə, gəkɨlə a hwun ɗaasə, ɗyangam atɨ hwun base kada ɓəmbə, aa hwunə kworee kɨt kada nda ɓə kangə, kwirə kɨttəwnə.

¹⁹ Ndəng a vorsəwnə, a hwun myee aa Yawude, imi ɓa luwa le a sa atɨ, “Kat ka angɨn, mye ɓeegə base kadaa mya ngguɓo hwoɗye na ɓə pɨrə dɨɓongɨn.”

²⁰ Diyalə sə gən. Mya ɓeegə base kadangɨn gə ɗongə mwadiyale, hɨnggəwnə hwuna mbiɗi a sɨtɨ kada gə mwadiyale dəwnə. Kat ka angɨn ɓe hwunaa nggur nəngəwnə kɨr-kɨr, ndɨka hwuna nza ka kala.

²¹ Anda Həmɨnpwa aa ɗa purutɨ Yawude a tən myee tənə base kadaa kangə hwoɗye, sə mgban ndaa dɨ mbədəwnə.

²² Namə wule ɓwaarawna Həmɨnpwa a gə kan ka wule ɗa sɨmwarashe dan. Nda duwa ɗa myee kworən sɨmwarashe, hwun mgban ndi ɓa bɨləwnə ɓwaarawne hwun kana pɨrə humwa ka bəə myentə a nə ɓwaarawne dan. Naasə hwun mgban ndi ɓa ɗawgəwnə gə sɨtɨ kada.

²³ Hye kana niyə mgban Yawude a mɨna asɨ mwaka Ma Həmɨnpwa a Yaɓwarən, Həmɨnpwa ɓa mɨna mɨndərən a hee nda ɗawgərən də, gəkɨlə sɨnee ka gətə nda mɨndərən a hengɨn.

²⁴ Gə-angɨn, hwun myee aa Yawude, hwunə ɓətɨ base kadaa za a kaake, mya ɓaya basengɨn a kpəkə sɨtɨ kadaa mya ngguɓo hwoɗye. Yawude mgban nə ɓətɨ kadaa mya ngguɓo hwoɗye, gə-angɨn mbak-mbak Həmɨnpwa ɓa mɨndərən tan-tan a doɓingrən a sɨtɨ kadaa mya ɗawgərən də.

Mi Israila ɓa ɗɨm mbətə

²⁵ Ji-nuwo, mwoshinə atɨ hwuna lee shee a haa ɓotə kɨnɨnɨng, gə ɓe hwunaa pɨrə ngguunə ɓaye. Imi dɨ vor mi Israila mya nyerədə hubosərən a tɨlə a haa baa a ɗɨkə myee aa Yawude a ɗɨmə a pɨra a haka Həmɨnpwa a vor furte kana.

²⁶ Angɨn nə ɓa ɗɨkə Həmɨnpwa a mbədə mi Israila, ɓətɨya mya doro atɨ, “Nzə-mbəha ɓa dɨma dɨ vor Siyona, ndi ɓa ngguro je da Yakubu gə ɗongə kala Həmɨnpwa.”

²⁷ Sə mgban Həmɨnpwa a sa atɨ, “Hɨn kana ngguro mi Israila gə səhase darən, hɨn ɓa pɨrə kɨləsətə kaarən.”

²⁸ Sa pa ləmə feme da Həmɨnpwa, tən Yawude tənə ji-nyaagə Həmɨnpwa gə le dəwnə. Shezə Həmɨnpwa a mwotɨrən gə tatte nda tat yə jigərən.

²⁹ Gə shi-pepeyee Həmɨnpwa a və ɓwaare ka waha dan ndaa dɨ mɨnagərən.

³⁰ Hwun myee aa Yawude, sə mgban kɨnɨnɨng a kwamətə hwunaa koddə le da Həmɨnpwa. Ɓəgəng nə hwuna shea luu purutɨ dan, gəkɨlə Yawude aa koddən.

³¹ Sə mgban ɓəgəng Yawude aa koddə Həmɨnpwa, gə tən mgban təna ɗɨm wule purute Həmɨnpwa a ɗəwnə.

³² Həmɨnpwa mɨndə ɓwaare ɓətɨ ji-gbərəwyi a vor ɗongə koddə le darən, gə nda ɗa purusərən kat.

Dyemshi ɓondi Həmɨnpwa

³³ Wule fukata Həmɨnpwa kat ka fyemtɨ dan, wonə ɓa mbara? Tamdə! Wonə ɓa mba kuɓuktɨ lee shee ka lele dan? Tamdə! Wonə ɓa mba kanatɨ dan a leyə a bɨlda? Tamdə! Wonə ɓa mba təfəgye dan a leetɨrən? Tamdə!

³⁴ “Wonə lee wule ɗyangale da Həmɨmiye Baata? Tamdə! Ɓə wonə nzə-shalale dan? Tamdə!”

³⁵ “Nda mɨnə ɓwaara a ɗɨmə a və Həmɨnpwa, gə Həmɨnpwa a mɨnan dən? Tamdə!”

³⁶ Shee kat a vor vɨratə Həmɨnpwa nə ɗatɨrən, dɨ hakan təna dɨma, gə le dan, hɨnggən nə mgban. Fukatə kat hɨnggə Həmɨnpwa nə kaaru-kaaru! Amin.