Matta 8 - Ɓwaatiye New Testament

Yesu a dɨmə ama də ootɨ dagde

¹ Ite Yesu a janga gə nə motə, ɓwaare hananang a koɗən.

² A nzə-dagde a shi hakan, a kupo humwasən a san atɨ, “Həmɨmiye, na hye mwa, hye nee ka gətə hye suɓwagi gə dagdenə.”

³ Yesu a ɗifdə tɨfəngɨn a pan. Nda san atɨ, “Hɨn mwa, zə gi shet-shet.” Də a hangɨn dagde a dɨmgən, sɨsən a mɨna shet-shet.

⁴ Yesu a fyel-kwakingɨn twai atɨ, “Ɓe sa atɨ hye ɓa boyə ama sanə bəngra. Zə wudə hye bɨlə kɨsahəme sɨsa. Beetɨ angɨn hye vədə həmte ɓashita Musa a boyo. Angɨn nə ɓa bɨlə atɨ dagde dəw mbəə kat.” Nda ɓə ɗakan nda muɗə.

Mwadiyale da gyana nyatə

⁵ Ite Yesu a pɨrə vor Kafanawum, a gyana nyati da mi Roma a shi hakan ta nyit gwadəha.

⁶ Mangɨn a sa Yesu atɨ, “Həmɨmiye, kɨsa de ndə bə hwoɗye ka ootɨ ndongtə dɨ tənə kɨr-kɨr.”

⁷ Yesu a san atɨ, “Hɨn ɓa wudə a gwadən nda piyagə ootɨngɨn.”

⁸ Gyanangɨn a luwa a san atɨ, “Həmɨmiye, taa kəni hye shi hwode, bwe le ɓəmbə kɨsa de ɓa piyagə ootɨngɨn.

⁹ Di hɨn mgban hɨnə dɨ ɗa lyentə a pukə imi, hɨnə ka ji-pakawatə mgban a puka. Hɨn kana sa ma hiɗə atɨ, ‘Wudə,’ nda wudə, hɨn kana sa ama mgban atɨ, ‘Wa,’ nda shi. Hɨn kana gɨra kɨsa de atɨ, ‘Ɗa sanə,’ nda dɨ ɗa səngɨn.”

¹⁰ Naya Yesu ɓe kɨl la nda boyo, Yesu a ɗa ndəle, nda virwo haka myee dɨ koɗən a sarən, “Diyalə na dɨ boyownə atɨ, a bətɨ njiya Israila kat taa pa wule mwadiyale ɓətɨ a.

¹¹ Na dɨ səwnə atɨ, ɓwaare som-som a vor vɨratə, dɨ basa fɨlatɨ fəre, dɨ basa mbɨrtɨ fəre, tən kat ɓa ɗɨm haa nzatə gə təna zɨmshe ka Ibɨraim ka Ishaku ka Yakubu a vor həmnə pwa.

¹² Shezə myee kana təna pɨrə həmnə pwa, tənə 'ye mya poro a kəjidərən a haa bwange gaarə a vor kulitə. A hangɨn tən ɓa təwo ka tuula lintə.”

¹³ Yesu a sa gyanangɨn atɨ, “Zə muɗə hwoɗye, naya mwadiyale dəw a gə, sə mgban ɓa nza.” A itɨngɨn nə mgban ootə a dɨmgə kɨsa dan.

Yesu a gwadə ɓwaare hananang

¹⁴ Ite Yesu a pɨrə vor hwoda Bitrus, nda pa shewtɨ Bitrus ndə bi ka ootɨ haɓi kpalamye.

¹⁵ Yesu a pa tɨfərə, ootɨngɨn a mbəə, ngga maɗə a vərən sɨzɨmtə.

¹⁶ Ka kaade, mya payadə ɓwaare hananang 'ye ka pɨle ji-dwatə a sɨsərən a haka Yesu, nda boyə pɨle ji-dwatɨngɨn le a dɨmdərən, nda dɨmdə ootə gə sɨtɨ myee aa mworən kat.

¹⁷ Gə la mya boyo dɨ kwaamɨ kpale Ishaya a naa atɨ, “Nda luu ootɨ dam, ndi ka nənəngɨn nda nggur sɨtɨ otə dam mgban a sɨsən.”

Tənəte a vor koɗə Yesu

¹⁸ Ite Yesu a naa ɓwaare ləkə kɨr-kɨr takadən, nda gɨra lagbe dan a boyərən atɨ maa təna nggɨrə dɨ ɓayatɨ gərəngɨn.

¹⁹ Də a nzə-lee kəndə ɓashita Musati a shi hakan a san atɨ, “Nzə-kəndəshe, na koɗu a nagi ndo haa hye ɓa zə.”

²⁰ Yesu a luwa a san, “Gakye kat tənə ka goyee təna dɨ pukə də, ɓakaryee dɨ woyo pwa mgban tənə ka vənye darən, shezə hɨn Nze da Ɓwaara hɨn tam ka haa hɨn ɓa bə a piyadə.”

²¹ Ama hiɗə dɨ vor myee dɨ koɗən a san atɨ, “Həmɨmiye, vi humwatə gə na mɨnə hwoɗye a dɨ ɗɨk wo baagi.”

²² Də Yesu a luwa a san, “Kwaɗe, ɗaka wogye maa təna ɗək wogye darən.”

Yesu a gɨra hawo ɓoole

²³ Də Yesu a pɨrə vor koombotə, lagbe dan a koɗən.

²⁴ Dɨmsərən a vor haɓye nəle, hawe a nza maɗa, ɗogoli hawe a maɗa ka haɓye ta pɨrə vor koombotə. Shezə Yesu nee dɨ shini.

²⁵ Lagbengɨn a wudə a maddən a san, “Həmɨmiye, mbədenə! Hɨm nə ɓa ɗyeməm.”

²⁶ Nda sarən, “Hwun ji-mwadiyalə kəng-kənge, mɨnə ɗa hwuna gə ka kala shea?” Də nda maɗə a gɨra hawe ka ɗogoli hawe, təna bə ɗəng, haa talə shetətət.

²⁷ Kala a gərən kɨr-kɨr, təna ɗiyəsə, “Ɓə ndawula ɓwaara nə ana? A hawe kat ka ɗogoli hawe a dɨ koddə kormingɨn!”

Yesu a dɨmdə pɨle ji-dwatə dɨ sɨtɨ imi kpe a Garasa

²⁸ Ite təna nggɨrə ɓayatə a vor njiya Garasa, imi kpe 'ye ka pɨle ji-dwatə a sɨsərən a dɨma dɨ vor gonggoryi faree mya dɨ ɗɨk wogye də a kultən. Gətɨ pɨle darən a hasə kɨr-kɨr baa ama aa yə koɗə hangɨn.

²⁹ Təna maddə kormingrən a pwa, a wa kawahəme, a ɗiyə Yesu atɨ, “Nze da Həmɨnpwa, mɨnə peda kenə? Mɨnə hina gu, hye ɓə shi ɓa tənəə denə, a fərəngɨn aa nda kənə?”

³⁰ Kaɓa a doomo gusune nee dɨ zəmə basa hangɨn.

³¹ Ji-dwatɨngɨn a nyisə Yesu a san atɨ, “Na hye omrenə dɨmdenə gə sɨtɨ minə, hye ɗakenə hina pɨrə sɨtɨ doomo gusunarə.”

³² Yesu a sarən atɨ, “Muɗəm.” Də pɨle ji-dwatɨngɨn a dɨmgə sɨtɨ mingɨn a muɗə a dɨ pɨrə sɨtɨ gusune. Gusunəngɨn a rɨfə a sargə zangtə a pɨrə vor haɓye a soɓwo a mbərə kat.

³³ Ji-nidə gusunəngɨn a gyeɓə a muɗə a boyə ɓwaaree a vor vɨratə lə sa bəng gusunəngɨn ka sa bəng mingɨn 'ye ka pɨle ji-dwatə.

³⁴ Mi vɨratɨngɨn a dɨmə kat a dɨ pa Yesu. Də mgban təna nyisə Yesu atɨ, a nda muɗə a ɗaka bətɨ njiya darən.