Matta 6 - Ɓwaatiye New Testament

Kəndəshe a nə vədə həmtə

¹ “Bəmdə myensəwnə, ɓe səfeme dəwnə aa dɨma bwang a humwa ɓwaare gə təna nan a humownə. Hwun kana ɗaasə, taayə moonə kəwnə dɨ haka Baagəwnə arə a vor pwa.

² “Gə-angɨn, hwun kana ɓa və myee taa gəti kaarən asə, ɓe hwunaa kangə a hiwa ka ləngɨn a haa bwange ɓətɨ ji-kwakpeye a dɨ ɗa a vor vɨnə kəndəshe ka nə təfəgye gə mya humwarən. Diyalə na dɨ boyownə, tən luu moone darən mbəə kat.

³ Hɨnggu, hye kana ɓa və myee taa gəti kaarən asə, ɓe mwa ama a leyə, ɓe tɨfə lyekɗe aa lee sa tɨfə zɨme a dɨ ɗa,

⁴ gələ həmte hye dɨ vədə a gə haa ɓotə. Ndi Baagu a dɨ naa sa mya dɨ ɗa a haa ɓotə mgban ɓa mbow moone.

Hiwtə

⁵ “Na hwun ɓa hiwo, ɓe hwunaa ɗa ɓətɨ ji-kwakpeye a dɨ ɗa, gəkɨlə təna dɨ mwo kangtə a nə ɓwaare a vor vɨnə kəndəshe, ka kangtə a təktɨ təfəgye a haa bwange bwang, gə ɓwaare a naarən. Diyalə na dɨ boyownə, tən luu moone darən mbəə.

⁶ Hɨnggu, na hye ɓa hiwo, pɨrə vor vɨne, hye gbə kwa-vɨne a ɗa Baagu a myaawa nan hiwtə. Baagu a dɨ naa sa mya ɗa a haa ɓotə ɓa mbow moone.

⁷ Na hwun ɓa hiwo, ɓe hwuna ɗa hiwtə ta mɨn-magba a nə le hiɗə ɓətɨya myee aa lee Həmɨnpwa a dɨ ɗa, gəkɨlə təna dɨ niyə ɓətɨ mye ɓa kɨltɨrən gəkɨlə byelə gbake darən.

⁸ Ɓe hwunaa gə ɓətɨ tən, gə ite hwunaa nda nyisən, Baagəwnə lee sa hwuna dɨ mwo.

⁹ “Yangnə kana hwuna ɗa hiwtə: “ ‘Baagenə gaarə a vor pwa, maa kwakɨ ɗəmɗəme dəw a ɗɨm fukatə.

¹⁰ Həmne dəw a shi, maa kanatɨ dəw a nza ganə a vɨratə ɓətɨ ngga gə gaarə a vor pwa.

¹¹ Venə supo sɨzɨmtɨ nagi ndo fərə.

¹² Hye nggurenə gə səhase denə, ɓətɨya hina ngguro ɓwaare gə səhasa təna ɗenə.

¹³ Ɓe ɗakenə hina pɨrə vor kanaha. Hye mbədenə gə tɨfə ma hasəngɨn.’

¹⁴ Gə hwun kana dɨ ngguro ɓwaare gə səhase darən a təna ɗəwnə, Baagəwnə arə a vor pwa ɓa nggurəwnəgə hɨnggəwnə mgban.

¹⁵ A hwunaawa ngguro ɓwaare gə səhase darən a təna ɗəwnə, Baagəwnə aa dɨ nggurəwnəgə hɨnggəwnə mgban.

Gone

¹⁶ “Hwun kana ɓa gonə, ɓe hwunaa twaka humwasəwnə, ɓətɨ ji-kwakpeye a dɨ ɗa, gəkɨlə təna dɨ twaka humwaasərən ka myatə gə ɓwaare a leyə atɨ təne dɨ goni. Diyalə na dɨ boyownə, tən luu moone darən mbə kat.

¹⁷ Hɨnggu hye kana ɓa gonə, suɓwa humwasa hye tukwi maare,

¹⁸ gə ɓe ɓwaare aa leyə atɨ hye nee dɨ goni, pɨrgə Baagu a myaawa nan. Baagu a dɨ naa sa mya dɨ ɗa a haa ɓotə ɓa mbow moone.

Gɨnətə a vor pwa

¹⁹ “Ɓe hwunaa gbəwo nəngəwnə də gɨnətə a vɨratə, a haa shem-shemətə ka lyewtə a dɨ kɨɗarən də, mahərye mgban a dɨ ɓi haa a pɨrə a hɨrə.

²⁰ Gbəwomə nəngəwnə də gɨnətə gaarə a vor pwa, a haa shem-shemətə ka lyewtə aa dɨ kɨɗarən də, mahərye mgban aa dɨ ɓi haa a pɨrə a hɨrə.

²¹ Gəkɨlə a haa gɨnətɨ dəw a gə də, a hangɨn mgban hye ɓa bəə myensa.

²² “Diitə, kotə tikɨlə sɨtə. Diinga kana gə pepe, sɨsa kat ɓa gəə ɓɨrti.

²³ Anda diinga tam pepe, sɨsa kat mgban ɓa gəə kuliti. Ɓə anda ɓɨrte a sɨsa kat kuliti, ka mɨnə mye ɓa kana gbaktɨ kulitɨngɨn?

²⁴ “Kɨsa hiɗə aa dɨ pedə həmi-hwoɗye kpe a ɗarən lyentə a kwa-hiɗə. Ndi ɓa kwo ma hiɗə a mwo ma hiɗə, naasə mgban ndi ɓa koddə ma hiɗə nda ushi ma hiɗə. Sə mgban, tee dɨ pedə koɗə Həmɨnpwa ka taa dɨ kpeyə a ɗarən kɨsawne a kwa-hiɗə.

Ɓe hwun aa pɨrə ɗyengle

²⁵ “Gə-angɨn na dɨ boyownə atɨ, ɓe hwunaa pɨrə ɗyenglə kɨr-kɨre gə nzaasəwnə a vɨratə, a nə sa hwun ɓa zɨmə ka sa hwun ɓa soɓwo, naasə mgban a nə sɨɓwete hwun ɓa kala. Myentə aa pɨrgə sɨzɨmtə ma? Ɓə sɨtə mgban nggaa pɨrgə sɨɓweta?

²⁶ Zə niyəmdə ɓakarye pe, tənaawa hawo a ɗɨkdə asə a bongge, kat ka angɨn Baagəwnə a gaarə a vor pwa a dɨ zɨmdərən. Hwunaa pɨrgə ɓakarye ka fukatə ma?

²⁷ Wono a vorsəwnə dɨ ha ɗyenglə kɨr-kɨre ɓa mba myensən a gɨrədə nagi ka mbwayi fəre awatə hiɗa?

²⁸ “Ɓə gə mɨnə hwuna dɨ ɗyengle kɨr-kɨr a nə sɨɓweta? Zə namə kaakə finte dɨ nggaara pe, a tənaawa lyenə, tənaawa faa saltə.

²⁹ Hɨnə dɨ səwnə, kat ka fukata həmɨn Solomon, ndaa ɗɨm sɨɓwetɨ fyemye wula nggaara ɓətɨ fintɨ kaaka.

³⁰ Anda Həmɨnpwa ɓa ɓoyo ɓaake sɨɓwetə 'ye supo tənə kanyi ka myentə, kɨɗa tən kpamə ɗiyə ɓa hinarən, gə-angɨn hwuna leyə mbak-mbak atɨ Həmɨnpwa ɓa vəwnə sɨɓwetə. Kək! Hwun ɗongə mwadiyale ɓwaa.

³¹ Gə-angɨn ɗakamə ɗyenglə kɨr-kɨre ka satə atɨ, ‘Mɨnə hin ɓa zɨmə?’ Naasə, ‘Mɨnə hin ɓa soɓwo?’ Naasə mgban, ‘Mɨnə shee hin ɓa ɓoyo?’

³² Gə wule shingɨn kat tənə myee aa lee Həmɨnpwa a dɨ gyeɓərən. Shezə Baagəwnə gaarə a vor pwa leyə atɨ ɓə kana hwuna ɗɨm shingɨn kat.

³³ Gələ angɨn ɨləm həmne dan a kwamətə kat ka sə pepeya nda dɨ mwo kəwnə, shingɨn inə kat ndi ɓa ɗɨkəwnə də.

³⁴ Gə-angɨn ɓe hwunaa ɗyengle kɨr-kɨr a nə kɨɗa, gə kɨɗa nee ka tənəte nggi ɓa waya kaarə. Nagi ndo fərə nee ka tənəte nggi ɓa waya kaarə som.