Matta 28 - Ɓwaatiye New Testament

Mattə gə taane

¹ Beetɨ ite fərə piyatɨ da Yawude pɨrə, ka haa kɨɗatə a saarə bətɨ kwamətə, Maryamu dɨ Magdala ka Maryamute hiɗə, a dɨmə a wudə ɓa niyadə taane.

² Itɨngɨn njiya a humuro kɨr-kɨr gə malyene da Həmɨmiye a janga dɨ pwa. Nda zə taane a mgbəngtəngdə faratə a nggəɓəddə a nza nəngrə.

³ Naasən ndi malyenəngɨn nə ɓətɨ ɓɨrti. Sɨɓwetɨ dan nə kung pwat-pwat.

⁴ Kala a gə nggɨree kanyi dɨ gɨra taane, təna gə ɗəng ɓətɨ wogi.

⁵ Malyenəngɨn a boyə mandingɨn atɨ, “Ɓe kala aa gəwnə, hɨn leyə atɨ Yesu a mya gbaltən nə hwuna dɨ ɨlə.

⁶ Ɓə tam ga, ɓə maggə we ka myentə ɓətɨ nda boyo. Wam, namə haa nda bədə.

⁷ Wudəm tan-tan boyəmə lagbe dan atɨ, ‘Ɓə maggə we ka myentə, sɨndə a humwa kəwnə dɨ muɗə vor Galili. Hwun ɓa nan a hangɨn.’ Hɨn səwnə.”

⁸ Mandingɨn a mɨn gə taane tan-tan, ka kala kat ka hanɨngtə. Təna gyeɓə ɓa dɨ boyə lagbe dan.

⁹ Tee ɗəng, təne dɨ gyeɓi, təna peyə ka Yesu. Nda sarən atɨ, “Hɨn wunakəwnə.” Təna shi a gyerə humwasən a kər mbwayingɨn a kalan-gbəətə.

¹⁰ Yesu a sarən atɨ, “Ɓe kala aa gəwnə. Wudəm boyəmə ji-nuwogi a lagbe de təna zə vor Galili, a hangɨn tən ɓa ne.”

Nggɨre a bwe sa ɗa

¹¹ Ite mandingɨn a kɨt tɨfe a dɨ muɗə, imi dɨ vor nggɨree gɨra taane a pɨrə vor vɨratə a boyə kɨsehəmi kpan-kpanye shee ɗa kat.

¹² Ite kɨsehəmingɨn ka mi kpanye da Yawude a peyə a shalasə le, təna ɗa kuta, a və nggɨre kaɓa taa kpan.

¹³ Təna sarən atɨ, “Boyəmə ɓwaare atɨ, ‘Ite hine dɨ sheni, lagbe dan a shi ka tukotə a hɨr wongɨn.’

¹⁴ Ləngɨn kana zə humwaa nggwamna, hin lee la hin ɓa boyən nda mwakenə, asə aa dɨ gəwnə.”

¹⁵ Nggɨrengɨn a luu taangɨn a ɗa mgban ɓətɨ mya fyel-kwakingrən. Mya bwe ləngɨn kat a waka Yawude, baa a dɨma a fəranə supo.

Lyentɨ gbakte Yesu a ɗaka lagbe dan kaarə

¹⁶ Tən lagbenə bəw a mbiɗi-hiɗə a muɗə vor Galili, a nggɨrə nə mote Yesu a boyərən atɨ a təna wudə də.

¹⁷ Ite təna nan, təna kalan-gbəətə, nagi ka sate atɨ imi aa mwa atɨ sɨnə.

¹⁸ Yesu a shi hakarən a sarən atɨ, “Gəte kat gaarə a vor pwa, kat ka itɨnə a vɨratə, mye vitɨrə.

¹⁹ Gə-angɨn wudəmə nagi ndo njiya hwuna kənə mingɨn shee, təna gəə lagbe de, hwuna ɗarən batisɨmatə a vor kwakɨ Baatə, ka hɨnggə Nze ka hɨnggə Pitɨ Ɗəmɗəmtə.

²⁰ Hwun ta kənərən koddə ləməgyee na vəwnə kat. Mbak-mbak hɨne ɓwaa kəwnə baa kpawtɨ vɨratə.”