Matta 3 - Ɓwaatiye New Testament

Hiwata Yohana nzə-ɗa batisɨmatə

¹ A vor bətɨrə, Yohana nzə-ɗa batisɨmatə a dɨma ta hiwa ɓwaare le da Həmɨnpwa a vor kaakə Yawudiya

² ndi ta sarən atɨ, “Porom-njiya, gəkɨlə həmnə pwa sɨka.”

³ Sɨnə ma kpale Ishaya a bwe le a nəngɨn atɨ, “Kormə mangɨn nə dɨ wagaha a vor kaake atɨ, ‘Ɗamdə tɨfe da Həmɨnpwa, sɨnə ɗadə nzaasəwnə, naa tɨfe a tɨɗə shant.’ ”

⁴ Sɨɓwete Yohana a dɨ kala mya ɗatɨrən ka showo lukwaptə, nda ɓwe kada-mgbangɨn ka hinwa mya ɗa ka sɨlare, awyi ka njumwati nda dɨ zɨmə.

⁵ Ɓwaare dɨ vor Urshelima ka vor njiya Yawudiya kat ka myee nza vɨree takadə gbɨnuwo Urdun, a dama a zə hakan.

⁶ Tən ta bwegə səhase darən, ndi Yohana mgban ta ɗarən batisɨmatə a gbɨnuwo Urdun.

⁷ Yohana ɓe naa Farise ka Saduke hananang dɨ shi hakan, a haa nda dɨ ɗa ɓwaare batisɨmatə də, nda sarən atɨ, “Hwun rokonyi hashe a je da səfwakshike! Ɓə wonə she gɨrarəwnə atɨ gyeɓəm gə hwuna mbəgə ɓashita Həmɨnpwa ite dɨ shi nəngəwna?

⁸ Bɨləmdə sate atɨ hwun por-njiya ka səhase dəwnə.

⁹ Ɓe hwunaa sa atɨ hwunə je da Ibɨraim gə-angɨn hwun ɓa ɗɨm mbətə. Diyalə na dɨ boyownə Həmɨnpwa nee ka gətə nda mɨndə faree təna gəə je da Ibɨraim.

¹⁰ Di mye nggur shere ɓa ɗawgə kada kat ka kworyingɨn. Kadaa kat mbwosən aa wula, mye ɓa ɗawo a ɗongə ɗiye.

¹¹ “Hɨnggi hɨn na dɨ ɗa batisɨmatə ka haɓye ɓəmbə, gə nda bɨldə sate atɨ hwun por-njiya. Ndi ma dɨ kwaɗa beeshi, ɓə pɨrgi ka gətə, nagi hwanye dan nə, hɨn taa kəni na poro. Hɨnggən ndi ɓa ɗəwnə batisɨmatə ka Pitɨ Ɗəmɗəmtə ka ɗiye.

¹² Kpee sharashe dan nee a tɨfəngɨn ndi ɓa fiyagə kpərətə, nda shara shee, shifətə a dɨmə a ɗaka daase. Ndi ɓa ɗɨkdə daase a bongge, nda hina shifətə ka ɗiya aawa mbɨrə.”

Mye ɗa Yesu batisɨmatə

¹³ Də Yesu a dɨma dɨ vor Galili a shi gbɨnuwo Urdun gə Yohana a ɗan batisɨmatə.

¹⁴ Shezə Yohana a mwo atɨ nda kwo le, nda sa Yesu atɨ, “Hyenə kana hye ɗe batisɨmatə, ya hye ɓa mɨnashi hake yə?”

¹⁵ Yesu a luwa a san atɨ, “Maa a nzasə ɓəgəng, gə sɨnə sa kana mya ɗa, gə mya naadə sa kat Həmɨnpwa a dɨ mwo.” Də Yohana aɓə mwa.

¹⁶ Tee gbyel ite mya ɗa Yesu batisɨmatə, nda nggɨragə vor haɓye, də a hangɨn pwa a wunə bwang, nda naa Pita Həmɨnpwa dɨ janga a nəngɨn ɓətɨ nji-gulati.

¹⁷ Korme dɨ vor pwa a sa atɨ, “Nze de nə anə, a na dɨ mwo, haa a dɨ nɨnyi kan kɨr-kɨr.”