Matta 4 - Ɓwaatiye New Testament

Nzə-tɨmbɨrha a kana Yesu

¹ Beetɨ angɨn Pitɨ Ɗəmɗəmtə a koɗə ka Yesu a zəkan a vor kaake gə Shetan Nzə-tɨmbɨrha a kanarən.

² Beetɨ gone bətə bəwtə fwat, tukotə ka fəre, myatə gən.

³ Də Nzə-tɨmbɨrha a san, “Anda hyenə Nze da Həmɨnpwa, byeli ka faree maa təna gəə buroditi.”

⁴ Yesu a luwa a san atɨ, “Mye doro vor Malɨmtɨ Ɗəmɗəmtə atɨ, ‘Aa ka buroditə ɓəmbə ɓwaara ɓa nza ka myentə, shezə ka nagi ndo ləməgi 'ye dɨ dɨma dɨ kwaamɨ Həmɨnpwa.’ ”

⁵ Beetɨ angɨn Nzə-tɨmbɨrha a zə ka Yesu a vor Urshelima a vɨra ɗəmɗəmtə, nda kangdən a nə fintɨ Shafe.

⁶ Nda san, “Anda hyenə Nze da Həmɨnpwa, zə saragə haa hye kangədə. Gə mye doro vor Malɨmtɨ Ɗəmɗəmtə atɨ, “ ‘Ndi ɓa ɗɨkdə malyenye dan təna mbalta a pwa, gə ɓe fukə njiya, mbwayinga a lyeb fara.’ ”

⁷ Yesu a luwa a san atɨ, “Sə mgban mye doro vor Malɨmtɨ Ɗəmɗəmtə atɨ, ‘Ɓe kana Həmɨmiye a Həmɨnpwatɨ dəw.’ ”

⁸ Nzə-tɨmbɨrha a mɨna zə ka Yesu a nə motɨ gbyalatə, a bɨlən zərgi həmnə vɨratə ka fukasə.

⁹ Nda shea san atɨ, “Shingɨn kat hɨn ɓa vutɨrən təna gəə hɨnggunə, hye kana kupo a kale-gbəətə.”

¹⁰ Yesu a san, “Təkəsə ke kwe Shetan! Giɓə mye doro vor Malɨmtɨ Ɗəmɗəmtə atɨ, ‘Ndi Həmɨmiye a Həmɨnpwatɨ dəw nə ɓəmbə hye ɓa kalan-gbəətə, sɨnə ɓəmbə hye ɓa koddən.’ ”

¹¹ Də a hangɨn Nzə-tɨmbɨrha a təkəsə ka Yesu, malyenye a shi hakan a gwadən.

Yesu a tiya hiwatə ka ləməgye dan

¹² Ite Yesu a kɨlə atɨ mye ɗɨkdə Yohana a gbərəwe, nda virwo a muɗə vor njiya Galili.

¹³ Nda ɗaka vor vɨra Nazarat a muɗə a dɨ nza vor vɨra Kafanawum, gbyel ka kwaka gəra a vor njiya Zebulun ka njiya Naftali.

¹⁴ Gə mya naadə la kpale Ishaya a boyo atɨ,

¹⁵ “Njiya Zebulun ka njiya Naftali, a tɨfə zətə a gərə Galili, a ɓayatɨ gbɨnuwo Urdun, a vor njiya Galili ta myee aa Yawude –

¹⁶ a myee nza vor kulitə, tən naa kaɓa ɓɨrtə. Mingɨn a nza vor vɨraa fyemi we, ɓɨrtɨngɨn janga a nəngrən.”

¹⁷ Tiyatə dɨ fərəngɨn muɗi, Yesu a tiya hiwatə ka le da Həmɨnpwa atɨ, “Porom-njiya, gəkɨlə həmnə pwa sɨka.”

Yesu a waga lagbe hwodan i kwamətə

¹⁸ Ite Yesu nee dɨ woyo basa kwaka gərə Galili, nda naa ɓwaare kpe, jibiye ka mufe a tən yə Siman a mya wa atɨ Bitrus ka mufəngɨn Andrawus, təne dɨ vyet ndwambe darən, gə tən ji-kəɗə.

¹⁹ Yesu a sarən atɨ, “Wam, kwaɗe mi, hɨn ɓa gəədəwnə ji-kəɗə 'ye ɓawa kasa ɓwaare.”

²⁰ Gbyel a hangɨn təna ɗaka ndwambye darən a koɗən.

²¹ Ite nda woyo a gɨsə humwa, nda mɨna peyə ka i ɓwaare kpe, jibiye ka mufe, ndi Yakubu nze da Zabadi ka mufəngɨn Yohana. Təne a vor koombotə ka baagərən Zabadi dɨ ɗadə ndwambye darən. Də Yesu a watɨrən,

²² gbyel a hangɨn təna dɨmgə vor koombotə, a ɗaka baagərən a koɗən.

Yesu a gwadə ji-ootə hananang

²³ Yesu a pɨrə humwa a vor njiya Galili, ta kəndəshe a vor vəni kəndəshe, ndi ta hiwa ka ləmə feme a nə həmnə pwa, ndi ta gwadə ɓwaare ta dɨmərən də ootə som-som.

²⁴ Kwakɨngɨn a ngguro a mbəgə vor njiya Siriya kat, mya payandə myee ka zərgi ootə som-som a sɨsərən, ka myee ka pɨle ji-dwatə, ka myee ka ootɨ mbərhe, ka myee ka ootɨ ndongtə nda dɨmərən də zərgi ootɨngɨn kat.

²⁵ Kaɓe təkə-təkətɨ ɓwaare dɨ vor njiya Galili, ka Dikapolis, ka vɨra Urshelima, ka njiya Yawudiya, kat ka myee a ɓayatɨ gbɨnuwo Urdun ta koɗən.