Matta 27 - Ɓwaatiye New Testament

Yawuda galingdə nəngɨn

¹ Ka haa kɨɗatə, kɨsehəmi kpan-kpanye kat ka mi kpan-kpanye da Yawude a paya kat a kɨləsə a nə ɓɨl Yesu.

² Təna ɓwerən, a zəkan a haka Bilatus, nggwamnatɨ Yawudiya.

³ Ite Yawuda ndi ma vədə Yesu, a niyə mye bəngən ɓashitɨ we, le a hasən kɨr-kɨr, nda ɗa na hɨn leyitə. Nda mɨnə ka nggɨrngɨma bəwtə mwaakɨn a və kɨsehəmi kpan-kpanye kat ka mi kpanye.

⁴ Nda sarən atɨ, “Hɨn ɗa səhase, gəkɨlə na vədə ma aa ndaga ɗa a səhasə dɨmə kan a we.” Təna luwa a san atɨ, “Ɓə mɨnə sɨpɨrsenə da? A nee ɓə mbiɗi hɨnggu.”

⁵ Də Yawuda a kəjidə taangɨn a vor Shafe. Nda dɨmə a dɨ galingdə nəngɨn.

⁶ Kɨsehəmi kpan-kpanye a por taangɨn, təna sa atɨ, “Ɓashitə aa vədə humwatə mya pedə wule taanə ka mbiɗitɨ a Shafe, gələ taangɨn taa zaambə.”

⁷ Təna shalale a kɨləsə atɨ, tən ɓa ɗər njiya da nzə-nwo dwe ka taangɨn nda gəə haa ɗək wogi omi.

⁸ Səngɨn nə ɗa mya dɨ wa hangɨn atɨ, “Haa Zaambe,” baa supo.

⁹ Də la mya boyo dɨ kwaamɨ kpale Jerimaya a naa atɨ, “Tən por taa nggɨrngɨme bəwtə mwaakɨn, taangɨn nə mi Israila a kɨləsə ɓa ɗərtən kan.

¹⁰ Ka taangɨn təna ɗər njiya da nzə-nwo dwe ɓətɨya Həmɨmiye a gɨrari.”

Mye zə ka Yesu a humwa Bilatus

¹¹ Yesu a kangə humwaa nggwamna, Bilatus. Nggwamna a ɗiyən, “Hyenə həme da Yawude ma?” Yesu a luwa a san atɨ, “Hye boyo ka nənanga.”

¹² Ite kɨsehəmi kpan-kpanye ka mi kpanye da Yawude a ɗɨkən le, a kəntən ka shee som-som, Yesu aa wuna.

¹³ Bilatus a ɗiyən, “Tee kɨl ləməgyee təna dɨ ɗəku ma?”

¹⁴ Yesu aa wuna kwaamɨngɨn nagi hiɗə a nə ləməgyee mya ɗəkən. Nggwamna a ɗa ndəle kɨr-kɨr.

Mye ɗa Yesu ɓashitɨ we

¹⁵ Ndi nggwamna nee ka a kwalə, mye kana ɓa ɗa kwalə Lawuttə, nda dɨ para hiɗə dɨ vor myee a gbərəwe, a ma ɓwaare a dɨ mwo.

¹⁶ A itɨngɨn, təne ka ama a vor gbərəwe mya wa atɨ Barabas. Ɓwaare leerən gə lyentɨ hattɨ dan.

¹⁷ Gə-angɨn ite ɓwaare a paya kat, Bilatus a ɗiyərən le, “Wonə hwuna dɨ mwo atɨ na parəwnə awan, Barabas nə ma? Naasə mgban, Yesu a mya wa atɨ Ma Həmɨnpwa a Yaɓwarən na?”

¹⁸ Gəkɨlə ndi Bilatus, ɓə leyə atɨ jiwnə gərən təna ɓə kɨsa Yesu a shikan a hakan.

¹⁹ Ite Bilatus nee nza nə raamə ɓashitɨ dan, mesən a lyanashe atɨ, “Ɓe pɨrə le da ma pepeya nə, gəkɨlə ka tukongnə hɨn tənə kɨr-kɨr a vor jiritə gə le dan.”

²⁰ Kɨsehəmi kpan-kpanye kat ka mi kpanye da Yawude a boyə təkə-təkətɨ ɓwaare atɨ, a təna nyisə mya para Barabas, Yesu mgban mya ɓɨlə.

²¹ Nggwamna a mɨna ɗiyərən le, “A vor mingɨn dɨ kpeyə, wonə hwuna dɨ mwo atɨ na parəwnə awan?” Təna luwa a san atɨ, “Barabas nə.”

²² Bilatus a ɗiyərən atɨ, “Ɓə ya hɨn ɓa ɗa ka Yesu a mya wa atɨ Ma Həmɨnpwa a Yaɓwarən?” Təna san kat atɨ, “A mya gbaltən a nə kada ɓɨdɨmtə!”

²³ Nda ɗiyərən atɨ, “Gəkɨlə mɨna, ndawula səhasə nda ɗa?” Təna gbyanga kwakingrən kat a pukdə gəəshe atɨ, “A mya gbaltən!”

²⁴ Ite Bilatus ɓe niyə ndaa diyə mba asə a ɗa, shezə ɓwaare maɗə dɨ paya, gəəshe maɗə kɨr-kɨr, nda kɨn haɓye a suɓwagə tyefingɨn a humwaasərən kat, nda sarən atɨ, “Tɨfa tamdə a vor kəjidə zaambə ma. A nee hɨnggəwnə nə.”

²⁵ Mingɨn kat a luwa a san atɨ, “Naa zaambəngɨn a gə nəngenə kat ka jingenə.”

²⁶ Də nda pararən awa Barabas. Nda ɗɨkdəha mya byeng Yesu, nda vədən gə mya gbaltən a nə kada ɓɨdɨmtə.

Ji-gyelmbutə a shar Yesu

²⁷ Ji-gyelmbutə a kɨt Yesu a pɨrə kan a voti ta nggwamna, təna payadə mbiɗitɨ ji-pakawatɨ darən kat a takadən a peyə.

²⁸ Təna saɗan gə sɨɓwetə, a kan rukutə kpalamə ɓɨratə.

²⁹ Təna ɓə shea tak mbulo həmne ka hwole a kupon a nəngɨn. Təna ɗɨkən kada a tɨfə zɨməngən, təna shea gyerə humwasən ta wunakan ka sharha atɨ, “Naa həmne a gɨrə kwe həme da Yawude!”

³⁰ Təna təfən nawye, a lugən kadangɨn, tən ta shea lyebrən a nəngɨn ka kadangɨn anəsə-anəsə.

³¹ Tən ɓe shartən mbəə kat, təna sɨɗan gə rukutə kpalama a sɨsən a kalan sɨɓwetɨ dan. Təna dɨmə kan gəkɨlə mya dɨ gbaltən a nə kada ɓɨdɨmtə.

Mye ɓɨdɨmdə Yesu

³² Ite təne dɨ dɨmi, təna peyə ka ama dɨ vɨrate mya wa atɨ Sireni, kwakɨ mangɨn nə Siman. Təna bɨlən mbamtə a ɗɨkdən nda nggur kada ɓɨdɨmta Yesu.

³³ Təna tɨla a haa mya wa atɨ Golgota, (naarəngɨn nə Haa Kpəəkəne.)

³⁴ Də a hangɨn təna və Yesu vwo gbaanga mya nggəmdən ka haɓi kwatye gə nda soɓwo. Yesu ɓe dwaka kɨlarən, nda kwo soptə.

³⁵ Ite təna gbaltən a nə kada ɓɨdɨmtə, təna pa-bara a nə sɨɓwetɨ dan a ɓyanasə.

³⁶ Təna shea nza ta nidən.

³⁷ A nə kada ɓɨdɨmta Yesu, mya dorshe a nə mgbaalə gbalsən atɨ, yesu nə anə, ndi həme da yawude.

³⁸ Mya gbal i ji-ɓodəkha kpe ɓwaa ka Yesu, ma hiɗə a tɨfə zɨməngən, ma hiɗə mgban a tɨfə lyekɗəngən.

³⁹ Myee dɨ pɨri dɨ tɨfəngɨn a haa mya gbal Yesu də, a nidən a rikiyə a tiya ɗaasən.

⁴⁰ Tən ta san atɨ, “Angɨn nee kəw. A hye ma ɓa fala Shafe a mɨna nwogən a vor bətə mwaakɨn. Zə mbədə nanga! Janga gə nə kada ɓɨdɨmtə anda hyenə Nze da Həmɨnpwa!”

⁴¹ Sə mgban kɨsehəmi kpan-kpanye ka ji-lee kəndə ɓashita Musa kat ka mi kpan-kpanye da Yawude, təna shartən ta san atɨ,

⁴² “Nda mbədə imi, shezə ndaa mba nəngɨn a mbədən. Sɨnə həme da mi Israila. Maa nda janga gə nə kada ɓɨdɨmtə ko, hin ɓa mwakan.

⁴³ Nda sa atɨ nda mwaka Həmɨnpwa. Ɓa Həmɨnpwa a shi a mbədən ɓəgəng yee, anda Həmɨnpwa nee dɨ mworən. A nda sa atɨ, ‘Hɨnə Nze da Həmɨnpwa.’ ”

⁴⁴ Sə tən ji-ɓodəkha mya gbaltɨrən ka Yesu mgban a ɗaasə kan.

Yesu mbɨrə

⁴⁵ Ka fəre a nən, haa kat a gə kulit baa awatə mwaakɨn.

⁴⁶ Ite fəre a viriwgə nən ka mbwayi fəre mwaakɨntɨ fəre, Yesu a waha ka korme kaɓa kpan atɨ, “Eloi, Eloi, lama sabaktani?” Naarə ləngɨn nə atɨ, “Həmɨnpwa de, Həmɨnpwa de, mɨnə ɗa hye ɓə ɗake dɨsəri?”

⁴⁷ Ite myee kangə hangɨn a kɨla ləngɨn, təna sa atɨ, “Sɨne dɨ wa Iliya.”

⁴⁸ Ama hiɗə dɨ vor myee kangə hangɨn a giɓa tan-tan a nggur shibaashe. Nda shipdə shibaashingɨn a vor haɓi gbaanye, nda ɗɨkənə kada, a ɗifə Yesu a pwa gə nda saɓwa.

⁴⁹ Mbiɗitɨ ɓwaare kangə hangɨn a sa atɨ, “Mbam ɗəng a mya niyə anda Iliya ɓa shi a mbədən.”

⁵⁰ Ite Yesu a mɨna maddə kormɨngɨn a waha kaɓa kpan, nda ɗwangadə pitə hiɗə a mbɨrə.

⁵¹ Də ɗəng sɨpate a vor Shafe a sɨrə dɨ pwa baa njiya, a təkə kpe. Vɨratə a humuro, mogye a fələ a təkəsə.

⁵² Taanye a wonə, myee da Həmɨnpwa hananang 'ye mbəri a maggə taane ka myentə.

⁵³ Mingɨn a damagə taane. Beetɨ ite Yesu a maggə taane ka myentə, təna pɨra a vor Urshelima vɨraa ɗəmɗəmtə, ɓwaare hananang a naarən.

⁵⁴ Ite gyana nyatə ka mbiɗitɨ myee kangə hangɨn dɨ gɨra Yesu ɓe naa humurtɨ njiya ka shee ɗa kat, kala gərən kɨr-kɨr, təna sa atɨ, “Diyalə manə Nze da Həmɨnpwa nə!”

⁵⁵ I mandi hananang nee kanyi dɨ niya dɨ haa ɓongətə. Tənə mandye kwaɗa Yesu dɨ gwadən dɨ vor njiya Galili.

⁵⁶ A vor mandingɨn, Maryamu dɨ Magdala nee də, ka Maryamu nuwogə Yakubu ka Yusufu, ɗɨkənə nuwogə je da Zabadi.

Mye ɗɨk wo Yesu

⁵⁷ Ite kaade nee ɗa, a nzə-gɨnəti dɨ vor vɨraa Aramatiya, mya wa atɨ Yusufu, ndi mgban ɓə gəə lagba da Yesu nə,

⁵⁸ nda wudə haka Bilatus a nyisən wo Yesu. Bilatus a mwa, nda lyenshe atɨ a mya və Yusufu wo Yesu.

⁵⁹ Yusufu a nggur wongɨn a vutə ka foowo pepeye.

⁶⁰ Nda ɗɨkə taanə wele dan a mya ɗa gonggoro faratə. Nda mgbəngtəngdə faratɨ kpantə a gbə taane kaarə, nda muɗə.

⁶¹ Maryamu dɨ Magdala ka Maryamute hiɗə nee nza gbyel ka taane.

Nggɨre dɨ gɨra taanə Yesu

⁶² Haa ɓe kɨɗa, a fərə piyatɨ da Yawude, kɨsehəmi kpan-kpanye ka Farise a zə haka Bilatus.

⁶³ Təna san atɨ, “Magbake, hin ɗyanga ite nzə-byelə ɓaya nee ka myentə, nda sa atɨ, ‘Beetɨ bətə mwaakɨn, hɨn ɓa maggə we ka myentə.’

⁶⁴ Gə-angɨn ɗɨkdə ɓwaare a təna kangə a gɨra taane baa mwaakɨnə bətə gələ ɓe lagbe dan a shi a hɨr wongɨn, təna shea boyə ɓwaare atɨ nda maggə we ka myentə. Wule jeronyingɨn ɓa shea hasə a pɨrgə i kwamətə.”

⁶⁵ Bilatus a luwa a sarən atɨ, “Wudəm ka nggɨre, hwuna gbargiyə taanəngɨn ɓətɨya hwuna leyə.”

⁶⁶ Də təna muɗə mgban a gbargiyə taanəngɨn a liɓən, gələ mye kana pan təna leyə. Təna kangdə nggɨre 'ye ɓa gɨra taane pepe.