Matta 25 - Ɓwaatiye New Testament

Byelə səɗe a nə rekye bəw

¹ “A fərəngɨn mye ɓa kana həmnə pwa ka rekye bəw, 'ye por tyekəlye darən dɨmi ɓa kul ngaja.

² Tuf dɨ vor rekingɨn gəmi, 'ye tuf mgban ji-lelə.

³ Reki gəmye a por tyekəlye darən, tənaa poro ka hobi maare.

⁴ Reki ji-lele a por tyekəlye darən kat ka hobi maare.

⁵ Ite ngaja a ɓwanga, rekingɨn kat a tiya zəkəntə a pukə a shenə.

⁶ “Ka vor tukotə, mya kɨla korme dɨ waha atɨ, ‘Ngaja tɨla, dɨməm kuləmrən.’

⁷ “Rekingɨn kat a vaɗaya gə shintə, a ɗadə tyekəlye darən.

⁸ Reki gəmye a nyisə reki ji-lele atɨ, ‘Kɨnəmenə maare dəwnə gəkɨlə tyekəlye denə nə dɨ mbəri.’

⁹ “Reki ji-leləngɨn a luwa a sarən atɨ, ‘Ə'ə, ndəng maarəngɨn aa dɨ kənenə ka hwun kat, ndɨka hwuna wudə haka myee dɨ ɗərdə maare hwuna ɗara hɨnggəwnə.’

¹⁰ “Ite təna dɨmə a dɨ muɗə ɗara maare, ngaja a tɨla. Reki ji-lele 'ye nza dɨ kula ka ɗaasɨtə a pɨrə ka ngaja a vor hwoɗi ləke. Mya gbə kwa-haa.

¹¹ “Dɨ bee, rekirə a mɨna a kangə haa bwange ta waha atɨ, ‘Həmɨ-hwoɗye, həmɨ-hwoɗye, wunenə a kwa-haa.’

¹² “Nda luwa a sarən atɨ, ‘Diyalə na dɨ səwnə, taa lerəwnə.’ ”

¹³ Yesu a sa atɨ, “Gə-angɨn, hwun ta bəə myensəwnə, gəkɨlə hwunaa lee fəre, hwunaa lee awatə.

Byelə səɗe a nə kɨse mwaakɨn

¹⁴ “Angɨn ɓa gə ɓətɨ ma dɨmi muɗə omotə, nda waga kɨse dan a ɓyanarən gɨnətɨ dan.

¹⁵ Nda və nagi ndo ma taa kənəsə ka maasəngɨn gə nda nggala kan, ma hiɗə, nda vən taa dyamse haru bəw laka tuf (5,000), ma hiɗə nda vən haru bəw laka kpe (2,000), ma hiɗə mgban nda vən haru bəw (1,000). Ndi ɓe ɓyanarən mbəə, nda kɨr tɨfe a muɗə omotə.

¹⁶ Ma mya vən taa dyamse haru bəw laka tuf a muɗə tan-tan a lyenə kan, nda ɗɨm taa a nə a, dyamse haru bəw laka tuf.

¹⁷ Sə mgban marə mya vən taa dyamse haru bəw laka kpe, a ɗɨma taa dyamse haru bəw laka kpe a ɗɨkə də.

¹⁸ Shezə marə luu taa dyamse haru bəw, a muɗə a dɨ ra gwe a njiya, a ɓodə taa da həmɨ-hwodan də.

¹⁹ “Ite bətə ɓe muɗə ɓong-ɓong, həmɨ-hwoɗingɨn a mɨna. Nda waga kɨse dan gələ təna nza a ɓeguɗe lyente təna ɗa ka gɨnətɨ dan.

²⁰ Ma luu taa dyamse haru bəw laka tuf a mɨna ka mɨni a haru bəw laka tuf ɗɨki də. Nda sa atɨ, ‘Həmɨ-hwoɗye, taa dyamsa hye vi nə haru bəw laka tuf, hɨn ɗɨma haru bəw laka tuf a nəngɨn.’

²¹ “Həmɨ-hwodan a luwa a san atɨ, ‘Ɓə wula, hye kɨsa feme ma tikɨse. Hye ɗa lyentə ka diyale ka sa ɓyeləng mya vu, hɨn ɓa vu a kaɓa kpan hye nidən. Wa, pɨrə vor hanɨngtɨ da həmɨ-hwodəw!’

²² “Ma ka taa dyamse haru bəw laka kpe a shi mgban. Nda sa, ‘Həmɨ-hwoɗye, taa dyamsa haru bəw laka kpe hye vi nə, hɨn ɗɨma haru bəw laka kpe a nəngɨn.’

²³ “Həmɨ-hwodan a luwa a san atɨ, ‘Ɓə wula, hye kɨsa feme ma tikɨse. Hye ɗa lyentə ka diyale ka sa ɓyeləng mya vu, hɨn ɓa vu a kaɓa kpan hye nidən. Wa, pɨrə vor hanɨngtɨ da həmɨ-hwodəw!’

²⁴ “Ndi kɨsa luu taa dyamse haru bəw a pɨra. Nda sa, ‘Həmɨ-hwoɗye, hɨn leyə atɨ, teewa wozə, hye dɨ ɗawshe a haa tee laga də, hye dɨ pedə shee a haa tee vyatarən də.

²⁵ Kala a gi, na dɨmə a dɨ ɓodə taa dyamse dəw haru bəw a njiya. Zə luu se dəw.’

²⁶ “Həmɨ-hwodan a luwa a san atɨ, ‘Hye kɨsa hase, nzə-nyaɗətə! Hye leyə atɨ na dɨ ɗawshe a haa taa laga də, na dɨ pedə shee a haa taa vyatarən də.

²⁷ Ɓə mɨnə ɗa tee zə ka taa de a haka ji-nggalatə, gəkɨlə hɨn kana mɨna na luu taangɨn ka moone?

²⁸ “ ‘Luwomgən taa dyamsəngɨn haru bəw, hwuna və ma ka taa dyamse haru bəw laka bəw.

²⁹ Gəkɨlə ma ka se kan, sɨnə mye ɓa mɨna ɗɨkən də gə nda ɗɨmə kpan. Ma mgban taa asə kan, sɨnə mye ɓa kpawa nzɨ a nda gə kan a lugən.

³⁰ Ɗongəmdə kɨsa ɓaya a vor kulitə, gaarə a hangɨn mya təwo ka tuula lintə.’

Mbage ka hoye

³¹ “Fəra hɨn Nze da Ɓwaara ɓa mɨnadə ka fukatɨ de kat ka malyenye, hɨn ɓa nza nə ruutɨ fukatɨ de.

³² Mi vɨratə kat ɓa paya a humwashi, hɨn ɓa taka ɓwaare kpe ɓətɨ majine a dɨ taka waka mbage ka hoye.

³³ Hɨn ɓa mɨndə mbage a tɨfə zɨməngi, hoye mgban a tɨfə lyekɗəngi.

³⁴ “Də Həməngɨn ɓa shea sa myee a tɨfə zɨməngən atɨ, ‘Hwun myee Baagi a wulakəwnə, wam luwom həmna mya ɗa gə le dəwnə dɨ fəra mya kwak vɨratə kan.

³⁵ Gəkɨlə ite myatə a gi, hwuna vi sɨzɨmtə, wor-haɓye a gi, hwuna vi na saɓwa, hɨn omo, hwuna luri a hwodəwnə.

³⁶ Ite hɨne dɨfuwa, hwuna ɓwedi, ootə a gi, hwuna nidi, hɨne a vor gbərəwe, hwuna sɨ wunake.’

³⁷ “Də mi pepeyingɨn ɓa luwa a ɗiyən atɨ, ‘Həmɨmiye, goɗi hina nəw ka myatə hina zɨmda, naasə ka wor-haɓye hina vu hye saɓwa?

³⁸ Goɗi hina nəw hye omo hina lura a hwodenə, naasə dɨfuwa hina ɓweda?

³⁹ Goɗinə hye bə ka sɨtɨ ootə, naasə a vor gbərəwe, hina wunakəw?’

⁴⁰ “Həməngɨn ɓa luwa a sarən atɨ, ‘Diyalə na dɨ boyownə, shee kat hwuna ɗa hiɗə dɨ vor minə de 'ye mya hyatarən, hɨnə hwuna ɗe.’

⁴¹ “Də mgban həmɨn ɓa sa myee a tɨfə lyekɗe atɨ, ‘Təkəməsə ke, hwun myee mya hiwdəwnə, muɗəm pɨrəmə vor ɗiya kaaru-kaaru, a ɗiya mya ɗa gə le da Nzə-tɨmbɨrha ka malyenye dan.

⁴² Gəkɨlə ite myatə a gi, hwunaa vi sɨzɨmtə, wor-haɓye a gi, hwunaa vi na saɓwa,

⁴³ hɨn omo, hwunaa luri a hwodəwnə, hɨne dɨfuwa, hwunaa ɓwedi, na bə ka sɨtɨ ootə, naasə a vor gbərəwe, hwunaa wunake.’

⁴⁴ “Mingɨn ɓa luwa a san atɨ, ‘Həmɨmiye, goɗi hina nəw myatə gu naasə ka wor-haɓye, goɗi hye omo naasə dɨfuwa, goɗi hye bə ka sɨtɨ ootə naasə a vor gbərəwe, hinaa gwada?’

⁴⁵ “Ndi ɓa luwa a sarən atɨ, ‘Diyalə na dɨ boyownə, wule shee kat hwunaa ɗa hiɗə dɨ vor myee mya hyatarən, hɨnə hwunaa ɗe.’

⁴⁶ “Mingɨn ɓa muɗə vor tənəte kaaru-kaaru, mi pepeyingɨn a pɨrə vor myente kaaru-kaaru.”